Выбрать язык
Книги Ветхого Завета
Книги Нового Завета
с русским текстом1 Иза-шольо-влак, Македонийысе черке-влаклан Юмо могай порылыкым ыштыме нерген тыланда увертарена.2 Нуно кугу нелылык ден тергымашке логалыныт, но нунын куанышт тунар кугу, моткоч йорло улыт гынат, шкеныштыным уло кумылын пуэныт.3 Нуно шке кумылын, кертмышт семын да кертмышт деч утларакат пуэныт, тидым мый таныклем.4 Святой-влаклан погымо полышыш шке надырыштым пышташ йӧным нуно мемнан деч чот сӧрвален йодыныт.5 Мом ме вученна, нуно тидым веле огыл ыштеныт: нуно шкеныштымат пуэныт, ондак Господьлан, а вара, Юмын кумылжо почеш, мыланнат.6 Сандене ме Титым тиде поро пашам тендан дене тӱҥалмыж семынак мучаш марте шукташ йодынна.7 Кузе те чыла шотыштат поян улыда, – ӱшаныме дене, ойлымо дене, шинчымаш дене, уло тыршымаш дене, мемнам йӧратымыда дене, – тыгак тиде порылык паша денат поян лийза.
8 Кӱштымӧ семын тидым ом ойло, а, молын тыршымышт нерген каласкален, тендан йӧратымашда чын мо манын тергынем.9 Вет те мемнан Господьна Иисус Христосын порылыкшым паледа: те Тудын йорлылыкшо дене пойыза манын, Тудо, поян, тендан верч йорлештын.10 Мый тыланда тидлан каҥашым пуэм, тудо тыланда пайдале лиеш – вет кодшо ийынак те моло деч ондак тиде пашам тӱҥалында да тудым моткоч ыштынеда ыле:11 ынде тиде пашам шуктыза. Те тӱҥалаш кумылан лийында гын, кертмыда семын тудым мучаш марте шуктыза.12 Вет пуаш кумыл уло гын, айдемын мо улмо гыч пуымыжо келшыше лиеш. Мо тудын уке, тудым огыт йод.13 Молылан куштылго, а тыланда неле лийшаш огыл, иктӧр лийшаш:14 кызыт тендан утыда нунын ситыдымыштым темаш, а вара нунын утышт тендан ситыдымашдам темаш лийже, тыге чыла иктӧр лиеш.15 Возымо семын
«Кӧ шуко поген, утыжо лийын огыл,
кӧ шагал поген, ситыдымыже лийын огыл».*а
16 Титын шӱмыш тендан верч тугаяк тыршымашым пыштыше Юмылан тау.17 Вет Тит мемнан йодмына дене келшен веле огыл, тудо тугай тыршыше – тендан деке шке кумылын кая.18 Поро Уверым каласкалымыжлан чыла черкыште моктымо изам тудын дене пырля колтена.19 Адакшым черке-влак тиде пӧръеҥым мемнан дене пырля полышым наҥгаяш ойыреныт, тиде полышлан ме, Господьын Шкенжынак чапшым нӧлташ да ямде улмыдам ончыкташ манын, пашам ыштена.20 Тынар кугу пӧлек дене мом ыштымыланна мемнам нигӧ ынже титакле манын шекланена.21 Вет ме Господь ончылно веле огыл сай ышташ тыршена, а еҥ-влак ончылнат.22 Нине кок еҥ дене пырля эше ик изам колтена. Ме тудым ятыр гана да шуко шотышто тергенна да тыршыше улмыжым палена. Ынде тыланда чот ӱшанымыжлан кӧра тудын тыршымыже эшеат шукемын.23 Тит нерген ойлаш гын, тудо мыйын йолташем да тыланда мый денем пырля пашам ыштыше. А мемнан нине иза-шольо-влакна черке-влакын колтымо еҥышт, Христосын чапше улыт.24 Тугеже йӧратымашдам да тендам мокташ амална улмым нунылан да черке-влаклан ончыктыза.
*а 8:15 Лекм 16:18.
Глава 8