Выбрать язык
Книги Ветхого Завета
Книги Нового Завета
с русским текстом1 Ниневий нерген пророклен ойлымаш. Елкос гыч улшо Наумын кончымашым возымо книгаже.
2 Господь – ушкалыше да ӱчым шуктышо Юмо.
Господь – ӱчым шуктышо, шыдешкымыж годым лӱдыкшӧ.
Тудо шке тушманже-влаклан ӱчым шукта,
нунын ваштареш шыдыжым ок луштаре.
3 Господь – кужун чытыше, вий-куатше кугу,
Тудо мут кучыктыде нигунам ок кодо.
Господь ошкылеш тӱтаныште, кугу мардежыште,
пыл-влак Тудын йол йымачынже пурак семын нӧлталтыт.
4 Кӱштен каласа Господь теҥызлан, да тудыжо кошка,
эҥер-влаклан – нуно пучат,
Васан ден Кармил лывыжгат,
Ливан курыкысо пеледыш-влак шапалгат.
5 Тудын ончылно курык-влак чытырат,
чоҥгата-шамыч лапемыт,
Тудын чурийже ончылно мланде лӱҥгалтеш,
тӱня да тушто чыла илыше чытырат.
6 Кӧ Тудын шыдыже ончылно шоген кертеш?
Тудын йӱлышӧ шыдыжым кӧ чыта?
Тул семын Господьын шыдыже йога,
кӱ курык-влак Тудын ончылно шаланат.
7 Господь поро, туткар кечын Тудо – куржын утлымо вер,
Тудлан инаныше-влакым Тудо пала да утара.
8 Шарлыше вӱдташлем дене
Тудо Ниневийым негыз марте шалата,
да Тудын тушманже-влакым пычкемыш авалта.
9 Мом те Господь ваштареш ышташ шонеда?
Тудо чыла пытара,
да туткар угычын огеш лий.
10 Иман вондер семын нуно пӱтыралтыныт,
йӱшӧ-влак семын руштыныт –
кукшо олым семын нуно йӱлалтыме лийыт.
11 Тый дечет, Ниневий,
Господь ваштареш осалым ышташ шонышо,
осал чоялыкым пӱктен шинчыше лектын.
12 Тыге Господь ойла:
«Кеч нуно виян да шукын улыт,
но сӱмырен шумо лийыт да йомыт.
А тыйым, калыкем, Мый йӧсландаренам,
но ончыкшым тидым ом ыште.
13 Тылат чиктыме омытам Мый кызыт шалатем,
шинчыретым кӱрлын кудалтем!»
14 А тыланет, Ассирий, Господь теве мом палемден:
«Лӱметым нумалше тукымет тетла огеш лий,
Юмет-влакын пӧртыштышт Мый
пӱчкын лукмо да велен ыштыме статуй-влакым пытарем,
тылат шӱгарым ямдылем,
вет тый нимолан йӧрдымӧ улат».
15 Теве курык ӱмбалне уверзе вашка –
тудо поро уверым конда,
тыныс нерген увертара!
Иуда, пайрем-влакетым эртаре,
мом сӧрыметым шукто!
Осал еҥ мландышкет тетла керылт ок пуро,
вет тудо пӱтынек пытарыме.
Глава 1