Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИОИЛЬЫН КНИГАЖЕ
3 Глава
1 Калык-влакым судитлымаш. 17 Иуда калыкын ончыкылык илышыже сай да волгыдо лиеш.1 Тудо кечылаште да тудо жапыште,
кунам Иуда ден Иерусалимым плен гыч пӧртылтем,
2 Мый чыла моло калыкым погем,
нуным Иосафат
*а лапверыш кондем.
Ойырен налме шке калыкем верч, Израиль верч,
тушто Мый нуным судитлаш тӱҥалам –
нуно Израильым калык-влак коклашке шалатеныт,
Мыйын мландем пайленыт.
3 Мыйын калыкем шотышто шеревам кышкеныт,
яжар ӱдырамашлан тӱлаш манын, рвезым пуэныт,
йошкар аракам йӱаш манын, изи ӱдырым ужаленыт.
4 Тир ден Сидон, филистим кундем,
мом те Мыйын ваштареш шонен пыштенда?
Мылам ӱчым шуктынеда?
Мылам мутым кучыктынеда гын,
Мый тудым куштылгын да вашке вуй ӱмбакыда пӧртылтем.
5 Те Мыйын ший ден шӧртнем налында,
эн чапле поянлыкем шке юмыдан пӧртлашкыже пуртенда.
6 Шочмо верышт гыч кораҥдаш манын,
Иуда ден Иерусалим эрге-влакым грек-влаклан ужаленда.
7 Но кушко те нуным ужален колтенда,
тушеч Мый нуным ӱжын кондем
да тыланда пашада почеш пӧртылтем:
8 эрге ден ӱдырда-влакым Иуда эрге-шамычлан ужалем,
а нунышт йочадам мӱндыр савей калыклан
*б ужалат.
Тыге Господь каласен.
9 Тидым калык-влак коклаште увертарыза,
сарлан ямдылалтса, тале салтак-шамычым кынелтыза!
Тек нуно лектыт, тек сарзе-влак каят!
10 Шогавуйда гыч кердым,
сорлада гыч умдым таптен ыштыза.
Тек вийдыме каласа: ”Мый виян улам!”
11 Йыр улшо калык-влак, вашкыза да погыныза,
чыла велым толза!»
Тушко, Господь, тале сарзет-влакым наҥгай!
12 «Тек калык-влак тарванат
да Иосафат лапверыш волат.
Тушан Мый шинчам
да йыр улшо калык-влакым судитлаш тӱҥалам.
13 Сорла-влакым пашаш колтыза,
вет тӱредме жап шуын!
Кайыза, виноградым тошкыза,
вет тудым темдыме вер темын,
виноград вӱд тӱргоч йога.
Калык-влакын осал пашашт пеш кугу!»
14 Кугу тӱшка-влак, еҥ тӱшка-влак Суд лапверыште улыт!
Вет Господьын кечыже Суд лапвер деке чак лишемын!
15 Кече ден тылзе пычкемышалтыт,
шӱдыр-влакын чолгыжмышт ок кой.
16 Господь Сион гыч кӱдырта,
Иерусалим гыч шке йӱкшым пуа –
кава ден мланде чытырналтыт.
Но Господь шке калыкшылан аралтыш,
Израиль эрге-влаклан чоткыдо карман лиеш.
17 «Тунам пален налыда:
Мый тендан Господь Юмыда улам,
Мый Сионышто, шке святой курыкыштем, илем.
Иерусалим святой вер лиеш,
тушко йот тукым сарзе-влак тетла огыт пуро.
18 Тудо кечын тыге лиеш:
курыкла гыч виноград вӱд,
кӱкшакала гыч шӧр йогаш тӱҥалыт.
Иуда мландысе корем-влак вӱд дене темыт,
а Господьын пӧртшӧ гыч памаш лектеш
да Ситтим лапверым йӱкта.
19 Египет пустаҥеш,
Едом ир мландыш савырна,
вет нуно Иуда эрге-влакым шыгыремдылыныт,
нунын мландыштышт титакдыме вӱрым йоктареныт.
20 А Иуда мландыште курым-курымеш,
Иерусалимыште тукым гыч тукымыш илаш тӱҥалыт.
21 Калыкемын вӱржӧ верч Мый ӱчым эше шуктен омыл,
но тидым ыштыде ом кодо.
Господь Сионышто илаш тӱҥалеш!»
*а 3:2 Иосафат Иосафат лӱм ’Господь судитла’ манмым ончыкта.
*б 3:8 Савей калык – Аравийын кечывалвел ужашыштыже илыше калык, нуно торгаен иленыт.
Глава 3
