Выбрать язык
Книги Ветхого Завета
Книги Нового Завета
с русским текстом2 Ынде тылат мо лийшаш нерген чыным увертарем: Персийыште эше кум кугыжа лиеш, вара – нылымше, тудыжо молышт деч поянрак лиеш. Поянлык тудым вий-куатаным ышта, да тудо чылаштым Грек кугыжаныш ваштареш нӧлталеш.3 Тунам пеш чот виян кугыжа лектеш, тудо кугу кучемвий дене озаланаш да мом шонымыжым ышташ тӱҥалеш.4 Но кунам тудо лектеш, кугыжанышыже шалана да ныл ужашлан шелалтеш. Кугыжанышыже шке тукымжылан ок кусно да тудын годсо гай кучемвиян ок лий. Тудын кугыжанышыжым шупшын налыт да весе-влаклан пуат.
5 Кечывалвел кугыжат вийым пога, но сарзывуйжо-влак кокла гыч иктыже тудын деч виянрак лиеш, тудын кучемвийже куатым налеш.6 Икмыняр ий гыч кугыжа-влак келшаш тӱҥалыт. Ушемым пеҥгыдемдаш манын, кечывалвел кугыжан ӱдыржӧ йӱдвел кугыжалан марлан лектеш. Но кугыжан ӱдыр шке кидыштыже кучемвийым кучен ок керт, тудын тукымжат ок шуйно. Кугыжан ӱдыр, ужатен коштшыжо-влак, икшывыже да тудлан полшен шогышо пытарыме лийыт.7 Но тудын вожшо гыч иге лектеш да престолышкыжо шинчеш, тудо йӱдвел кугыжан сарзывийже ваштареш кая да тудын карманышкыже пура. Тудо нунын дене кредалаш тӱҥалеш да нуным сеҥа.8 Тудо эсогыл нунын юмыштым, велен ыштыме статуйыштым, ший да шӧртньӧ дене ыштыме шергакан ате-ӱзгарыштым руалтен налеш да Египетыш наҥгая. Тидын деч вара тудо йӱдвел кугыжам икмыняр ий ок тургыжландаре.9 Вара йӱдвел кугыжа кечывалвел кугыжаныш ӱмбаке керылтеш, но тудлан шке мландышкыже пӧртылаш логалеш.
10 Тудын эргыже-влак сарлан ямдылалтыт да кугу сарзывийым погат, нунын кокла гыч иктыже ташлыше вӱд семын ончыко лупшалтеш да кечывалвел кугыжан карманже дек шуэш.11 Тунам кечывалвел кугыжа уло шыдыж дене лектеш да йӱдвел кугыжа дене кредалеш. Тудыжо кугу сарзывийже дене лектеш, но кырен шалатыме лиеш.12 Кунам тиде сарзывий пытарыме лиеш, кечывалвел кугыжам кугешнымаш авалта. Тудо шуко тӱжем сарзым кырен шалата, но тиде сеҥымаш кужун ок шуйно.13 Йӱдвел кугыжа вес сарзывийым, ончычсо деч кугуракым, пога да икмыняр ий гыч шуко саргуралан кугу сарзывий дене толеш.
14 Тудо жапыште кечывалвел кугыжа ваштареш шукын шогалыт. Кончымаш шукталтше манын, тыйын калыкет кокла гычат вуянче-влак нӧлталтыт, но сеҥалтыт.15 Вара йӱдвел кугыжа толеш, чоткыдемдыме ола йыр мланде кӱкшака-влакым нӧлталеш да тудым сеҥен налеш. Кечывалвелын вийже тудын ваштареш шоген ок керт, эн сай сарзыже-влакынат куатышт ок сите.16 Сеҥен налаш толшо мом шона, тудым ышташ тӱҥалеш, нигӧ ваштарешыже шоген ок керт. Тудо Сӧрал Элышкат керылт пура да тудым пытара.17 Тудо пӱтынь кугыжанышын куатше дене сарыш лекташ да сеҥен налаш шонен пышта, но вара шке тушманже дене келшымаш ойпидышым ышта. Кечывалвел кугыжанышым пытараш манын, шке ӱдыржым тудын кугыжажлан марлан пуа, но шонымыжо ок шукталт, тиде тудлан пайдам ок кондо.18 Тунам тудо сер ден отролашке кая да шукыштым руалтен налеш, но ик сартӧра тудын сӱрзалыкшылан*а мучашым пышта – тудлан сӱрзалык денак вашешта.19 Тунам йӱдвел кугыжа шке мландысе карманже-влак деке кая, но шӱртнен камвозеш да уке лиеш.20 Тудын верышкыже весе шинчеш да чапле кугыжаныш мучко каяш йозак погышым колта. Тиде кугыжат, икмыняр жап эртымеке, пытарыме лиеш, но чылан ончылно огыл да кредалме годым огыл.
21 Тудын верышкыже чылалан ужмышудымо еҥ шинчеш, тудлан кугыжан чапшым огыт пу. Тудо вучыдымын толеш да кучемвийым чоялык дене налеш.22 Шотлен пытарыдыме сарзывий тудын ончылныжо пуйто ташлыше вӱд дене йоктарен наҥгайыме лиеш. Тиде сарзывий дене пырля ойпидышын онжат пуштмо лиеш.23 Ушем-влакым ыштымеке, йӱдвел кугыжа ондалкалаш тӱҥалеш, еҥже шагал гынат, нӧлталтеш да вий-куатым пога.24 Тыныс жапыште тудо поян кундемлашке керылт пура да мом ача-кочаж-влак ыштен огытыл, тугайым ышта. Агымым, поген налмым, тӱрлӧ поянлыкым тудо шке велныже улшо-шамыч коклаште пайла, карман-влак ӱмбакат керылташ шонен пышта. Но чыла тиде палемдыме жап марте гына шуйна.25 Вара вий-куатым пога, кугу сарзывийже дене кечывалвел кугыжа ваштареш лӱддымын кая. Кечывалвел кугыжат сарыш пеш кугу да тале сарзывий дене лектеш, но тушманын осал чоялыкшылан кӧра ваштарешыже шоген ок керт.26 Тудын ӱстелтӧрыштыжӧ кочшо-влак тудым пытараш тӧчат. Тудын сарзывийже ӱштын кудалтыме лиеш, сӧйыштӧ шукын вуйыштым пыштат.27 Кок кугыжа, шӱмыштышт осал чоялыкым кучен, ик ӱстелтӧрыштӧ шинчаш да икте-весыштлан шоякым ойлаш тӱҥалыт, но шонымышт ок шукталт, вет мучаш палемдыме жапыште толеш.28 Йӱдвел кугыжа шке мландышкыже кугу поянлык дене пӧртылеш да святой ойпидышлан эҥгекым ышташ шонен пышта. Мом шонымыжым тудо шукта, вара шке мландышкыже пӧртылеш.29 Палемдыме жапыште тудо адакат кечывалвелыш кая, но тиде гана ончычсо семын ок лий.30 Тудын ӱмбак киттей-влакын корабльышт толыт, да тудо лӱдмыж дене мӧҥгеш кая, шке шыдыжым святой ойпидыш ваштареш виктара да тудын дене мом шонымыжым шукта. Пӧртылмеке, святой ойпидыш деч кораҥше-влак деке поро кумылан лиеш.31 Тудын колтымо сарзыже-влак толыт да святой вер ден карманым шакшылат, кажне кечын кондымо надырым чарат да пустаҥдыше йырныкым шогалтат.32 Ойпидышым пудыртышо-влакым тудо ондала да осал корныш савыра, но шке Юмыштым шотлен илыше-влак виян лийыт да тудын ваштареш шогаш тӱҥалыт.33 Калык кокла гыч ушан-влак шуко еҥлан умылаш полшат, но нуно икмыняр жап керде да тул дене, плен да агымаш дене орландарыме лийыт.34 Орланымышт годым нунылан изи полыш лиеш, да нунын дек шукын ушнат, но лӱмжылан гына.35 Пытартыш жап шумо деч ончыч еҥ-шамыч тергыме, эрыктыме да ошемдыме лийышт манын, ушан-влак кокла гыч южышт орлык гоч эртат, вет палемдыме саман толмо марте эше жап уло.
36 Саде кугыжа мом шона, тудым ышташ тӱҥалеш. Кугешнымыж дене тудо шкенжым чыла юмо деч кӱшкӧ нӧлталеш, юмо-влакын Юмышт нерген мыскылыше шомакым ойла. Юмын шке шыдыжым тӱрыснек йоктарымешкыже, тудын чылажат ушнен толеш, вет мом палемдыме, тудо шукталтеш.37 Ача-кочаж-влакын юмыштым, тыгак ӱдырамаш-шамычын шотлымо юмыштым – нимогай юмым – шотлаш ок тӱҥал, но шкенжым чылашт деч кӱшкӧ нӧлталеш.38 Нунын олмеш тудо карман-влакын юмыштлан чапым пуа. Ача-кочаж-влаклан палыдыме тиде юмым тудо шӧртньӧ-ший дене, шергакан кӱ да шерге пӧлек дене жаплаш тӱҥалеш.39 Тиде йот юмылан кумалын, тудо эн чоткыдо карманже-влакым пеҥгыдемда. Кӧмыт тудым шотлат, кугу чапыште лийыт – нуным тудо шуко еҥ дене вуйлаташ шогалта, пӧлек шотеш нунылан мландым пуэда.40 Пытартыш жапыште тудын ӱмбаке сар дене кечывалвел кугыжа толеш. Но йӱдвел кугыжа тудын ӱмбаке орва да имнешке-влак, шуко корабль дене тӱтан семын кержалтеш. Тудо шуко элышке керылт пура да нунын гоч вӱд ташлем семын эртен кая.41 Сӧрал Элышкат керылт пура, да шукын вуйыштым пыштат. Тудын кидше деч лач Едом, Моав да Аммон эрге-влакын кугу ужашышт утаралт кодыт.42 Тудо шке кидшым моло эл декат шуялта, Египет мландат утаралтын ок код.43 Тудо Египетын ший-шӧртньыжым, тӱрлӧ поянлыкшым руалтен налеш. Ливий ден Эфиопийыште илыше-влак тудын кид йымалныже лийыт.44 Но эрвел ден йӱдвел гыч увер-влак тудым тургыжландарат, да тудо кугу шыде дене шуко еҥым пытараш да кырен шалаташ лектеш.45 Теҥыз ден сӧрал святой курык коклаште кугыжан омашыже-влакым шогалта. Но тудлан мучаш толеш, нигӧ тудлан ок полшо.
*а 11:18 Сӱрзалык – наглость, дерзость.
Глава 11