Выбрать язык
Книги Ветхого Завета
Книги Нового Завета
с русским текстом1 Халдей кугыжанышын вуйлатышыжлан шогалтыме Дарийын икымше ий кугыжаланымыж годым – тудо Мидий тукым гыч Ахашверошын эргыже лийын –2 тудын икымше ий вуйлатымыж годым мый, Даниил, Возымашыште Господьын пророк Иеремийлан каласыме шомакше гыч пален налынам: Иерусалимын пустаҥмашыже шымле ий шуйна.3 Тунам мый, чоштыра вургемым чиен, ӱмбакем ломыжым шавен да пӱтым кучен, Господь Юмо деке чурием савыренам, Тудым сӧрвален кумалынам.
4 Мый Господь Юмемлан кумалынам, сулык-влакым почын ойленам: «О Господь, лӱдмашым лукшо кугу Юмо! Тый шке ойпидышетлан ӱшанле кодат, Тыйым йӧратыше да кӱштымашет-влакым шуктышо-шамычлан шке порылыкетым ончыктет.5 А ме сулыкыш пуренна, титакан лийынна, осал пашам ыштен, ваштарешет шогалынна. Ме Тыйын кӱштымаш ден пунчалет-влак деч кораҥынна.6 Тыйын лӱмет дене мемнан кугыжана, онна, ача-кочана-влаклан да элысе уло калыклан ойлышо пророк тарзет-влакым колыштын огынал.7 Тый, Господь, чын улат, а мемнан чурийнам кызыт намыс леведын – Иуда калыкым, Иерусалимыште илыше-влакым да уло Израильым, кӧмыт лишне да умбалне, чыла элыште, илат. Тылат ме ӱшанле огынал, сандене Тый мемнам тушко поктен колтенат.8 О Господь! Ме Тыйын ончылнет сулыкыш пуренна, сандене мемнан чурийнам, тыгак кугыжа ден онна, ача-кочана-влакын чурийыштым намыс леведын.9 Но Господь, мемнан Юмына, мемнам серлага да сулыкнам кудалта, кеч ме Тудын ваштареш шогалынна,10 Господь Юмынам колыштын огынал, шке пророк тарзыж-влак гоч мыланна пуымо законжо-шамычым шуктен шоген огынал.11 Пӱтынь Израиль Тыйын законетым пудыртен, тупынь савырнен да Тыйым колыштын огыл. Тидлан кӧра Юмын Моисей тарзыжын законыштыжо возымо, товатлен сӧрымӧ каргымаш-влак мемнан дене шукталтыныт, вет ме Тыйын ончылнет сулыкыш пуренна.12 Мемнан да вуйлатыше судьяна-влак ваштареш каласыме шомакшым Тудо шуктен: мемнан ӱмбаке кугу ойгым колтен – мо Иерусалим дене лийын, тыгайже кава йымалне нигунам лийын огыл.13 Моисейын законыштыжо возымо чыла туткар мемнан ӱмбаке толын. Но ме Господь Юмына деч сӧрвален йодын огынал, сулыкна деч кораҥын огынал да Тыйын чынлыкетым умылен огынал.14 Господь тиде туткарым мыланна колташ ямдылалтын да шке жапыштыже тидым шуктен. Вет Господь Юмына чыла шке пашаштыже чын улеш, а ме Тудым колыштын огынал.
15 О Господь, мемнан Юмына! Тый шке калыкетым Египет мланде гыч виян кидет дене луктынат да Шкаланет лӱмым ыштенат – тудо таче кечынат чапыште, а ме сулыкыш пуренна, осалым ыштенна.16 Чын ыштыше Господь, Тыйым йодам: тек сырымет да шыдет Иерусалим олат деч, святой курыкет деч кораҥыт. Мемнан сулыкна ден ача-кочанан титакыштлан кӧра йыр улшо калык-влак Иерусалимым да Тыйын калыкетым мыскылен илат.17 Кол кызыт, Юмына, шке тарзетын кумалмыжым да йодмыжым! Шкаланет кӧра, Господь, пустаҥдыме святой веретым чуриетын волгыдыж дене волгалтаре.18 Юмем, пылышетым савыре да кол, шинчатым поч да ончал, кузе Тыйын лӱмет дене лӱмдымӧ олам пустаҥдыме. Шке чынлыкланна огыл, а Тыйын кугу порылыкетлан инанен, ме Тыйым йодына.19 Господь, кол! Господь, сулыкнам кудалте! Господь, колышт да йодмынам шукто! Шкаланет кӧра, Юмем, ит шуйкале, вет тиде Тыйын олат да Тыйын калыкет улыт, нуным Тыйын лӱмет дене лӱмденыт».
20 Тыге мый кумалынам, шкемын да Израиль калыкемын сулыкшым почын ойленам, Господь Юмемым Тудын святой курыкшо верч сӧрваленам.21 Кунам мый эше кумалынам, ончыч кончымашыште ужмо саде еҥ, Гавриил, мый декем писын чоҥештен толын. Тиде кас надырым кондымо жап лийын.22 Мыланем тудо умылтарен каласен: «Даниил, мый тыйым туныкташ толынам.23 Кумалаш тӱҥалмет годымак шомак колтымо лийын. Тудым мый тылат увертараш толынам, вет тый кугун аклыме улат. Тыгеракын, тиде шомакым колышт, кончымашым умыло.24 Тыйын калыкет ден святой олатлан шымле гана шым ийым вучаш палемдыме. Тунам осал паша ден сулыклан мучаш толеш, титак сулен налме лиеш, тыгак чын ыштымаш курымешлан чоткыдемдыме, кончымаш ден пророк шомак печать дене пеҥгыдемдыме лийыт, да Святой деч святой вер шӱрен палемдыме лиеш.25 Пале да умыло: Иерусалимым угыч нӧлталме нерген кӱштымаш лекме жап гыч Шӱрен палемдыме Онын толмыжо марте шым гана шым ий да кудло кок гана шым ий эртат. Урем ден пырдыж-влак чоҥымо лийыт, но тиде неле жап лиеш.26 Кудло кок гана шым ий эртымеке, Шӱрен палемдыме пушташ пуымо лиеш, да Тудо ок лий. У вуйлатыше толеш, да тудын калыкше ола ден святой верым шалата. Тудлан мучаш вӱдташлем семын толеш, да Юмын палемдыме туткар-влак сар пытымеш шуйнат.27 У вуйлатыше шуко калык дене ойпидышым шым ийлан пеҥгыдемда, а шым ийын пелыже эртымеке, надыр ден пӧлек кондымашлан мучашым ышта. Святой вер ӱмбалне пустаҥдыше йырнык*а лиеш, тидын деч вара пустаҥдыше ӱмбак ончылгоч палемдыме мучаш толеш».
*а 9:27 Пустаҥдыше йырнык – мерзость запустения.
Глава 9