Выбрать язык
Книги Ветхого Завета
Книги Нового Завета
с русским текстом1 Дарий пӱтынь кугыжанышыжын кундемлаштыже шӱдӧ коло сатрапым шогалташ шонен пыштен,2 а нуным вуйлаташ – кум оным. Тиде кумыт кокла гыч иктыже Даниил лийын. Кугыжам тургыжландараш огыл манын, сатрап-влак шке пашашт нерген нине кум еҥлан отчётым пуэныт.3 Нине он ден сатрап коклаште Даниил поснак ойыртемалтын, вет тудын кӧргыштыжӧ таҥастараш лийдыме чон-шӱлыш лийын, да кугыжа тудым уло кугыжанышын вуйлатышыжлан шогалташ шонен.4 Тунам он ден сатрап-влак, Даниилым кугыжаныш дене вуйлатыме пашаште титаклаш манын, амалым кычалаш тӱҥалыныт. Но нуно нимом муын огытыл, вет Даниил чыла шотыштат ӱшанле лийын, тудын нимогай титакше але ситыдымашыже лийын огыл.5 Нине еҥ-влак каласеныт: «Даниил ваштареш ме нимом огына му. Лач тудын шке Юмыжлан ӱшанымаштыже ала иктаж-мом муын кертына».
6 Тунам нине он ден сатрап-влак кугыжа деке толыныт да каласеныт: «Дарий кугыжа, эсен лий!7 Кугыжанышысе вуйлатыше, кундемвуй, сатрап, каҥашпуышо да тӧра-влак шке коклаштышт кутырен келшеныт: тек кугыжа деч пунчал лиеш, кӱштымаш лектеш – кӧ кумло кече жапыште тый дечет молым, юмым але айдемым, сӧрвала, тыгай еҥым лев-влакым петырыме вынемыш кудалташ.8 Тыгеракын, кугыжа, тиде пунчалым пеҥгыдемде, кӱштымашеш кидпалетым пыште – тек тудо мидян ден перс закон гай пеҥгыде, вашталтен кертдыме лиеш».9 Дарий кугыжа тиде кӱштымашым пеҥгыдемден.
10 Тыгай кӱштымаш лекме нерген пален налмеке, Даниил шке мӧҥгыжӧ каен. Тушто кӱшыл пӧлемысе окна-влак Иерусалим велыш онченыт. Тудо ончычсо семынак кечылан кум гана пулвуйыш сукалтен шинчын да шке Юмыжлан кумалын, Тудым чапландарен.11 А Даниил ваштареш кутырен келшыше-влак тушко погынен толыныт да тудым Юмо деч порылыкым йодын кумалшым ужыныт.12 Нуно кугыжа деке каеныт да каласеныт: «Тый огыл мо кӱштымашым луктынат: кӧ кумло кече жапыште тый дечет молым – юмым але айдемым – сӧрвала гын, тыгай еҥым лев-влак шинчыме вынемыш кудалтыман?» Кугыжа вашештен: «Тиде шомак мидян ден перс закон гаяк пеҥгыде, вашталташ лийдыме».13 Тунам нуно кугыжалан каласеныт: «Даниил, Иуда мланде гыч пленыш кондымо-влак кокла гыч иктыже, тыйымат, кугыжа, тыйын кидет дене пеҥгыдемдыме кӱштымашетымат ок шотло – тудо кечылан кум гана шке Юмыжым сӧрвала».14 Тидым колын, кугыжа чот ойгаҥын. Тудо Даниилым утараш шонен пыштен, тидым ышташ йӧным кече шичмешке кычалын.15 Но саде еҥ-влак кугыжа деке толыныт да каласеныт: «Шарналте, кугыжа – мидян ден перс-влакын законышт почеш кугыжан кидше дене пеҥгыдемдыме нимогай кӱштымашым але пунчалым вашталташ ок лий».16 Тунам кугыжа Даниилым кондаш да лев-влакым петырыме вынемыш кудалташ кӱштен. Тудо Данииллан каласен: «Тек тыйын Юмет, Кӧлан ӱшанлын кумалат, тыйым утара!»17 Вара кӱм конденыт да тудын дене вынем рожым петыреныт. Даниил шотышто лукмо пунчалым ынышт пудырто манын, кугыжа шке шергашыж дене да тӧраже-влакын шергашышт дене тиде кӱ ӱмбаке печатьым шынден.18 Тидын деч вара кугыжа шке полатышкыже каен. Жапым веселан эртараш тудын кумылжо лийын огыл, кочмыжат шуын огыл. Тудо малаш возын, но омо толын огыл.
19 Эрдене, волгыжмеке, кугыжа кынелын да содор лев-влакым петырыме вынем деке каен.20 Вынем дек лишеммеке, тудо Данииллан ойган йӱкын кычкыралын: «Даниил, илыше Юмын тарзыже! Юмет, Кӧлан тый ӱшанлын кумалат, тыйым лев-влак деч утарен кертын мо?»21 Даниил кугыжалан вашештен: «Кугыжа, эсен лий!22 Мыйын Юмем шке Суксыжым колтен да лев-влакын умшаштым петырен. Нуно мыйым тӱкен огытыл, вет мый Юмо ончылно ару улам, да тыйын ончылнетат, кугыжа, мый нимогай осалым ыштен омыл».23 Кугыжа пеш чот куанен да тудым вынем гыч лукташ кӱштен. Даниилым вынем гыч луктыныт да ужыныт: тудын дене нимогай эҥгек лийын огыл, вет тудо шке Юмыжлан ӱшанен.24 Кугыжан кӱштымыж почеш Даниилым титаклыше еҥ-шамычым конденыт да лев-влакым петырыме вынемыш кудалтеныт – нуным шкеныштым, йочаштым да ватыштым. Вынем пундашыш шумышт деч ончычак лев-влак ӱмбакышт кержалтыныт да луштге кочкыныт.
25 Тидын деч вара Дарий кугыжа мландымбалне илыше чыла калык, тукым да йылме гыч улшо еҥ-влаклан возен: «Тыланда тыныс ден эсенлык лийже!26 Теве мыйын кӱштымашем: тек мыйын кугыжанышемын чыла кундемыштыже Даниилын Юмыжо ончылно лӱдын да чытырен илат. Вет Тудо – илыше Юмо, курымеш улшо. Тудын кугыжа кучемвийжым шалаташ ок лий, Тудын озаланымыжлан мучаш уке.27 Тудо утара, эрыкым конда, каваште да мландымбалне ӧрыктарыше паша ден палдарыше пале-влакым ышта. Тудо Даниилым лев-шамычын умшашт деч утарен».28 Дарий кугыжаланыме жапыште, тыгак перс Кирын кугыжаланымыж годым Даниил сайын илен, тудын чылажат вораҥын толын.
Глава 6