Выбрать язык
Книги Ветхого Завета
Книги Нового Завета
с русским текстом1 Мый декем Израильын икмыняр кугуракше толын да ончылнем шинчын.2 Мыланем Господьын шомакше лийын:
3 «Айдеме эрге! Нине еҥ-шамыч шӱмыштышт шояк юмо-влаклан верым пуэныт, сулыкыш пуртышо шӱртньымӧ кӱм шке ончылнышт шогалтеныт! А Мый нунылан эше вашмутым пуышаш улам?!4 Сандене нунылан каласе: ”Тыге Господь Юмо ойла: Израиль калык кокла гыч иктаж-кӧ шӱмыштыжӧ шояк юмылан верым пуа да сулыкыш пуртышо шӱртньымӧ кӱм шке ончылныжо шогалта, а вара пророк деке толеш – Мый, Господь, тудлан шуко шояк юмылан кумалмыжлан сулен налме вашмутым пуэм.5 Тек Израиль калык умыла: шке шояк юмыштлан кӧра нуно чыланат Мыланем йот лийыныт!”
6 Сандене Израиль калыклан каласе: ”Господь Юмо тыге ойла: шояк юмыда дек тупынь савырныза, чыла йырныкда деч кораҥза!7 Вет Израиль калык кокла гыч але нунын коклаште илыше йот еҥ кокла гыч иктаж-кӧ Мый дечем кораҥеш але шӱмыштыжӧ шояк юмылан верым пуа, сулыкыш пуртышо шӱртньымӧ кӱм шке ончыланже шогалта, а вара пророк гоч Мый дечем каҥашым йодаш толеш гын, тунам Мый, Господь, тудлан вашмутым Шке пуэм.8 Мый тиде еҥ ваштареш чурием савырем – тудо палдарыше пале да мыскылтыш лиеш. Мый тудым шке калыкем кокла гыч кораҥдем, тунам те пален налыда: Мый Господь улам.
9 А пророк тунам, алгаштаралтын, пророк шомакым каласа гын, тиде Мый, Господь, тудым ондалчыкыш пуртенам. Мый тудын ӱмбак шке кидем нӧлталам да тудым Израиль калыкем кокла гыч пытарем.10 Нуно коктынат мутым кучаш тӱҥалыт: йодаш толшо еҥынат, пророкынат титакышт икгай лиеш –11 тек Израиль калык ончыкыжым Мый дечем ок кораҥ, тӱрлӧ осал паша дене шкенжым ок шакшыле. Тунам нуно Мыйын калыкем, а Мый нунын Юмышт лиям”, – ойла Господь Юмо».
12 Мыланем Господьын шомакше лийын:13 «Айдеме эрге! Иктаж-могай мланде, Мый дечем кораҥын, ончылнем сулыкыш пура гын, Мый тудын ӱмбак кидем нӧлталам, тудым кинде деч посна кодем, тушко шужымашым колтем, айдеме ден вольыкым пытарем.14 Тушто Ной, Даниил да Иов лийыт гын, нине кумыт чын ыштымышт дене шке чоныштым веле утарен кодат ыле, – ойла Господь Юмо. –15 Але тиде мландым илыше-влак деч посна кодаш манын, Мый тушко шучко янлык-влакым колтем ыле гын, да нунылан кӧра тудо пуста да еҥлан кошташ лӱдыкшӧ мландыш савырна ыле, –16 Шкем дене товатлем, ойла Господь Юмо, – тушто нине кум еҥ лийыт гын, нуно шке эрге-ӱдырыштым утарен огыт керт ыле. Нуно шкешт гына утаралтыт, а мланде пустаҥеш ыле.17 Але тиде мланде ӱмбаке Мый кердым колтем, ”Керде, мланде мучко кай!” манын каласем да тушто чыла еҥ ден вольыкым пытарем ыле гын, –18 Шкем дене товатлем, ойла Господь Юмо, – тушто нине кум еҥ лийыт гын, нуно эрге-ӱдырыштым огыт утаре, шкешт гына утаралтыт ыле.19 Але тиде мландыш Мый шучко черым колтем, вӱрым йоктарен, шыдем опталам, тушто еҥ-влак ден вольыкым пытарем ыле гын, –20 Шкем дене товатлем, ойла Господь Юмо, – тушто Ной, Даниил да Иов лийыт гын, нуно шке эрге-ӱдырыштым утарен огыт керт ыле. Чын ыштымышт дене нуно шке чоныштым веле утарен кодат ыле.
21 Тыге ойла Господь Юмо: Эшеат шучко лиеш, кунам Мый Иерусалим ӱмбаке нине ныл орлыкым – кердым, шужымашым, шучко янлыкым да осал черым – колтем, тушто еҥ ден вольыкым пытарем!22 Но тунамат тушто утаралт кодшо, тушечын лукмо эрге-ӱдыр-влак лийыт. Нуно тендан деке толыт, да те нунын шкеныштым кузе кучымыштым, мом ыштымыштым ужыда. Тунам те Мыйын Иерусалимлан колтымо ойгылан, тудлан чыла мом колтымемлан ойганымыдам чарнеда.23 Нунын мом ыштымыштым, пашаштым ужын, те лыпланеда, вет те умыледа: Иерусалимлан нине ойгым Мый арам огыл колтенам, – ойла Господь Юмо».
Глава 14