Выбрать язык
Книги Ветхого Завета
Книги Нового Завета
с русским текстом1 Кумлымшо ийын нылымше тылзыжын визымше кечынже, кунам мый пленыш налме еҥ-влак коклаште Ховар эҥер воктене лийынам, кава почылтын, да Юмо мылам кончымаш-влакым ончыктен.
2 Тылзын визымше кечынже – тиде Иоаким кугыжан визымше ий пленыште улмыж годым лийын –3 халдей-влакын мландыштышт, Ховар эҥер воктене иерей Иезекиильлан, Вузий эргылан, Господь деч шомак лийын. Тушто тудын ӱмбалне Господьын кидше лийын.
4 Мый ужынам: теве йӱдвел гыч тӱтан мардеж лишемеш, тулйолкыным лукшо пеш кугу пыл толеш. Йырже чылажат йолгыжеш,5 а покшелныже – пуйто йылгыжше той, тушто, тул кӧргыштӧ – чонанла койшо ныл ӱжака. Сынышт дене нуно айдемыла койыныт,6 но кажныжын ныл чурийже да ныл шулдыржо лийыныт.7 Йолвургышт тура, а йолгопашт презе кӱч гай койыныт да ягылтыме той семын йылгыжыныт. [Шулдырышт лывырге лийын.]8 Шулдырышт йымалне ныл могырымат айдеме кид-влак лийыныт.9 Нылыньыштынат чурий ден шулдырышт лийыныт, шулдырышт икте-весыштын деке тӱкненыт. Кайымышт годым нунылан савырнаш кӱлын огыл, вуйым нигуш савырыде, нуно ончыко пырля каеныт.10 Чурийышт тыгай: кажныжын айдеме чурийже лийын, пурла могырым кажныжын – лев чурий, шола могырым – ӱшкыж чурий, тыгак кажныжын арыслангайык чурийже лийын.11 Тыгай лийын нунын чурийышт. Кажныже кӱшкӧ нӧлталме кок шулдыржо дене весын шулдыржо деке тӱкнен, а вес кок шулдыржо дене капшым петырен.12 Кажныже ончыко, кушко шӱлыш наҥгаен, тушко каен. Кайымышт годым нуно савырнен огытыл.13 Нине чонан ӱжака-влакын сынышт йӱлышӧ тулшол гай, факел гай койын. Нунын коклаште йолгыжшо тул коштын, тушечын волгенче лектеден.14 Кузе волгенче волгалтеш, туге нине ӱжака-влак ончыко-шеҥгеке писын коштыныт.
15 Мый чонан ӱжака-влак ӱмбак онченам да мландымбалне, кажне ӱжака воктене, ныл чурийышт ончылно, ик орава дене ужынам.16 Орава-влакын тӱжвал тӱсышт да чоҥалтмышт тыгай: нуно топаз семын йолгалтыныт да нылытынат икгай койыныт, пуйто ик орава кӧргыштӧ вес орава лийын.17 Кайымышт годым нуно, савырныде, кеч-кудо ныл велыш каен кертыныт.18 А нунын тогымышт*б кӱкшӧ да шучко лийын. Чыла ныл тогымым шинча-влак леведыныт.19 Кунам чонан ӱжака-шамыч каеныт, воктенышт орава-влакат тарванен каеныт. А кунам нуно мландымбач нӧлталтыныт, орава-влакат нӧлталтыныт.20 Кушко шӱлыш наҥгаен, ӱжака-влак тушко каеныт. Кеч-кушко шӱлыш наҥгаен, орава-влакат нунын дене пырля нӧлталтыныт, вет нине ораваште ӱжака-шамычын шӱлышышт лийын.21 Кунам ӱжака-влак каеныт, нунат каеныт, кунам ӱжака-влак шогалыныт, нунат шогалыныт. А кунам ӱжака-влак мландымбач нӧлталтыныт, нунын дене пырля орава-шамычат нӧлталтыныт, вет нине ораваште ӱжака-влакын шӱлышышт лийын.
22 Чонан ӱжака-влакын вуй ӱмбалнышт ала-мо тувраш гай койшо лийын. Тудо хрусталь семын чолгыжын.23 Тувраш йымалне нунын шулдырышт икте-весышт деке шаралтыме лийын. Вес кок шулдырышт дене нуно капыштым петыреныт.24 Кунам нуно каеныт, мый шулдыр-влакын йӱкыштым колынам. Тудо кугу вӱдын лӱшкымыж гай, Чылакертшын йӱкшӧ гай, сарзе-влакын йӱк-йӱанышт гай шоктен. Чарнен шогалмышт годым нуно шулдырыштым волтен колтеныт.25 Вуй ӱмбалнышт улшо тувраш гыч йӱк шоктен. Чарнен шогалмекышт, нуно шулдырыштым волтен колтеныт.26 Тушто, вуйышт ӱмбалысе тувраш деч кӱшнӧ, сапфир тӱсан престол гай койын. А кӱшнӧ улшо тиде престолышто айдеме гай койшо шинчен.27 Кыдалже деч кӱшнӧ мый йылгыжше тойла койшо тулым ужынам, кыдал деч ӱлнат пуйто тулым ужынам. Йырже чылажат йолгыжын.28 Кузе йӱр годым пыл коклаште шонанпыл коеш, йырже туге йолгыжын.
*а 1:1 Ӱжака – тыште: образ, облик.
*б 1:18 Тогым – обод (ораван).
Глава 1