Выбрать язык
Книги Ветхого Завета
Книги Нового Завета
с русским текстом1 Кугыжалан шогалмыж годым Седекий коло ик ияш лийын да Иерусалимыште латик ий вуйлатен. Аважын лӱмжӧ Хамуталь, тудо Ливна гыч Иеремийын ӱдыржӧ лийын.2 Иоаким семынак Седекий Господь ончылно шуко осал пашам ыштен.3 Иерусалим ден Иудалан Господьын шыдыже пеш кугу лийын, сандене Тудо нуным шке чурийже деч кораҥден. Вара Седекий Вавилон кугыжа ваштареш шогалын.
4 Седекийын кандаш ий, индеш тылзе да индеш кече вуйлатымекыже, Вавилон кугыжа Навуходоносор уло сарзывийже дене Иерусалим деке толын. Нуно олам авырен налыныт, йырже мланде кӱкшакам нӧлталыныт.5 Седекий кугыжан латикымше ий кугыжаланымыж марте ола авырен шогымо лийын.6 Нылымше тылзын индешымше кечынже олаште пеш кугу шужымаш озаланен, калыкын кочкышыжо пытен.7 Тунам ола пырдыжым шӱтеныт, да кугыжан садвечыж воктенысе кок пырдыж кокласе капка гыч йӱдым чыла сарзе-влак ола гыч лектыныт. Халдей-влак ола йыр шогеныт гынат, нуно тӧрвер могырыш куржыныт.8 Халдей сарзе-влак Седекий кугыжа почеш каеныт да Иерихон тӧрверыште поктен шуыныт. Тудын сарзыже-шамыч куржын пытеныт,9 а кугыжам руалтен кученыт да Вавилон кугыжа дек Емаф мландысе Ривлаш наҥгаеныт. Тушто Навуходоносор тудлан судым ыштен.10 Седекийын шинча ончылныжо Вавилон кугыжа тудын эргыже-влакым шӱшкыл пуштын, тыгак Ривлаште Иудан чыла онжым пытарен.11 Тудо Седекийын шинчажым шӱтен да тудым той шинчыр дене шинчырлен. Тидын деч вара Вавилон кугыжа Седекийым Вавилоныш наҥгаен да колымешкыже казаматыште кучен.
12 Вавилон кугыжа Навуходоносорын латиндешымше ий вуйлатымыж годым визымше тылзын луымшо кечынже Иерусалимыш Вавилон кугыжан Навузардан тарзыже, капорол тӧра, толын.13 Тудо Господьын пӧртшым, кугыжан пӧртым, Иерусалимысе пӧрт-влакым – чыла кугу пӧртым – тул дене йӱлалтен.14 Капорол тӧра пелен улшо халдей сарзе-влак Иерусалим йыр улшо пырдыжым шалатеныт.15 Йорло-шамычым, олаште кодшо моло калыкым, Вавилон кугыжа могырыш лупшалтше еҥ-влакым да кодшо кидмастар-шамычым капорол тӧра Навузардан пленыш наҥгаен.16 Лач незер калык гыч икмыняр еҥым тудо виноград аҥа ден пасулаште пашам ышташ коден.17 Господьын пӧртшын той колонно ден орваже-влакым, «теҥыз» манме кугу той чанжым халдей-шамыч шалатеныт да чыла тойым Вавилоныш наҥгаеныт.18 Тыгак нуно кӱмыж, кольмо, вашкӱзӧ, корка, изи ате-влакым да храмыште служитлыме годым кучылтмо чыла той ӱзгарым налыныт.19 Капорол тӧра эше шӧртньӧ ден ший гыч ыштыме ате, тулшол ате, кӱмыж, под, светильник, чаше да корка-влакым наҥгаен.20 Соломон кугыжан Господьын пӧртшылан ыштыме кок колонно, ик той «теҥыз» да тудым кучен шогышо латкок той ӱшкыж деч той пеш чот шуко лийын, тудын нелытшым висенат кертын огытыл.21 Кажне колоннын кӱкшытшӧ – латкандаш кынергут, а йыргешке кутышыжым висаш гын, латкок кынергут лийын. Покшел кӧргыжӧ яра, а пырдыжше ныл парня кӱжгытан улмаш.22 Тудын ӱмбалныже вич кынергут кӱкшытан той колонно вуй верланен, тудын йыр сетке да гранат саска-влак тыгак той дене ыштыме лийыныт. Вес колонныжат тыгаяк, гранат саскан, улмаш.23 Ныл могырым гранат саска индешле кудыт лийын, сетке йырым-йыр – чылаже шӱдӧ.
24 Капорол тӧра тыгак кугу иерей Сераийым, тудын деч вара шогышо иерей Софонийым да кум капка оролым пленыш наҥгаен.25 Ола гыч тудо тыгак сарзе-влак дене вуйлатен шогышо ик евнухым, кугыжан эн лишыл шым еҥжым, сарзывийын тӱҥ возкалышыжым – тудо элысе пӧръеҥ-влакым сарзе радамыш возен – да олаште лийше лӱмлӧ кудло еҥым налын.26 Капорол тӧра Навузардан нуным Вавилон кугыжа деке Ривлаш наҥгаен.27 Емаф мландысе Ривлаште Вавилон кугыжа нуным казнитлен пуштын. Тыге Иуда тукым еҥ-влак шке мландышт гыч наҥгайыме лийыныт.
28 Теве тынар еҥым Навуходоносор пленыш наҥгаен: шымше ий вуйлатымыж годым – Иуда тукымысо кум тӱжем коло кум эргым,29 латкандашымше ий вуйлатымыж годым – Иерусалим гыч кандашшӱдӧ кумло кок еҥым.30 А Навуходоносор кугыжан коло кумшо ий вуйлатымыж годым капорол тӧра Навузардан Иуда тукымысо шымшӱдӧ нылле вич эргым наҥгаен. Чылаже ныл тӱжем кудшӱдӧ еҥ наҥгайыме лийын.
31 Иуда кугыжа Иехонийын кумло шымше ий пленыште улмыж годым, латкокымшо тылзын коло визымше кечынже, Евилмеродах – тиде ийын тудо Вавилонын кугыжажлан шогалын улмаш – Иуда кугыжа Иехоний деке поро лийын да тудым казамат гыч луктын.32 Тудын дене Вавилон кугыжа порын кутырен да тудым Вавилонышто улшо моло кугыжа деч кӱшкӧ шынден.33 Иехоний казаматыште чийыме вургемжым вашталтен. Тидын деч вара тудо эре кугыжан ӱстелтӧрыштӧ кочкын.34 Тудлан мо кӱлешым кугыжа деч кажне кечын пуэн шогеныт, тыге колымо кечыж марте лийын.
Глава 52