Выбрать язык
Книги Ветхого Завета
Книги Нового Завета
с русским текстом1 Теве Вавилон, халдей-влакын мландышт, нерген Господьын пророк Иеремий гоч каласыме шомакше:
2 «Увертарыза калык-влаклан, каласыза,
тистым нӧлталза да увертарыза,
ида шылте, ойлыза:
”Вавилоным сеҥен налме,
Вил намысыш пурен,
Меродахым шалатыме –
Вавилонын шке ыштыме юмышт намысыш пуреныт,
шояк юмышт шалатыме улыт”.
3 Вет йӱдвечын тудын ӱмбак калык толеш,
Вавилоным тудо ир мландыш савыра.
Нигӧ тушто илаш ок тӱҥал:
айдемат, вольыкат тушечын каят.
4 Тудо кечылаште, тудо жапыште, – ойла Господь, –
Израильын эргыже-влак Иуда эрге-влак дене пырля толыт,
шке Господь Юмыштым шортын-шортын кычалаш тӱҥалыт.
5 Нуно Сионыш каяш корным йодыт,
тудын велыш чурийыштым савырат да каласат:
”Каена, Господь дене ушнена –
мондаш лийдыме курымаш ойпидышым ыштена”.
6 Йомшо шорык гай лийын Мыйын калыкем.
Кӱтӱчышт-влак нуным чын корно гыч кораҥденыт,
курыклашке поктен колтеныт.
Перныл коштыныт нуно курык ден чоҥгаталаште,
шке мӧҥгыштым монденыт.
7 Кажне вашлийше нуным пӧжген,
тушманышт-влак ойленыт: ”Уке мемнан титакна,
вет нуно Господь ончылно сулыкыш пуреныт,
чынлыкын илыме верже ончылно,
ача-кочаштын инанен илыме Господьышт ончылно
сулыкым ыштеныт!”
8 Куржса Вавилон гыч,
кайыза халдей-шамычын мландышт гыч,
шорык кӱтӱ ончылно кайыше казатага-влак гай лийза!
9 Вет Вавилон ваштареш Мый йӱдвел мланде гыч
кугу калык-влак тӱшкам кынелтен кондем.
Нуно рат дене лектын шогалыт да тудым сеҥен налыт.
Нунын пикшышт тале сарзын пикшыж гай,
яра кид дене нуно мӧҥгеш огыт пӧртыл.
10 Халдей мландым нуно руалтен налыт,
агаш толшо-влак мом шонымыштым чыла наҥгаят, – ойла Господь.
11 Мыйын калык ден мландем агыше-влак,
те куаненда, йывыртенда,
олыкыш колтымо туна семын куанен тӧрштылында,
ожо семын рокменда.*а
12 Но пеш чот вожылеш тендан Вавилон авада,
тендам шочыктышо йошкарга.
Калык-влак коклаште тудо эн изи,
кукшо ир мланде, яра ошманур гай лиеш.
13 Господьын шыдыж деч тудо
илыше-влак деч посна кодеш, пӱтынек пустаҥеш.
Кӧ воктечше эртен кая, кажныже лӱдеш,
сусырлажым ужын, ӧрын шӱшкалта.
14 Вавилон дене кредалаш рат дене йыр шогалза,
пикшызе-влак, лӱйыза ӱмбакыже, пикшдам ида чамане,
вет Господь ончылно тудо сулыкыш пурен.
15 Чот кычкырен, ӱмбакше чыла могырым кержалтса!
Теве тудо чаманен кодаш йодеш,
вет башньыжым сӱмыреныт, пырдыжшым шалатеныт –
тыге Господь тудлан ӱчым шуктен.
Пашаже почеш тудлан пӧртылтыза!
Кузе тудо ыштен, тудын денат тыгак ыштыза!
16 Пытарыза Вавилонышто ӱдышым
да тӱредме жап годым сорла дене тӱредшым!
Тек кажныже, тушман керде деч лӱдын,
шке калыкше дек пӧртылеш,
тек кажныже шке мландышкыже куржеш.
17 Израиль – шалатен колтымо кӱтӱ,
лев-влак тудым поктен колтеныт.
Ончыч тудым Ассирий кугыжа кочкын,
а тиде пытартыш, Вавилон кугыжа Навуходоносор,
лужымат нултен.
18 Сандене Господь Саваоф, Израильын Юмыжо, тыге ойла:
кузе Мый Ассирий кугыжам мут кучаш шогалтенам,
тугак Вавилон кугыжа ден тудын элжым наказатлем.
19 Израильым Мый шке кӱтымӧ верышкыже пӧртылтем,
тудо Кармил ден Васаныште кошташ тӱҥалеш,
Ефрем курыкла ден Галаадыште теммеш кочкеш.
20 Тудо кечылаште, тудо жапыште, – ойла Господь, –
Израильын титакшым кычалаш тӱҥалыт, но тудо ок лий.
Иудан сулыкшым кычалаш тӱҥалыт, но огыт му,
вет кӧмытым Мый илышым кодем,
нунын сулыкыштым кудалтем.
21 Мератаим мландышке сар дене кайыза,
Пекодышто илыше-влак ӱмбаке кержалтса!*б
Пуштедыза, икте кодде пытарыза! – ойла Господь. –
Мом Мый тыланда кӱштенам, чыла шуктыза!
22 Тиде мландыште кредалме йӱк шокта,
тушто пеш кугу пытарымаш кая!
23 О, кузе катлен, уло тӱням кырыше чӧгыт шаланен!
Калык-влаклан Вавилон шучкылыкыш савырнен!
24 Мый тылат оптышым шынденам,
да тый, Вавилон, тудым ужын отыл да тушко логалынат.
Тыйым муыныт да кученыт,
вет тый Господь ваштареш шогалынат.
25 Господь шке аралыме вержым почын
да тушеч шыдыжын саргуралже-влакым луктын,
вет халдей мландыште Господь Юмо Саваофым паша вуча.
26 Чыла вер гыч тиде мланде ӱмбаке толза!
Клатше-влакым почса,
мо мумым ик орашке чумырыза.
Ты мландыште чыла пытарыза, тек нимоат ок код!
27 Чыла ӱшкыжшым*в пуштедыза,
шӱшкылмашке наҥгайыза!
Ойго нунылан! Нунын кечышт толын,
мут кучымо жапышт шуын!
28 Вавилон плен гыч куржын утлышо-влакын йӱкышт шокта –
Господь Юмынан шке храмже верч ӱчым шуктымыж нерген
нуно Сионышто увертарат.
29 Вавилон ваштареш пикшызе-влакым ӱжса!
Йоҥежым чымалтарыше-влак, тудын йыр стан дене шогалза –
тек тушеч нигӧ куржын ок утло.
Пашаж почеш тудлан пӧртылтыза:
кузе тудо ыштен, тудын денат тыгак ыштыза,
вет тудо Израильын святой Господь Юмыжо ончылно
шкенжым кӱшкӧ нӧлталын!
30 Сандене самырык еҥже-влак уремлаште камвозыт,
чыла сарзыже тудо кечын пыта, – ойла Господь.
31 Мый тыйын ӱмбакет толам, кугешныше, –
ойла Господь Юмо Саваоф, –
вет толын тыйын кечет, мут кучымо жапет.
32 Шӱртня да камвозеш кугешныше,
нигӧ тудым ок нӧлтал.
Тудын олалашкыже Мый тулым чыкем,
чыла йырвелым тудо пӧжга.
33 Тыге ойла Господь Саваоф:
Израиль ден Иуда эрге-влакым темдат,
пленыш налше-шамыч нуным пеҥгыдын кучат,
огыт келше кид йымачышт колташ.
34 Но нуным Сулен налше виян,
лӱмжӧ Тудын Господь Саваоф.
Тудо нуным пыдал налеш, мландылан тынысым пуа,
а Вавилонышто илыше-влакым лӱдмашыш пурта.
35 Керде нӧлталтеш халдей-шамыч ӱмбаке, – ойла Господь, –
Вавилонышто илыше-влак,
тудын онжо ден мунлыеҥже-влак ӱмбаке!
36 Керде нӧлталтеш тудын мужедшыже-влак ӱмбаке –
нуно ушдымо лийыт,
нӧлталтеш сарзыже-влак ӱмбаке –
нуно лӱдын чытыраш тӱҥалыт.
37 Керде нӧлталтеш тудын имне ден орваже-влак ӱмбаке,
коклаштышт улшо йот калык-влак ӱмбаке –
нунышт ӱдырамаш гай лийыт.
Керде нӧлталтеш поянлык аралыме верлаже ӱмбаке,
нуно агыме лийыт.
38 Кукшо игече толеш, да тудын чыла вӱдшӧ кошка,
вет тудо – шке ыштыме юмо-влакын мландышт,
нине шучко полган-шамычлан кӧра тусо калык ушым йомдарен.
39 Илаш тӱҥалыт тушто ир мландысе янлык ден тулпире-влак,
страус-шамыч вераҥыт тушан.
Илыше-влак деч посна кодеш тиде мланде,
тукым гыч тукымыш тудо еҥ илыдыме вер лиеш.
40 Кузе Юмо Содом ден Гоморрам
йыр улшо олала дене пырля пытарен, – ойла Господь, –
тугак тыштат нигӧ ок код,
еҥ-влак тушто жаплан илашат огыт шогал.
41 Теве йӱдвел гыч калык толеш, кугу калык,
мланде тӱр гыч шуко кугыжа нӧлталтеш.
42 Кидыштышт – пикшйоҥеж ден умдо.
Нуно торжа да чаманыдыме улыт,
теҥыз лӱшкымӧ семын йӱкышт шокта.
Кудал толыт имне дене, рат дене шогалыт –
тый денет, Вавилон ӱдыр, кредалаш ямде улыт.
43 Нунын нерген уверым колмеке,
Вавилон кугыжан кидше лушкен,
тудым орлык темдалын,
азам ыштыме годсо гай корштымаш авалтен.
44 Иордан серысе чашкер гыч кӱтымӧ верыш лекше лев семын
Мый Едом калыкым шке мландыж гыч ик татыште поктен колтем
да вуйлатышыштлан ойырен налме еҥем шогалтем.
Кӧ Мый гаем уло? Кӧ Мый денем судитлалтеш?
Могай вуйлатыше Мыйын ваштареш шоген кертеш?
45 Колыштса, мом Господь Вавилон шотышто шонен пыштен
да мом халдей-влакын мландышт дене ыштынеже:
кӱтӱ гыч эн изи-влакым поктен наҥгаят,
илыме верыштымат пытарат!
46 Вавилоным сеҥен налме йӱк-йӱан деч мланде чытырна,
тушто илыше-влакын кычкырымыштым калык-шамыч колыт».
*а 50:11 Рокмаш – ржать (имне нерген).
*б 50:21 Мератаим лӱм ’кугу пудыранчык’ манмым ончыкта, тиде, очыни, Вавилонысо кечывалвел кундем. Пекод лӱм ’мут кучыктымаш’ манмым ончыкта. Тиде – Тигр эҥер деч эрвелныла улшо кундем. Нине лӱм-влак пӱтынь Вавилоным да тудын пӱрымашыжым ончыктат.
*в 50:27 Ӱшкыж – тыште самырык виян сарзе-влак нерген ойлалтеш.
Глава 50