Выбрать язык
Книги Ветхого Завета
Книги Нового Завета
с русским текстом1 Иеремийлан Господь деч тыгай шомак лийын:2 «Тыге ойла Господь, Израильын Юмыжо: тылат каласыме чыла шомакем книгаш возо.3 Жап шуэш, – ойла Господь, – кунам Мый плен гыч шке калыкем, Израиль ден Иудам, пӧртылтем, – ойла Господь. – Мый нуным кугезе кочаштлан илаш пуымо мландышкем угыч пӧртылтем, да нуно тушто оза лийыт».
4 Теве Господьын Израиль ден Иуда шотышто каласыме шомакше.5 Тыге ойла Господь:
«Шучкын кычкырыме йӱкым колына,
чыла вере – лӱдмаш ден пудыранчык, а тыныс уке.
6 Йодыштса да шоналтыза: пӧръеҥ ышта мо азам?
Но мом Мый ужам?
Азам ыштыше ӱдырамаш семын пӧръеҥ-влак мӱшкырыштым кученыт,
чурийышт нунын ошемын!
7 О, шучко лиеш тудо кече, тудын гай эше лийын огыл!
Иаковлан тиде – орлыкан жап, но тудын деч утарыме лиеш.
8 Тудо кечын, – ойла Господь Саваоф, –
Мый шӱйысӧ омытажым кудашам, шинчыржым шалатем.
Тетла те йот калыкын кулжо огыда лий,
9 а Господь Юмыланда да шке кугыжаланда служитлаш тӱҥалыда –
тудым Мый тыланда Давид тукым гыч шогалтем.
10 Тугеже, Иаков тарзем, ит лӱд,
ит ӧрткӧ, Израиль! – ойла Господь. –
Мый тыйым мӱндыр эл гыч утарем,
пленыште улмо мланде гыч тукыметым кондем.
Иаков пӧртылеш, ласкан да тыныслын илаш тӱҥалеш,
нигӧ тудым ок лӱдыктӧ.
11 Мый пеленет улам, – ойла Господь. –
Мый тыйым утарем!
Пӱтынек пытарем чыла калыкым,
кудышт коклашке тыйым шалатен колтенам,
а тыйым ом пытаре.
Но пашат почеш Мый тыйым чын наказатлем,
мут кучыктыде ом кодо.
12 Тыге ойла Господь:
тый чот эмганенат,
сусыретым паремдаш ок лий.
13 Уке тыйым пыдал налше,
сусыретлан эм уке, ок лий тыйым эмлаш.
14 Чыла йолташет-влак тыйым монденыт,
тыйын шотышто огыт тургыжлане.
Вет тушман семын Мый тыйым кыренам,
кугу титакетлан, шотлаш лийдыме сулыкетлан
пеш чот наказатленам.
15 Мом тый эмганыметлан варгыжат,
чот корштымылан шортат?
Кугу титакетлан, мучашдыме сулыкетлан кӧра
Мый тый денет тыге ыштенам.
16 Но тыйым пытарыше-влак лийыт чыланат пытарыме,
тушманет-влак лийыт пленыш наҥгайыме.
Тыйым пустаҥдыше-шамыч шкешт лийыт пустаҥдыме,
тыйым агыше-влак шкешт лийыт агыме.
17 Мый тыйым паремдем,
сусыретым эмлем, – тыге ойла Господь. –
Тыйым лӱмденыт: ”Кудалтен кайыме”, каласеныт:
”Теве Сион – нигӧ тудын шотышто ок тургыжлане!”
18 Тыге ойла Господь:
Иаковын омашыже-влакым Мый шке верышкышт пӧртылтем,
тудын илемже-влакым чаманен налам.
Шке кӱкшакаштыже ола угыч чоҥымо лиеш,
полат угыч нӧлталме лиеш.
19 Тушто тауштымо муро,
куанен йывыртыше-влакын йӱкышт йоҥгаш тӱҥалыт.
Мый чотыштым шукемдем, нуно огыт шагалем.
Мый нунылан чапым пуэм,
нуно ӱлыкшемдыме огыт лий.
20 Иаковын эргыж-влак ончычсо гай лийыт,
калык Мыйын ончылнем вияҥеш,
а нуным шыгыремдылше-влакым Мый мут кучаш шогалтем.
21 Нунылан он шкешт кокла гычак лиеш,
шкешт кокла гычак вуйлатыше лектеш.
Мый тудым лишемдем, да тудо Мый декем лишемеш.
Кӧ Мый декем шке гыч лишемаш тоштеш? – ойла Господь. –
22 Те Мыйын калыкем, а Мый тендан Юмыда лиям».
23 Теве Господьын тӱтанже кугу шыде дене толеш,
озыркан мардеж нӧлталтеш,
осал еҥ-влакын вуйышт ӱмбалне пӧрдеш.
24 Мо шӱмыштыжӧ уло, тудым шуктымешке,
Господьын кугу шыдыже кораҥын ок кае.
Пытартыш кечылаште тидым раш умыледа.
Глава 30