Выбрать язык
Книги Ветхого Завета
Книги Нового Завета
с русским текстом1 Иуда кугыжа Иоакимын, Иосий эргын, вуйлаташ тӱҥалмыж годым Господь деч тыгай шомак лийын.
2 Тыге Господь ойла: «Господьын пӧртшын кудывечышкыже шогал да Иуда мландысе олалаште илыше-влаклан, кӧмыт Господьын пӧртышкыжӧ кумалаш толыт, Мыйын ойлаш кӱштымӧ чыла шомакем увертаре, ик мутымат ит кораҥде.3 Ала нуно колыштыт да осал корнышт гыч кораҥыт. Тунам Мый осал пашам ыштымыштлан ӱмбакышт туткарым колташ шонымем вашталтем.4 Каласе нунылан: ”Тыге ойла Господь: те Мыйым огыда колышт, Мыйын тыланда пуымо законем шукташ огыда тӱҥал гын,5 тендан деке колтымо, угыч да угыч колтымо Мыйын пророк тарзем-влакын ойлымыштым огыда колышт гын, – а те нуным колыштын огыдал, –6 мом Силом дене ыштенам, тиде пӧрт денат тидымак ыштем. Мландымбалысе чыла калык тиде олам каргаш тӱҥалеш”».
7 Чыла тиде шомакым Иеремий Господьын пӧртыштыжӧ увертарен. Иерей ден пророк-влак да уло калык тудым колыштыныт.8 Иеремий Господьын уло калыклан мом ойлаш кӱштымыжым каласен шуктен веле, тудым иерей ден пророк-влак да уло калык тунамак пӱтырен кученыт да каласеныт: «Тый колышаш улат!9 Молан тый ”Тиде пӧрт дене Силом семын лиеш, а тиде ола пустаҥеш, илыше-влак деч посна кодеш” манын, Господьын лӱмжӧ дене пророклен ойлет?» Тыге уло калык Господьын пӧртыштыжӧ Иеремий ваштареш шогалын.
10 Кунам тидын нерген Иуда мландын онжо-влак колыныт, нуно кугыжан пӧрт гыч Господьын пӧртшӧ деке толыныт да тушто У капка воктеке шинчыныт.11 Иерей ден пророк-влак он-шамыч ден уло калыклан тыге каласеныт: «Тиде айдеме колышаш! Мом тудо тиде ола ваштареш пророклен ойлен, те шке пылышда дене колында».
12 Тунам Иеремий он-влак ден уло калыклан каласен: «Мом тиде пӧрт ден ола ваштареш каласымым колында, тидым пророклен ойлаш мыйым Господь колтен.13 Осал корныда гыч кораҥза, уда пашам ыштымым чарныза да Господь Юмыдан йӱкшым колыштса. Тунам Господь тыланда сӧрымӧ туткаржым ок колто.14 А мый тендан кидыште улам: мом те сай да чынлан шотледа – мый денем тудым ыштыза.15 Но иктым палыза: те мыйым пуштыда гын, тендан ӱмбалне, тиде ола да тушто илыше-влак ӱмбалне титакдыме вӱр лиеш. Вет Господь чынжымак мыйым тендан дек чыла тиде шомакым каласаш колтен».
16 Тунам он-влак ден уло калык иерей ден пророк-шамычлан каласеныт: «Тиде айдеме колышаш огыл, вет тудо мыланна Господь Юмынан лӱмжӧ дене ойлен».17 Калык кугурак-влак кокла гычат икмынярын кынел шогалыныт да погынышо уло калыклан каласеныт:18 «Иуда кугыжа Езекий вуйлатыме жапыште Морасфа гыч Михей пророклен ойлен. Тудо уло Иуда калыклан каласен: ”Господь Саваоф тыге ойла: Сионым пасу семын куралыт, Иерусалим кӱ орашке савырна, а тиде курыкышто, кушан Юмын пӧртым чоҥеныт, чодыра кушкын шогалеш!”19 Иуда кугыжа Езекий да уло калык тудым тидлан пуштыныт мо? Езекий Господь деч лӱдын огыл мо, Тудым сӧрвален огыл мо? Тунам Господь нунылан сӧрымӧ туткаржым колтен огыл. А ме шкаланна кугу ойгым кычалына!»
20 Господьын лӱмжӧ дене тыгак Кириаф-Иарим гыч Урий, Шемай эрге, пророк шомакым ойлен. Тиде ола ден мланде нерген тудо Иеремийын каласыме шомакшымак увертарен.21 Кунам Урийын шомакшым Иоаким кугыжа, тыгак тудын сарзывуйжо ден онжо-влак колыныт, кугыжа тудым пушташ шонен. Тидым пален налмеке, Урий лӱдын да Египетыш куржын.22 Но Иоаким кугыжа Египетыш Элнафаным, Ахбор эргым, да пеленже икмыняр еҥым колтен.23 Нуно Урий почеш Египетыш каеныт да тудым Иоаким кугыжа деке конденыт. Кугыжа пророкым керде дене руэн пушташ, а капшым тыглай калыкын шӱгарлашкыже кудалташ кӱштен.
24 А Иеремий велке Ахикам, Шафан эрге, шогалын да тудым калыклан пушташ пуэн огыл.
Глава 26