Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИЕРЕМИЙЫН КНИГАЖЕ
17 Глава
1 Иуда тукым сулыкшо верч наказатлыме лиеш. 5 Кӧ суапландарыме, а кӧ каргыме лиеш. 14 Иеремий Господь деч полышым йодеш. 19 Шуматкечым шуктен шогымо нерген.1 Иудан сулыкшым тудын шӱмешыже да жертвенник тӱкешыже
кӱртньӧ кӱзӧ дене коркален возен шындыме,
тулгӱ гыч ыштыме ий дене пӱчкын лукмо.
2 Нунын эргыштат шарнат
нине жертвенник ден Ашера меҥге-влакым,
кудышт ладыра пушеҥгыла воктене, кӱкшӧ чоҥгаталаште шогеныт.
3 Мландет мучко ыштыме сулыкетлан кӧра
Мый тушто улшо курыкем, тыгак чыла пого ден поянлыкетым,
кӱкшакасе кумалме верлатым агаш пуэм.
4 Титакетлан кӧра тый Мыйын пуымо мландем йомдарет.
Тылат палыдыме мландыште Мый тыйым
тушманет-влакын кулжым ыштем,
вет те Мыйын шыде тулем ылыжтенда,
тудо курымеш йӱлаш тӱҥалеш!»
5 Тыге ойла Господь:
«Каргыме тудо еҥ,
кӧ айдемылан инана
да тудым шке эҥертышыжлан шотла,
кӧн шӱмжӧ Господь деч кораҥеш.
6 Ир мландысе вондер гай тудо лиеш,
сайлык толмым ок уж.
Илаш тӱҥалеш кече когартыман ир мландыште,
еҥ илыдыме шинчалан ошманурышто.
7 Суапландарыме тудо айдеме,
кӧ Господьлан инана,
кӧн ӱшанже – Господь.
8 Лиеш тудо вӱд воктене шындыме,
йогын воктене вожым колтышо пушеҥге гай.
Шокшо тудым ок лӱдыктӧ, лышташыже ужарге,
кукшо ий деч тудо ок лӱд,
саскам кондымыжым ок чарне.
9 Айдемын шӱмжӧ эн чот осал-чоя, пеш чот пужлышо –
кӧ тудым пален кертеш?
10 Мый, Господь, шӱмым шымлем, кӧргым тергем –
кажныжлан мом ыштымыже почеш,
пашажын саскаже почеш пӧртылтем.
11 Шинчеш ирмузо муно ӱмбаке, кудыжым шке мунчен огыл.
Тыгаяк тудо еҥат, кӧ ондалчык дене поянлыкым ыштен налын –
пел ӱмырым илен эртарымеке,
тудо нимо деч посна кодеш, ушдымыш лектеш».
12 Чап престол, тӱҥалтыш гычак кӱш нӧлталме –
мемнан святой верна.
13 Тый, Господь, улат Израильын ӱшанже.
Тыйым коден кайыше кажне еҥ намысыш пура.
«Мый дечем кораҥше-влак
пуракыште возымо лӱм семын йомыт,
вет нуно Господьым, илыше вӱд памашым, коден каеныт».
14 Паремде мыйым, Господь – тунам лиям паремдыме,
утаре мыйым – лиям утарыме.
Тыйым мый моктен илем.
15 Теве мыланем ойлат:
«Кушто Господьын шомакше?
Тек тудо шукталтеш!»
16 Калыкетын кӱтӱчыжӧ лияш мый тореш лийын омыл,
туткар кечым ужаш шонен омыл –
Тый тидым палет, Господь.
Мо умшам гыч лектын, Тый чыла палет.
17 Ит лӱдыктӧ мыйым!
Неле кечын Тый мылам улат аралтыш.
18 Тек намысыш пурат мыйым поктылшо-влак,
а мыйым вожылмашыш ит пурто.
Тек нуно лӱдын чытырат,
а мыйым лӱдмаш деч арале.
Колто нунылан туткар кечым,
нуным пӱтынек кырен шалате!
19 Господь мылам тыге каласен: «Кай да Калык капка воктеке шогал, кудын гоч Иуда кугыжа-влак пурат да лектыт. Иерусалимын чыла капкаж воктене20 ойло: ”Колыштса Господьын шомакшым, Иуда кугыжа-влак, Иудан калыкше, Иерусалимыште илыше-шамыч – те, кӧмыт нине капка гоч коштыда!”21 Господь тыге ойла: ”Илышдам арален кодаш манын, шуматкечын нимогай нумалтышым ида нумал, Иерусалимын капкаже-влак гоч ида пурто.22 Пӧртда гыч шуматкечын нимогай нумалтышым ида лук, нимогай пашам ида ыште: шуматкечын святой улмыжым арален шогыза, тыге Мый ача-кочаланда кӱштенам,23 но нуно колыштын огытыл, пылышыштым савырен огытыл. Нуно ӱскырт лийыныт, Мыланем торешланеныт, туныктымым шотыш налын огытыл.24 Но те Мыйым колыштыда гын, – ойла Господь, – шуматкечын тиде олан капкаже-влак гоч нимогай нумалтышым огыда пурто, тиде кечын святой улмыжым арален шогеда да тунам нимогай пашам огыда ыште гын,25 тиде олан капкалаже гоч Давидын престолыштыжо шинчыше кугыжа-влак да нунын тӧрашт пурат. Кугыжа ден тудын тӧраже-влак, Иуда калык ден Иерусалимыште илыше-шамыч нунын гоч орва дене да имне ӱмбалне пурат. Тиде олаште калык курымеш илаш тӱҥалеш.26 Тышке еҥ-влак Иудан олалаже гыч, Иерусалим йыр улшо кундемла гыч, Вениамин мланде гыч, тӧрвер гыч, курыкла ден кечывалвел мланде гыч толыт. Господьын пӧртыш нуно йӱлалтен пуымо надыр ден моло тӱрлӧ надырым, кинде надырым, ладыным, тауштымо надырым кондат.27 Но те Мыйым огыда колышт да шуматкечын святой улмыжым огыда арале гын, ты кечын Иерусалимын капкаже-влак гоч нумалтышым пуртеда гын, Мый нине капкалаште тулым ылыжтем – тудо Иерусалимын чыла полатшым пӧжген пытара: тудым нигӧ йӧртен ок керт!”»
Глава 17
