Выбрать язык
Книги Ветхого Завета
Книги Нового Завета
с русским текстом10 Тунам мый каласышым: «О, Господь Юмем! ”Тендан дене тыныс лиеш” манын ойлымет дене Тый тиде калыкым да Иерусалимыште илыше-влакым ондаленат веле мо? А вет логарна деке кердым шынденыт!»
11 Тудо жапыште тиде калыклан да Иерусалимыште илыше-влаклан тыге каласыме лиеш: «Ир мландысе чоҥгатала гыч когартыше мардеж Мыйын калыкем ӱмбаке чоҥештен толеш. Но тудын дене пырчым пуалтараш, арва деч эрыкташ ок лий –12 тиде мардеж утыждене виян! Мыйын кӱштымем почеш тудо толеш, тунам Мый нунын дене судым ыштем».
13 Теве тудо нӧлталтеш пыл семын,
орваже-влак пуйто тӱтан мардеж улыт,
имньыже-влак кудалыт арыслангайык деч писынрак.
Ойго мыланна, ме пытенна!
14 Иерусалим, шӱметым осал деч эрыкте,
тунам тый утарыме лият.
Мыняр жап эше осал шонымашлан озаланаш пуэт?
15 Дан гыч кычкырыме йӱк солна,
туткар нерген увер Ефрем курык гыч шокта.
16 Увертарыза калык-влаклан, Иерусалимлан каласыза:
«Олам авырен налаш тора эл гыч толыт,
Иудан олаж-влак ваштареш йӱкышт шергылтеш!
17 Пасу орол-влак семын нуно Иерусалимым авырат,
вет тудо Мыйым колыштмыжым чарнен», – ойла Господь.
18 Коштмо корнет ден пашат-влак тыйым тышке шуктеныт,
сулыкет тылат орлыкым конден,
шӱмышкет тудо шуын.
19 Кӧргем, мыйын кӧргем!
Коржеш мыйын шӱмем, кӱлтка тудо,
мый шып лийын ом керт.
Вет пуч йӱкым колам, кредалаш ӱжшӧ тургыж йӱкым!
20 Ойго почеш ойго, пӱтынь эл пустаҥдыме!
Омашем-влак вучыдымын шалатыме улыт,
пӱрдышшӧ-влакым ик татыште сӱмыреныт.
21 Кужун мо эше мылам тистым ончаш
да пуч йӱкым колышташ?
22 «Мыйын калыкем шонен моштыдымо,
Мыйым тудо ок пале.
Улыт нуно ушдымо йоча-влак,
нимогай умылымашышт уке.
Ушышт сита лач осаллан,
а порым нуно ыштен огыт мошто».
23 Ончем мый мландым, но тудо тӱсдымӧ да яра,
ончальым кавам – уке тушто волгыдо.
24 Ончем курык-влакым – нуно чытырат,
чыла кӱкшака-влак тарванат.
25 Ончем: ик еҥат уке, кайык-влак чоҥештен каеныт.
26 Ончем: сад-пакчан кундем ир мландыш савырнен,
Господьын йӱлышӧ шыдыжлан кӧра олаже-влак шалатыме улыт.
27 Тыге Господь ойла: «Уло мланде пустаҥдыме лиеш,
но тудым пӱтынек Мый ом пытаре.
28 Сандене мланде ойгыраш тӱҥалеш,
кӱшнӧ кава пычкемышалтеш:
ышташ шонымем нерген Мый каласенам –
тидлан ом ӧкынӧ, шонен пыштымем деч ом кораҥ.
29 Имнешке ден пикшызе-влакын йӱк-йӱанышт деч
чыла олаште илыше-шамыч куржыт –
каят сип чодырашке, кӱ курыклаш кӱзат.
Чыла ола пустаҥеш, ок код тушто ик чонат.
30 Мом тый ышташ тӱҥалат, пустаҥдыме ола?
Молан тый шемалге-йошкар вургемым чиет,
шӧртньӧ сӧрастарышым сакет
да шинчатым чиялтет?
Арам тый шкендым сӧрастарет!
Пӧржмариет-влак тыйым кӱлдымыш луктыныт,
нуно тыйым пытараш шонат.
31 Пуйто азам ыштыше ӱдырамашын кычкырыме йӱкшым колам,
икымше гана йочам ыштыше семын тудо кечкыжеш.
Кычкыра Сион ӱдыр, кидшым шуялтен:
”Ойго мыланем!
Пуштшо-влак ончылно пыта вием!”»
Глава 4