Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
25 Глава
1 Утарымылан Господьым чапландарымаш. 10 Юмо Моавым мут кучаш шогалта.1 Господь, улат Тый мыйын Юмем!
Тыйым чаплем мый, лӱметым моктем,
вет Тый ӧрыктарыше паша-влакым ыштенат –
ожно годымак мом шонен пыштыметым шуктенат.
2 Олам Тый кӱ ораш савыренат,
чоткыдемдыме олам шалатенат.
Йот тукым еҥ-влакын карманышт тушто ынде уке,
огеш лий тудо нигунам угыч чоҥымо.
3 Сандене виян калык-влак тӱҥалыт Тыйым чаплаш,
шыгыремдыше калык-влакын олашт тӱҥалыт Тый дечет лӱдаш.
4 Ойгыш логалшылан лийынат Тый шылын куржмо вер,
лийынат нужналан неле жап годым утаралтме вер,
тӱтан деч аралтыш, лӱп шокшо годым ӱмыл.
Вет индырыше-влакын шыде дене шӱлымышт
тӱтан мардежын пырдыж ваштареш шогымыж дене иктак,
5 кукшо ир мландыште лӱп шокшо шогымо дене иктак.
Но Тый тушман капырын лӱшкымӧ йӱкшым тыпландаренат.
Кузе пыл погынымо годым шокшо йомеш,
индырыше-влакын мурышт туге шыплана.
6 Тиде курык ӱмбалне Господь Саваоф
чыла калыклан сийым ышта,
Тудо нунылан чапле кочкышым, эн сай йошкар аракам,
томсыкан чесым
*а ямдыла.
7 Чыла калыкым леведше петыртышым,
чыла тукым ӱмбалне кийыше леведышым
тиде курык ӱмбалне Тудо пытара –
8 колымаш курымешлан нелме лиеш.
Тунам Господь Юмо чыла чурий гыч шинчавӱдым ӱштылеш,
пӱтынь мландымбалне шке калыкше ӱмбач намысым кораҥда.
Тыге Господь ойлен.
9 Каласат тудо кечын: «Теве Тудо, мемнан Юмына!
Тудлан ме инаненна, да Тудо мемнам утарен!
Тиде Господь, ме Тудым ӱшанен вученна!
Тудын утарымыжлан куанен йывыртена!»
10 Господьын кидше тиде курык ӱмбалне лиеш.
Олымым ночко терысыш тошкымо семын
Моав шке верыштыже тошкымо лиеш.
11 Кузе ийын кайыше еҥ шке кидшым шаралта,
туге Моав терыс коклаште кидше дене лупшкедылаш тӱҥалеш.
Но тудо кеч-кузе толашыже,
Господь кугешнымашыжым садак ӱлыкшемда.
12 Тыйын кӱкшӧ, пеҥгыде ола пырдыжетым Тудо шалата,
мланде ӱмбаке, пуракыш, тудым сӱмыра!
*а 25:6 Томсыкан чес – изысканная пища.
Глава 25
