Выбрать язык
Книги Ветхого Завета
Книги Нового Завета
с русским текстом1 Египет нерген пророклен ойлымаш.
«Теве Господь писын коштшо пыл ӱмбалне шинча,
Египетыш кая.
Египетын шояк юмыжо-влак Тудын ончылно чытырат,
Египетын шӱмжӧ лӱдын кӱлтка!
2 ”Мый египтян-влакым икте-весышт ваштареш тарватем:
иза шке шольыж дене кредалаш тӱҥалеш,
пошкудо – пошкудыж дене, ола – ола дене
да кугыжаныш – кугыжаныш дене.
3 Египтян-влак аптыранымашыш пурат,
шонен пыштымыштым Мый шалатем –
тунам нуно шояк юмо деч, вес тӱняш кайышын чонжо деч,
колышын чонжым ӱжын лукшо да шӱведыше деч йодаш каят.
4 Мый египтян-влакым осал тӧра кидыш пуэм,
торжа кугыжа нунын дене озаланаш тӱҥалеш”, –
ойла Господь, Господь Саваоф.
5 Теҥызын вӱдшӧ кошка,
эҥер куакшемеш, кукшо мландыш савырна.
6 Вӱдкорно-влак шакше ӱпшым луктыт,
Египетын йогынжо-шамыч таляка лийыт да кошкат,
омыж ден вӱдвондо когарген шемемыт.
7 Нил эҥер аҥысе кушкыл,
сер воктенысе пасулаште мом ӱдымӧ – чыла кошка,
лиеш мардеж дене наҥгайыме, чыла пыта.
8 Шинчавӱдыштым йоктарат колызо-влак,
эҥерыш эҥырым кышкыше-шамыч шорташ тӱҥалыт,
вӱдыш вапшым шындыше-влакым шӱлык авалта.
9 Йытыным тулышо-влак ойгыш логалыт,
чапле куэмым куышо-шамыч ӱшаным йомдарат.
10 Вургемым ыштыше-влак ойгаҥыт,
тарлалтше пашаеҥ-шамычым шӱлык авалта.
11 Цоан олан онжо-влакын ушышт каен!
Фараонын мунло каҥашпуышыжо-шамыч
шотдымо каҥашым пуат.
Кузе нуно фараонлан каласаш тоштыт:
”Ме мунло еҥ-влакын эргышт,
акрет кугыжа-шамычын эргышт улына”?
12 Кушто улыт нуно, тыйын мунло еҥет-влак?
Тек нуно тыланет каласат, тек пален налыт –
мом Господь Саваоф Египетлан пӱрен!
13 Цоанын онжо-влакын ушышт каен!
Мемфисын*а онжо-шамыч ондалалтыныт –
Египет тукым-влакын кугуракышт
калыкым чын корно гыч кораҥденыт.
14 Господь нунын ушыштым пудыратен,
да нуно Египетым чын корно гыч кораҥдат –
тудыжо йӱшӧ еҥ семын шке укшинчышыштыже тошкыштеш.
15 Египетлан тетла нигӧ полшен огеш керт,
лийже тудо кеч вуй але поч, пальме укш але омыжвондо.
16 Тудо кечын египтян-влак ӱдырамаш гай лийыт – нуно Господь Саваофын нӧлталме кидше деч лӱдын чытырнат.17 Иуда мланде египтян-влаклан шучкылыкыш савырна – кажныже, кӧлан тудын нерген каласат, Господь Саваофын нунын шотышто мом шонен пыштымыж деч лӱдын чытырна.
18 Тудо кечын Египет мландысе вич ола ханаан йылме дене*б ойлаш тӱҥалеш да Господь Саваофлан товатмутым пуа. Нунын кокла гыч иктыжым ”Кече ола” манын лӱмдат.19 Тудо кечын Египет мланде покшелне Господьлан жертвенник шогаш тӱҥалеш, а чек воктене – Господь лӱмеш шогалтыме кӱ.20 Египет мландыште нуно Господь Саваоф нерген пале да танык лийыт. Кунам египтян-влак шыгыремдыме лийыт да Господь деч полышым йодын кумалыт, Тудо нунылан утарышым да пыдал налшым колта, да тудыжо нуным утара.21 Тыге Господь Шкенжым Египетыште палдара, да египтян-влак тудо кечын Господьым пален налыт. Нуно Тудлан, вольык надыр ден кинде надырым конден, вуйыштым сават, сӧрымашым пуат да шуктат.22 Господь Египетым пера да Шкеак паремда. Кунам нуно Господь деке мелын савырнат, Тудо сӧрвалымыштым колеш да нуным паремда.23 Тудо кечын Египет гыч Ассирийыш кугу корно шуйналтеш. Ассириян-влак Египетыш, а египтян-шамыч Ассирийыш кошташ тӱҥалыт. Египтян ден ассириян-влак Господьлан пырля кумалаш тӱҥалыт.24 Тудо кечын Израиль кумшо кугу кугыжаныш, Египет да Ассирий дене иктӧр, лиеш. Пӱтынь мландылан тудо суапландарымаш лиеш.25 Господь Саваоф нуным суапландара, тыге каласа: ”Суапландарыме улыт Мыйын калыкем – египтян-влак, Мыйын кидемын пашаже – ассириян-шамыч да Мыйын ойырен налме калыкем – Израиль”».
*а 19:13 Мемфис – Еврей текстыште «Ноф», тиде вер мыланна Мемфис лӱм дене палыме.
*б 19:18 «Ханаан йылме дене» – вес семын «еврей йылме дене».
Глава 19