Your word is a lamp to my feet

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая Главаследующая Главас русским текстом

ПРОРОК ИСАИЙЫН КНИГАЖЕ

10 Глава

1 Чын огыл судитлыше-влакым ойго вуча. 5 Ассирий кугыжан кидше дене Юмо Израильым мут кучаш шогалта. Ассирийымат Юмын судшо вуча. 20 Израильын утаралт кодшо еҥже-влак шке Юмышт деке савырнат. 28 Иерусалим деке тушман лишемеш.

1 Ойго нунылан, кӧмыт чын огыл законым луктыт
да орлыкым кондышо пунчалым возат!
2 Нуно йорло-шамычлан чын судым ынешт ыште,
Мыйын калыкем кокла гыч незер-влакым
    чын суд деч посна кодынешт,
тулык вате-шамычын погыштым поген налнешт,
тулык йоча-влакым агынешт.
3 Мом те ышташ тӱҥалыда мут кучымо кечын,
кунам тора гыч ойго толеш?
Кӧ деке те полышым йодын куржыда?
Кушан поянлыкдам кодеда?
4 Тунам тыланда, пленыш логалын, сукен шинчаш
але пуштмо-влак коклаште кияш веле кодеш.
Но тунамат Господьын шыдыже ок лушко,
Тудын кидше эшеат нӧлталме лиеш.
5 «О Ассирий – Мыйын шыдемын тояже!
Тудын кидыштыже сола – Мыйын кугу шыдем!
6 Мый тудым Юмым шотлыдымо калык ваштареш колтем,
    шыдем лукшо тукым ӱмбак савырем.
Тудлан Мый нимом кодыде агаш, чыла поген налаш,
    тиде калыкым уремысе пурак семын тошкаш кӱштем.
7 Но тудын ушыштыжо тиде огыл,
тидым огыл Ассирий шона –
шонен пыштен тудо кырен шалаташ,
шуко калыкым пытараш.
8 Ойла тудо:
”Тӧра-влакем пуйто кугыжа огытыл мо?
9 Калне ола Кархемис семын, Емаф Арпад семын
    да Самарий Дамаск семын сеҥен налме огытыл мо?
10 Мыйын кидем полган юмылан кумалше кугыжаныш-влакым сеҥен налын,
тушто шке ыштыме юмо-влак Иерусалим ден Самарийысе деч шукырак лийыныт.
11 Мом мый Самарий да тудын полган юмыж-влак дене ыштенам,
тидымак Иерусалим да тудын шке ыштыме юмыж-влак дене ыштем!”»

12 Кунам Господь шке пашажым Сион курыкышто да Иерусалимыште мучашла, Тудо каласа: «Шкенжым кӱшкӧ шындымылан, кугешныше ончалтышыжлан Ассирий кугыжам Мый мут кучаш шогалтем.13 Вет тудо ойла:
”Шке вием да мунло улмем дене тидым ыштенам,
вет мый ушан улам.
Калык-влакын мланде чекыштым ӱштынам,
поянлыкыштым агенам,
кугыжаштым престол гыч ӱшкыж семын сӱмырал шуэнам.
14 Кузе пыжашым яра кодат,
туге мый калык-влакын поянлыкыштым поген налынам,
кузе пыжашыште коден кайыме муным погат,
туге мый пӱтынь мландым руалтен налынам –
нигӧ шулдыржым тарватен огыл,
умшажым почын огыл, йӱкымат луктын огыл!”»
15 Товар тудын дене руышо ончылно кугешна мо?
Пила тудын дене йыгыше ончылно моктана мо?
Кертеш мо пондо тудым кучышо еҥым нӧлталын?
Кертеш мо шугыньо пу дене огыл ыштыме айдемым нӧлталын?
16 Тидлан Господь, Господь Саваоф,
Ассирийын таза еҥже-влак ӱмбак мерчыше черым колта,
лӱмлӧ еҥже-шамычым тулйолкын йӱлалта.
17 Израильын Волгыдыжо лиеш тунам тул,
тудын Святой Юмыжо лиеш тулйылме –
ик кечыште Ассирийын пелчан ден коршаҥгыжым йӱлалтен пӧжга.
18 Чапле чодыра ден садлажым пытара,
1 нимогай илыше тушто ок код,
колаш вочшо черле еҥ гай лиеш Ассирий.
19 Чодыраште пушеҥге пеш шагал кодеш –
изи йочат нуным шотлен луктын кертеш.
20 Тудо кечын Израиль деч кодшо-влак –
Иаков тукым гыч утаралт кодшо-влак –
нуным кырен шалатышылан тетла эҥерташ огыт тӱҥал,
но уло шӱм-чон дене Господьлан,
    Израильын Святой Юмыжлан, инанаш тӱҥалыт.
21 Утаралт кодшо-шамыч мӧҥгеш толыт,
Иаков тукым деч кодшо-влак виян Юмо дек пӧртылыт.
22 Израиль, тыйын калыкет
    теҥыз ошма пырче наре лиеш ыле гынат,
шагалже веле утаралт кодеш да пӧртылеш.
Пытарымашым палемдыме, тудо чын суд почеш ышталтеш,
23 вет Господь, Господь Саваоф,
палемдыме пытарымашым пӱтынь мландымбалне шукта.
24 Сандене Господь, Господь Саваоф, тыге ойла:
«Мыйын калыкем, Сионышто илыше калыкем!
Ит лӱд Ассирий деч, кеч тудо тыйым тоя дене кыра,
    Египет семын шугыньыжым ӱмбакет нӧлта.
25 Эше изишак, эше пыртак – Мыйын тылат сырымем эрта,
да Мыйын кугу шыдем Ассирий ӱмбак савырна.
26 Орив кӱ курык воктене Мадиам калыкым кырен шалатымыж семын
    Господь Саваоф тунам тудын ӱмбак солам нӧлталеш,
Египет ӱмбак нӧлталме семын
    шке пондыжым теҥыз ӱмбак нӧлталеш.
27 Тудо кечын Ассирийын нумалтышыже
    вачӱмбачет кудалтыме лиеш –
чиктыме омытаже шӱет гыч кораҥдыме лиеш,
тыйын вий-куатет деч тудо шалана».
28 Толыт нуно Аиаф гоч,
эртен каят Мигроным,
Михмасыште шапашыштым кодат.
29 Эртен каят курыклоҥым,
Геваште йӱдым эртарат.
Чытыра Рама,
Саулын Гиваже гыч илыше-влак куржыт.
30 Кугу йӱкын кычкыре, Галлим калык!
Колышт, Лаис,
о, мыскынь Анафоф!
31 Куржын пытен Мадмена,
Гевимыште илыше-влак каяш вашкат.
32 Тиде кечынак тушман Новышто шогалеш
да Сион курыклан, Иерусалимысе кӱкшакалан
    шке мушкындыжым рӱза.
33 Теве Господь, Господь Саваоф,
лӱдмашым лукшо куатше дене пушеҥге укшлам кӱрыштеш –
кугу пушеҥге-влак руэн шумо,
кӱкшӧ пушеҥге-влак мландымбак йӧрыктымӧ лийыт.
34 Сип чодырам Тудо кӱртньӧ товар дене руа,
Ливанысе кугу пушеҥге семын нуно камвозыт.

предыдущая Глава Глава 10 следующая Глава