Библия
Выбрать язык
Книги Ветхого Завета
Книги Нового Завета
с русским текстом
ЧЫЛА МУРЫЛАН МУРО
3 Глава
1 «Кушто мыйын йӧратыме качем?» 6 «Кӧ тиде ӱдыр, ир мланде гыч толшо?»1 «Йӱдым вакшыштем шке йӧратымем кычальым –
кычальым мый, но шым му.
2 ”Кынелам мый, каем ола мучко,
урем-влакым, калык погынымо верлам эртем –
кычалам мый тудым, кӧм йӧратем”.
Кычальым тудым, но шым му.
3 Ола мучко коштшо орол-влак мыйым вашлийыч,
да мый нунын деч йодым:
”Ужында мо те мыйын йӧратымем?”
4 Изиш веле нунын деч кораҥым –
муым тудым, кӧм йӧратем.
Тудым пӱтырен кучышым, нигушкат шым колто
да авамын пӧртышкыжӧ, мыйым шочыктышын пӧлемышкыже,
тудым кондышым».
5 Иерусалимын ӱдыржӧ-влак,
ирказа да пӱчӧ-влак дене мылам товатлыза:
жап деч ончыч йӧратымашым ида помыжалте,
тудым ида кынелте.
6 Кӧ тиде ӱдыр, ир мланде гыч шикш меҥге семын толшо?
Тудо мирра да ладын дене,
купеч-влакын кондымо тамлыпушан насташт дене пушлана.
7 Ончалза! Тиде Соломонын паланкинже,
*а тудын йыр – кудло сарзе,
улыт нуно Израильын тале сарзыже-влак.
8 Чылаштын уло керде, туныктымо улыт нуно кредалаш,
кажнын эрдыштыже керде кеча,
ямде улыт нуно йӱд лӱдыкшым чактараш.
9 Ыштен шке паланкинжым Соломон кугыжа
ливанысе пушеҥге дене,
10 меҥгыжым – ший дене,
эҥертышыжым – шӧртньӧ дене.
Шинчыме вержым шемалге-йошкар куэм дене леведме,
кӧргыжым Иерусалимын ӱдыржӧ-влак йӧратен сӧрастареныт.
11 Толза, Сионын ӱдыржӧ-влак,
вуйшӱдышым чийыше Соломон кугыжам ончалза –
ты вуйшӱдышым аваже тудлан сӱан кечын,
эргыжын эн куанле кечынже, чиктен.
*а 3:7 Паланкин – леведышан да эҥертышан шинчыме вер, тудым кок вара дене нумал коштыныт.
Глава 3
