Выбрать язык
Книги Ветхого Завета
Книги Нового Завета
с русским текстом2 Тыге каласем мый: колышт кугыжан кӱштымыжым, вет тый Юмо ончылно тудым колышташ товатленат.3 Кугыжа дечын кораҥ каяш ит вашке, ӱскыртланен, осал пашам ит ыште, вет кугыжа мом шона, тудым ыштен кертеш.4 Кугыжан шомакыштыже – кучемвий. Кӧ тудлан каласа: «Мом тый ыштылат?»
5 Кӧ кӱштымым шукта, ок логал туткарыш,
мунло шӱм кунам да мом ыштышашым пала.
6 Чылан шке жапше да ышталтшаш радамже уло,
но айдемылан неле орлыкым чыташ логалеш.
7 Мо ончыкшым лиеш – айдеме ок пале,
да кузе тиде лиеш – кӧ тудлан каласа?
8 Уке айдемын илыш шӱлышым кучен кертме вийже,
колышаш кечыжат тудын кидыште огыл.
Сар гычын ок лий каяш,
осал еҥым осал пашаже ок утаре.
9 Чыла тидым ужынам мый,
кунам кече йымалне мо ышталтмым шымленам.
Теве ик айдеме весым кид йымалныже куча
да тудлан эҥгекым конда.
10 Эше мый ужынам: теве осал еҥ-влакым тоят. Нуно ала-кунам святой верыш коштыныт, но варажым осалым ыштен илыме олаштышт мондымо лийыныт.*а Чыла тидат – арам!11 Кунам осал пашалан суд вашке ок ышталт, айдемын шӱмжӧ лач осалым ышташ ӱжеш.12 Сулыкан еҥ шӱдӧ гана осалым ышта да кужун ила ыле гынат, мый палем: кӧ Юмо деч лӱдеш да Тудым шотлен ила, тудын дене сай лиеш.13 А осал еҥ порым ок уж, куржшо ӱмыл семын ӱмыржӧ писын эрта, вет тудо Юмо деч ок лӱд.
14 Мландымбалне эше теве могай арам паша ышталтеш: мом осал еҥ сулен налшаш, тидым чын ыштыше налеш, а мом чын ыштыше сулен налшаш – осал еҥлан логалеш. Тидат арам, каласенам мый.15 Садлан чапым тыглай илышын куанжылан пуэнам, вет кече йымалне айдемылан кочмо, йӱмӧ да йывыртыме деч сайракше уке. Кече йымалне Юмын тудлан пуымо да пашам ыштен илыме кечылаште чыла тиде айдеме пелен лиеш.
16 Кунам мый мунлылыкым пален налаш да мландымбалне айдемын ыштыме чыла пашажым ончал лекташ шонен пыштенам – вет нунылан кӧра айдеме кечывалымат, йӱдымат ок мале, –17 тунам мый Юмын чыла пашажым ужынам да ыҥленам: айдеме кеч-кузе тӧча гынат, кече йымалне мо ышталтмым умылен ок керт. Иктаж мунло еҥ «мый тидым палем» манын ойла гын, тудат тидым умылен ок керт.
*а 8:10 «Нуно ала-кунам святой верыш коштыныт, но варажым осалым ыштен илыме олаштышт мондымо лийыныт»: тидым тыгеат кусараш лиеш: «Нуно ала-кунам Юмо деке лишемыныт – Иерусалимыш святой верыш миен коштыныт, но варажым тыге ыштыме олаштышт нуным кугешнымаш авалтен».
Глава 8