Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
87 Псалом
1 Муро. Корей эрге-влакын псаломышт. Хор вуйлатышылан. Махалаф сем дене мурашлан. Езрах тукым Еманын шонкалымашыже.2 Господь, мыйым утарыше Юмем!
Кечывалымат, йӱдымат Тыйым сӧрвален кычкырем.
3 Мыйын кумалмем Тый декет миен шужо,
мыйын сӧрвалымем дек пылышетым савыре.
4 Чонем мыйын орлык дене темын,
илышем вес тӱня дек лишемын.
5 Шотлат мыйым пел йол дене шӱгарыште шогышо еҥлан,
ӱнарем йӧршеш кодын огыл,
6 улам колышо еҥ-влак коклаш кудалтыме,
шӱгарыште кийыше, пуштмо еҥ-шамыч гай –
кудышт нерген Тый от шарналте,
кидет ок полшо нунылан тетла.
7 Тый мыйым пундашдыме вынемыш,
пычкемыш поргемыш пыштенат.
8 Кугу шыдет мыйын ӱмбалнем нелемын,
толкынет-влак мыйым чот темдат.
9 Палымем-влакым мый дечем кораҥденат,
нунылан мыйым йырныкым ыштенат;
мый пуйто петырымаште улам да лектын ом керт.
10 Ойгырымем дене шинчам вудакаҥын.
Господь, кече мучко Тыйым сӧрвалем,
Тый декет кидем шуем.
11 Колышо-влаклан Тый ӧрыктарыше пашам ыштет мо?
Колышо-шамыч кынелыт да Тыйым мокташ тӱҥалыт мо?
12 Увертарат мо Тыйын порылыкет нерген шӱгарыште,
Тыйын ӱшанле улмет нерген – шӱймӧ верыште?
13 Пален налыт мо ӧрыктарыше пашат-влакым пычкемыште,
Тыйын чынлыкетым – мондымаш мландыште?
14 Но мый Тыйым, Господь, ӱжын сӧрвалем,
эр эрденак кумалмем ончыкет кондем.
15 Молан, Господь, мыйым Шке дечет поктет,
шке чуриетым мый дечем шылтет?
16 Самырык годсек мый орланем да колымаш дек чак улам,
колтымо шучкылыкет деч ӱшанем йомеш.
17 Тыйын шыдет ӱмбачем эртен каен,
лӱдыктымет мыйым темдалын.
18 Кажне кечын нуно вӱд семын авырат,
мыйым йырым-йыр темдат.
19 Мый дечем кораҥденат Тый таҥем ден йолташем,
лач пычкемыш мыйым ужатен кая.
Тау
Глава 87
