Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
83 Псалом
1 Хор вуйлатышылан. Гефысе семӱзгар дене. Корей эрге-влакын псаломышт.2 Кузе мый Тыйын илыме веретым йӧратем, Господь Саваоф!
3 Господьын пӧртшын кудывечышкыже каяш шонен,
мый чон улнен йокрокланем,
илыше Юмылан куанен мурат мыйын шӱмем ден капем.
4 Кайыкат шкаланже муын илыме верым,
вараксимат – пыжашым, кушан кушта шке игыж-влакым,
Тыйын жертвенникет дене, Господь Саваоф,
мыйын Кугыжам да мыйын Юмем!
5 Пиалан улыт Тыйын пӧртыштет илыше-влак,
нуно Тыйым чарныде моктат.
6 Пиалан айдеме, кӧн вийже Тый дечет,
кӧн шӱмыштыжӧ – Тыйын курыкышкет кӱзаш шонымаш.
7 Шортмаш лапверым эртымышт годым
нуно тудым памашан верыш савырат,
йӱрат тудым шке суапше дене леведеш.
8 Нуно, эшеат чот вийым налын,
Юмын ончыко Сионыш толыт.
9 Господь Юмо Саваоф, кол мыйын кумалмем,
Иаковын Юмыжо, колышт мыйым!
10 Юмына, мемнан аралышына!
Порын ончал шӱрен палемдыметын чурийжым,
11 вет Тыйын кудывечыштет ик кечым эртарымаш
вес вере тӱжем кече лийме деч сайрак.
Осалым ыштыше еҥын суртыштыжо илымеш
лучо мылам Юмын пӧртын омсалондемыштыже шогаш.
12 Вет Господь Юмо – кече да авыртыш,
Господь шке порылыкшым ончыкта да чапым пуа,
осал пашам ыштыде илыше еҥ деч суапым Тудо ок кораҥде.
13 Господь Саваоф, Тыланет ӱшанен илыше еҥ пиалан!
Глава 83
