Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
144 Псалом
Давидын моктымо псаломжо.1 Мыйын Юмем, мыйын Кугыжам,
мый Тыйым чапландарем,
курым-курымеш лӱметым моктем!
2 Кажне кечын мый Тыйым моктем,
лӱметым курым-курымеш чаплем.
3 Господь кӱдыратле, моктымашым сулышо,
Тудын кугулыкшым шымлен пытараш ок лий!
4 Тукым гыч тукымыш тӱҥалыт Тыйын пашатым мокташ,
Тыйын куатет нерген каласкалаш.
5 Тыйын кугулыкетын кӱдыратле чапше нерген,
Тыйын ӧрыктарыше пашат-влак нерген мый шонкалем.
6 Каласкалаш тӱҥалыт лӱдмашан пашатын куатше нерген,
ойлаш мый тӱҥалам Тыйын кугулыкет нерген.
7 Тыйын кугу порылыкетым шарнаш тӱҥалыт,
Тыйын чынлыкет нерген йывыртен мурат.
8 Господь – поро да чаманыше,
кужун чытыше да шуко порылыкан.
9 Господь чыла дек поро,
чыла шке ыштымыжым Тудо чамана.
10 Чапла тек Тыйым, Господь, чыла ыштымет,
ӱшанле-влакет тек Тыйым моктат!
11 Тек нуно кугыжанышетын чапше нерген ойлат,
Тыйын вий-куатет нерген каласкалат.
12 Куатетым да кугыжанышетын кӱдыратле чапшым
тек айдеме эрге-влак палат.
13 Тыйын кугыжанышет курымаш,
Тыйын озаланымет – тукым гыч тукымыш.
[Чыла шке мутшылан Господь ӱшанле,
чыла шке пашаштыже Тудо святой.]
14 Лунчыргышо-влаклан Господь полша,
пӱгыртымӧ-влакым Тудо чылаштым нӧлталеш.
15 Чылаштын шинчашт Тыйын ӱмбакет ӱшан дене ончат –
Тый нунылан кочкышым шке жапыштыже пуэт.
16 Чаманыде пуышо кидет дене
чыла чонаным уло кумылын пукшет.
17 Чыла шке корныштыжо Господь чын,
чыла пашаштыже Тудо поро.
18 Тудым сӧрвален ӱжшӧ-влак деке,
Тудым чын дене ӱжшӧ-влак деке Господь лишыл.
19 Тудын деч лӱдшӧ-влакын шонымыштым Тудо шукта,
полышым йодын кычкырымыштым колеш да нуным утара.
20 Тудым йӧратыше-влакым Господь чылаштым арала,
а чыла осал еҥым Тудо пытара.
21 Тек умшам чапландара Господьым,
кажне илыше Тудын святой лӱмжым тек курым-курымеш мокта!
Тау
Глава 144
