Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
101 Псалом
1 Орланышын кумалмыже, кунам тудын ӱнарже пыта да тудо Господьлан вуйым шиеш.2 Господь, мыйын кумалмемым кол,
полышым йодын кычкырымем тек Тый декет миен шуэш.
3 Ит шылте чуриетым мый дечем,
ойган кечыштем мый декем пылышетым савыре.
Тыйым ӱжын кумалмем годым мылам вашешташ вашке.
4 Шикш семын йомыныт кечем-влак,
луэм-влак пуйто тулеш когаргеныт.
5 Шӱмемже кошкен, лывыжген шудо семын,
мый эсогыл кочкашат мондем.
6 Кечкыжмем дене мый дечем
лач лу ден коваште кодыныт.
7 Лийынам мый ир мландысе пеликан гай,
шалатен кодымо олаште илыше тумна гай.
8 Ом мале мый,
леведыш ӱмбалне шинчыше шкет кайык гай улам.
9 Кажне кечын мыйым тушманем-влак шӱктарат,
мыйым мыскылыше-шамыч каргаш лӱмемым кучылтыт.
10 Кинде семын кочкам мый ломыжым,
йӱшаш вӱдышкем шинчавӱд йога,
11 вет Тый мылам сырышыч, шыдешкышыч,
мыйым налын кудалтышыч.
12 Кечем-влак кас ӱмыл семын йомыт,
шудо семын мый кошкем.
13 Но Тый, Господь, курымеш кугыжаланет,
тукым гыч тукымыш Тыйым шарнен илат.
14 Тый кынелат да Сионым чаманен налат,
вет шуын жап, жап шуын тудым серлагаш.
15 Тарзет-влаклан Сионын кажне кӱжӧ шерге,
эсогыл пуракше чаманымашым луктеш.
16 Господьын лӱмжӧ деч лӱдаш тӱҥалыт калык-влак,
Тудын чапше деч – мландысе кугыжа-шамыч.
17 Вет Господь Сионым угыч чоҥа,
шке чапше дене Тудо конча.
18 Колеш Тудо полышдымо-влакын кумалмыштым,
нунын йодмыштым шотыш налеш.
19 Шочшаш тукымлан тидын нерген возымо лиеш,
ончыкылык еҥ-влак Господьым мокташ тӱҥалыт.
20 Онча Господь святой кӱкшӧ верже гыч,
пылпомыш гыч Тудо мландыш онча.
21 Пленыш налме-влакын кечкыжмыштым Тудо колеш,
пушташ пуымо-шамычым эрыкыш луктеш.
22 Моктен увертарат Господьын лӱмжым Сионышто,
чапландарат Тудым Иерусалимыште,
23 кунам калык ден кугыжаныш-влак
Господьлан кумалаш пырля погынат.
24 Жап деч ончыч Тудо мыйым лунчыртен,
илышаш кечем кӱчыкемден.
25 Каласенам мый: Юмем, мыйым ӱмыр лугыч ит нал.
Тый тукым гыч тукымыш илет!
26 Тый, [Господь], тӱҥалтыште мландым негызленат,
кават – кидетын пашаже.
27 Нуно пытат, а Тый эре улат.
Вургем семын нуно тоштемыт,
чием семын Тый нуным вашталтет, да нуно весемыт.
28 Но Тый эре тугаяк кодат,
илышаш кечет огеш пыте.
29 Тарзет-влакын эргышт илаш тӱҥалыт тыныслын,
Тыйын чурий ончылнет нунын тукымышт пеҥгыде лиеш.
Глава 101
