Выбрать язык
Книги Ветхого Завета
Книги Нового Завета
с русским текстом7 Иовлан чыла тидым ойлымеке, Господь Феман гыч Елифазлан каласен: «Тылат да кок йолташетлан Мыйын шыдем ылыжын: те Мыйын нергенем Иов тарзем семын чын ойлен огыдал.8 Сандене, шым самырык ӱшкыж ден шым тагам налын, Мыйын Иов тарзем дек кайыза да шкаланда верч йӱлалтен пуымо надырым кондыза. Мыйын Иов тарзем тендан верч кумалеш, Мый тудын кумалмыжым шотыш налам да ушдымын ойлымыланда тендам мут кучаш ом шогалте. Вет те Мыйын нерген Иов тарзем семын чын ойлен огыдал».9 Тунам Феман гыч Елифаз, Савхей гыч Вилдад, Наама гыч Софар каеныт да Господьын кӱштымыж семынак ыштеныт, да Господь Иовын кумалмыжым шотыш налын.
10 Иовын шке йолташыж-влак верч кумалмекше, Господь тудлан мом йомдарымыжым пӧртылтен. Господь Иовлан ондак мо улмыж деч кок пачаш шукырак пуэн.11 Тудын дек чыла иза-шольыжо, ака-шӱжарже, ончычсо палымыже толыныт. Нуно тудын дене пырля пӧртыштыжӧ кочкыныт, Господьын колтымо туткар-влак деч тудым чаманен лыпландареныт. Кажныже тудлан ик кеситам*а да шӧртньӧ кӧржым пуэн.
12 Иовын пытартыш ийлажым Юмо ончычсыж деч утларак суапландарен. Тудын латныл тӱжем вуй тыгыде вольыкшо, куд тӱжем верблюдшо, тӱжем мужыр ӱшкыж ден тӱжем ава осёлжо лийын.13 Тудын эше шым эргыже да кум ӱдыржӧ шочыныт.14 Икымше ӱдыржым тудо Емима, кокымшыжым Кассия, а кумшыжым Керенгаппух*б манын лӱмден.15 Мланде ӱмбалне Иовын ӱдыржӧ гай мотор ӱдырамаш-влак лийын огытыл. Ачашт нунылан югыпогым иза-шольышт дене тӧр пуэн.16 Тидын деч вара Иов эше шӱдӧ нылле ий илен, шке эргыж ден уныкаже-влакым нылымше тукым марте ужын.17 Иов чот шоҥгеммеке, кужу ӱмырым илен эртарымеке колен.*в
*а42:11 Кесита – акрет годсо окса единице, тудын кугытшо пале огыл.
*б42:14 Тиде лӱм-влак теве мом ончыктат: Емима – кӧгӧрчен, Кассия – кассий (корице пеледыш), Керенгаппух – шинчам сӧрастарыше наста.
*в42:17 Грек Библийыште «Иовын книгаж» деке тыгай ешартыш уло: «Тыге возымо: кӧм Господь ылыжта, нунын дене пырля Иов угыч ылыж кынелеш. Сирийысе книгаште тудын нерген тыге серыме: тудо Авситидий мландыште, Идумей ден Аравий кундемлаште илен. Тудын лӱмжӧ ончыч Иовав лийын. Аравий калык гыч ӱдырым налмекше, тудын эргыже шочын, лӱмжӧ – Еннон. Иовын ачаже Исавын Зерах уныкаже лийын, а аважын лӱмжӧ Воссора улмаш. Авраам деч вара Иов визымше тукым лийын. Едомым вуйлатыше кугыжа-влак – тудым Иоват вуйлатен – теве кӧмыт лийыныт: икымше – Валаак, Веор эрге, олажын лӱмжӧ Деннава лийын. Валаак деч вара – Иовав, тудым Иов маныныт; вара – Ассом, Феман мланде гыч кугу тӧра; тудын деч вара – Адад, Варад эрге, Моав пасушто тудо Мадиамым кырен шалатен, олажын лӱмжӧ Гефем лийын. Иов деке толшо йолташыже-влак: Елифаз, Софон эрге, Исав тукым гыч – Феманын кугыжаже; Валдад, Ховар кундем гыч Амнонын эргыже – Савхейын кугыжаже; Софар – Минейын кугыжаже».
Глава 42