Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
27 Глава
1 Иов титакдыме улмыж нерген ойла. 7 Осалым ыштыше-влакым Юмын судшо вуча.1 Иов ойжым умбакыже шуен:
2 «Юмо дене товатлем –
Тудын дене, Кӧ мылам чын судым ынеж ыште,
Чылакучышо дене товатлем –
Тудын дене, Кӧ шӱм-чонем кочылык дене темен:
3 мыняр жап шӱлышем эше кӧргыштем лиеш
да Юмын шӱлалтышыже неррожыштем –
4 умшам шоякым огеш ойло,
йылмем гыч ондалчык ок лек!
5 Ом шотло мый шомакдам чынлан,
колымешкем, шкемым чын ыштышылан ужам.
6 ”Чынле улам” шонымем деч нигунам ом чакне,
илыме чыла кечемлан мыйым шӱмем ок шылтале.
7 Тек тушманем осалым ыштыше еҥлан шотлымо лиеш,
ваштарешем шогышо – осал айдемылан.
8 Молан инана Юмым шотлыдымо еҥ,
кунам тудлан мучаш толеш,
кунам тудын чонжым Юмо налеш?
9 Колеш мо Юмо тудын кычкырымыжым,
кунам тудын ӱмбак азап толеш?
10 Тӱҥалеш мо тудо Чылакучышылан куанаш,
Юмым эре ӱжын кычкыраш?
11 Увертарем мый тыланда Юмын куатше нерген,
Чылакучышын шонымашыжым ом шылте.
12 Чыла тидым ужында шкежат,
молан гын кышкеда яра шомакым?
13 Теве мо вуча осал еҥым Юмо деч,
теве мом шыгыремдыл илыше налеш Чылакучышо деч:
14 тек шуко лиеш йочаже – нуным керде пытара,
ок коч киндым теммеш тудын тукымжо.
15 Кӧ илыше кодеш – шучко чер наҥгая шӱгарыш,
шортмо йӱлам огыт керт эртарен тулык ватышт.
16 Тек тудо шийым пога пурак наре
да вургемым ямдыла лавыра наре –
17 мом ямдылымыжым чын ыштыше айдеме чия,
титакдыме еҥ тудын шийжым налеш.
18 Тудын пӧртшӧ эҥыремышвот гай,
пасушто улшо орол омаш гай.
19 Мален колта тудо поян, но ок кынел тыгае:
шинчажым почеш – йомын чыла.
20 Ташлем вӱд семын ӱмбакше шучкылык толеш,
тӱтан мардеж тудым йӱдым наҥгая.
21 Эрвел мардеж тудым нӧлталеш
да илыме верже гыч наҥгая,
22 кеч-кузе куржаш тӧча гынат,
чаманыде ӱмбакше керылтеш,
23 лач совым пералта да шӱшкалта почешыже.
Глава 27
