Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
24 Глава
1 Молан Юмо осал еҥ-влаклан осалым ышташ эрыкым пуа? 18 Осалым ыштыше еҥын пӱрымашыже.1 Молан Чылакучышо судым ыштыме жапым ок палемде?
Молан Тудым палыше-влак огыт уж нине кечылам?
2 Межам кораҥдылыт,
еҥ кӱтӱм поктен каят да шкенышт дене кӱтат.
3 Тулык йоча деч осёлым наҥгаят,
тулык вате деч залог шотеш ӱшкыжым налыт,
4 йорло-влакым корно гыч шӱкал колтат,
да чыла мыскынь еҥлан шылаш логалеш.
5 Ир мландысе осёл семын йорло-влак кинде верч тыршат,
йочаштлан тӧрверыште кочкышым кычалыт.
6 Еҥ пасушто нуно тӱредыт,
осал еҥын аҥаштыже кодшо виноградым погат.
7 Чараматын малат – уке нунын вургемышт,
нимошт уке йӱштӧ годым леведалташ.
8 Йӱр деч нӧрат нуно курыклаште,
леведыш укелан кӧра кӱ курык дек пызнат.
9 Тулык йочам чызе деч шупшын налыт,
йорло деч залог шотеш йочаштым наҥгаят.
10 Чием деч посна чара нуно коштыт,
шурно кылтам шужышо нумалыт.
11 Пырдыж коклаште олив ӱйым темден луктыт,
виноградым тошкымышт годым йӱмӧ шуын орланат.
12 Олаште еҥ-влак кечкыжыт,
сусыртымо-влак полышым йодын кычкырат,
но варгыжмыштым Юмо шотыш ок нал.
13 Улыт еҥ-влак, кӧмыт волгыдо ваштареш шогалыт,
тудын корныжым огыт пале,
тудын дене огыт кошт.
14 Волгыжмекак кынелеш еҥ пуштшо,
йорло ден незерым пытара,
а йӱдым шолыштын коштеш.
15 Яжар пӧръеҥын шинчаже пычкемышалтмым вуча.
”Нигӧ мыйым ок уж”, – тудо ойла да чурийжым петыра.
16 Пычкемыште нуно еҥ пӧртыш агаш пурат,
а кечывалым шылын шинчат – волгыдым огыт пале.
17 Тӱп пычкемыш нунылан эр семын чучеш,
вет пычкемышын лӱдыкшыж дек тунемыныт.
18 Вӱд ӱмбалысе шанчаш гай нуно улыт,
кучен илыме мландышт каргыме,
виноград аҥашкышт наҥгайыше корно пуста.
19 Кузе шокшо толмо дене шошо вӱд кошкен йомеш,
тугак языкан-влак вес тӱняш каен йомыт.
20 Нунын нерген монда ава мӱшкыр,
тамлен кочкаш тӱҥалеш нуным шукш,
нигӧ нуным тетла ок шарналте –
осал еҥ пушеҥге семын руымо лиеш.
21 Шыгыремдылыт нуно азам ыштен кертдыме, йочадыме ӱдырамашым,
нимо сайым огыт ыште тулык ватыланат.
22 Но Юмо шке куатше дене виян-влакымат темдалеш;
Тудо кынелеш, да илыше кодыт мо – нуно огыт пале.
23 Тудо нунылан лӱдыкшӧ укелык шижмашым пуа,
но коштмо корныштым эскерен шога.
24 Кӱшкӧ нуно изишлан нӧлталтыт, но теве – уке улыт,
пеледыш семын нуно тайнат да лывыжгат,
шурно парча семын тӱред налме лийыт.
25 Тиде тыге огыл гын, кӧ мыйым шоячыш луктеш,
мыйын шомакем нимошко савыра?»
Глава 24
