Библия
Выбрать язык
Книги Ветхого Завета
Книги Нового Завета
с русским текстом
ИОВЫН КНИГАЖЕ
18 Глава
Вилдадын кокымшо шомакше:Юмо осал еҥ-влакым мут кучаш шогалта.1 Тунам Савхей гыч Вилдад тыге каласен:
2 «Кунам те тыгай шомаклан мучашым пыштеда?
Шоналтыза ончыч, вара ойлаш тӱҥалына.
3 Молан мемнам вольыклан шотлаш,
молан мемнам окмакеш ужаш?
4 О тый, шыдетлан кӧра шке чонетым индырыше!
Мо, тылат кӧра мланде пустаҥшаш
але курыкоҥ верже гыч тарванышаш?
5 Титакан еҥын волгыдыжо йӧра,
тудын тулжо деч ик сескемат ок код.
6 Омашыштыже волгыдо пычкемышалтеш,
лампыже тудын ӱмбалне йӧра.
7 Пеҥгыдын ошкылмыжо вийым йомдара,
шонен пыштымыже тудым йӧрыкта,
8 вет йолжо лӧдыш пижеш,
шкеже шӧргашке логалеш.
9 Йолжо вапшышке пижеш,
ок керт тудо утлен.
10 Шолып шынденыт тудлан оптышым,
корныштыжо тудым шӧрга вуча.
11 Чыла могырым шучкылык лӱдыкта,
тудым почешыже покта.
12 Шужымо дене вийже пыта,
воктеныже тудым пытымаш вуча.
13 Коваштыжым чер пытара,
капшым колымашын кугэргыже кочкеш.
14 Ласкан илыме омашыж гыч тудым шӱдырен луктыт
да шучкылыкын кугыжаж дек наҥгаят.
15 Омашышкыже йот еҥ-влак илаш пурат,
илемже ӱмбак чӱкчыгишым
*а шават.
16 Ӱлнӧ тудын вожшо кошка,
кӱшнат укшыжо-влак лывыжгат.
17 Тудын нерген шарнымаш мландымбачын йомеш,
уремлаште лӱмжым огыт пелеште.
18 Колтат тудым волгыдо гыч пычкемышыш,
ош тӱня гычын поктен колтат.
19 Ок лий калыкше коклаште эргыжат, тукымжат,
нигӧ нунын кокла гыч ок код илыме верыштыже.
20 Тудын дене мо лиймым колын, касвелне чытырнат,
эрвелне лӱдмаш дене авалтыме лийыт.
21 Теве мо вуча осал айдемын илыме вержым,
Юмым палыдыме еҥын пӱрымашыже тыгай лиеш».
*а18:15 Чӱкчыгиш – сера, химический элемент.
Глава 18
