Выбрать язык
Книги Ветхого Завета
Книги Нового Завета
с русским текстом1 Тидын деч вара Артаксеркс кугыжа шке кугыжанышыжын чыла кундем ден теҥызысе отро-влаклан йозакым тӱлаш палемден.2 Тудын чапланыше кугу пашаж-влак нерген «Мидий да Персий кугыжа-влакын курымсерыш книгаштышт» возымо. Туштак Мардохейын кугу чапше да кугыжан тудым тыге кӱшкӧ нӧлталмыж нерген радамлен серыме.3 Иудей Мардохей кугыжанышыште Артаксеркс кугыжа почеш кокымшо шоген. Тудо иудей-влак коклаште эн лӱмлӧ, шке калыкшын йӧратыме еҥже лийын, вет тудо иудей-влак верч чот шоген, шке калыкше верч шуко тыршен.
[Мардохей тыге каласен: «Тиде Юмо деч лийын. Чыла мо лийме нерген мый омым ужынам ыле, мый тудым шарналтышым. Тушечын нимо шукталтде кодын огыл: изи памаш эҥерыш савырнен, тыгак волгыдо, кече да шуко вӱд лийыныт. Тиде эҥерже Есфирь лийын. Тудым кугыжа марлан налын да кугыжанватым ыштен. А кок дракон – тиде мый да Аман. Калык-влак – тиде иудей-влакым пытараш погынышо-шамыч. А мыйын калыкем – тиде Израиль, тудо Юмым ӱжын кумалын да утарыме лийын. Господь шке калыкшым саклен, чыла тиде осал деч мемнам утарен. Юмо кугу палдарыше пале ден ӧрыктарыше паша-влакым ончыктен, могайже моло калык коклаште лийын огытыл. Тыге Юмо деч кок тӱрлӧ шерева лийын: иктыже – Юмын калыкшылан, весыже – чыла моло калыклан. Тиде кок шерева шке жапыштыже, палемдыме шагатыште шукталтыныт. Тыге чыла моло калыклан Юмын суд кечыже толын шуын, а шке калыкшым Юмо шарналтен да чыныш луктын. Адар тылзын нине кечыже-влакым – латнылымше ден латвизымшым – Тудын Израиль калыкше курым-курымеш, тукым гыч тукымыш Юмо ончыко погынен, йывыртен да куанен пайремлаш тӱҥалеш».
Птоломей ден Клеопатран нылымше ий кугыжаланымышт годым Досифей – тудыжо «иерей да левит улам» манын ойлен – да тудын Птоломей эргыже тиде серышым Египетыш конденыт. Тудыжым Птоломейын Иерусалимыште лийше Лисимах эргыже кусарен, да тиде серыш Пурим дене кылдалтын манын ойленыт.]
Глава 10