Выбрать язык
Книги Ветхого Завета
Книги Нового Завета
с русским текстом1 Шымше тылзын, Израиль эрге-влакын шке олаштышт илаш тӱҥалмеке, уло калык ик ой дене Вӱд капка ончылно улшо погынымо верыш чумырген. Нуно закон туныктышо Ездралан каласеныт: «Господьын Израильлан пуымо Моисейын закон книгажым кондо».2 Погынышо пӧръеҥ ден ӱдырамаш, колыштын да умылен кертше чыла еҥ ончыко иерей Ездра закон книгам конден. Тиде шымше тылзын икымше кечынже лийын.3 Ездра волгыжаш тӱҥалме гыч кечывал марте Вӱд капка ончылно улшо погынымо верыште пӧръеҥ, ӱдырамаш да умылен кертше чыла еҥлан тиде книгам лудын. Уло калык пеш тӱткын колыштын.4 Закон туныктышо Ездра тудлан лӱмын чоҥымо кӱкшӧ пу кӱварыште шоген, а воктеныже, пурла велне, Маттифий, Шема, Анаий, Урий, Хелкий да Маасей, шола велныже Федаий, Мисаил, Малхий, Хашум, Хашбаддана, Захарий да Мешуллам шогеныт.5 Кунам кӱкшӧ кӱварыште шогышо Ездра пӱтынь калык шинча ончылно книгам почын, уло калык кынел шогалын.6 Ездра Господьым, кугу Юмым, чапландарен. Уло калык, кидшым кӱшкӧ нӧлталын, «аминь, аминь!» манын вашештен да Господь ончылно, сукен шинчын, вуйжым мланде марте савен.7 Левит-влак Иисус, Ваний, Шеревий, Иамин, Аккув, Шавтай, Годий, Маасей, Клита, Азарий, Иозавад, Ханан да Фелаий калыклан законым умылтареныт. Тыгодым калык шке верыштыжак шоген.8 Калык умылен кертше манын, книга гыч Юмын законым раш лудыныт, эше ешарен умылтареныт. Калык лудмым умылен.*а
9 Тунам Неемий – тудак тиршафа, – законым туныктышо иерей Ездра, тыгак калыкым туныктышо левит-влак уло калыклан каласеныт: «Таче тендан Господь Юмыдан святой кечыже. Ида ойгыро, ида шорт». Вет закон мутым колыштмо годым уло калык шортын улмаш.10 Тудо нунылан каласен: «Кайыза, эн сай кочкышым кочса, тамле йошкар аракам йӱза. Кӧн ниможат уке, кочкышдам нунын дене пайлыза, вет тиде кече – мемнан Господьнан святой кечыже. Ида ойгыро: Господь ончылно куанымыда тендам вияным ышта».11 Левит-влак, уло калыкым лыпландарен, тыге ойленыт: «Чарныза, вет тиде святой кече. Ида ойгыро».12 Тунам уло калык кочкын-йӱаш, шке кочкышыжым весе дене пайлаш, пеш кугу куан дене пайремлаш тӱҥалын, вет ойлымо шомакым нуно умыленыт.
13 Вес кечынже уло калыкын урлык вуйлатышышт, тыгак иерей ден левит-влак, законышто мом возымым умылтарыже манын, закон туныктышо Ездра деке погыненыт.14 Господьын Моисей гоч пуымо законыштыжо нуно тыге возымым муыныт: «Тек Израиль калык шымше тылзын, пайрем годым, омашыште ила».15 Сандене нуно шке олалаштышт да Иерусалимыште тыге увертарен ойленыт: «Курыкыш кайыза, олив пушеҥгын да ир оливын, миртын, пальмын да лышташан моло пушеҥгын укшлаштым кондыза да законышто возымо семын омашым ыштыза».
16 Еҥ-влак каеныт, укш-влакым конденыт да шке пӧрт ӱмбалнышт, кудывечыштышт, тыгак Юмын пӧрт кудывечыште, Вӱд капка ден Ефрем капка ончылно улшо погынымо верлаште омаш-влакым ыштеныт.17 Плен гыч пӧртылшӧ-влак чыланат шкаланышт омашым ыштеныт да тушто иленыт. Нав эрге Иисусын илыме жапше гыч тиде кече марте Израиль калык тыге ыштен огыл улмаш. Нунын куанышт пеш кугу лийын.18 Юмын законжым возыман книгам кажне кечын, икымше кече гыч пытартыш кече марте, лудыныт. Нуно шым кече пайремленыт, а кандашымше кече, законышто возымо семынак, пайремым мучашлыше кече лийын.
*а 8:8 Тиде закон книга еврей йылме дене возымо лийын, но тунам калык арамей йылме дене кутырен, сандене тиде законым умылтараш кӱлын.
Глава 8