Выбрать язык
Книги Ветхого Завета
Книги Нового Завета
с русским текстом1 Санаваллат, Товий, араб Гешем да моло тушманна мыйын ола пырдыжым ачален пытарымем колыныт. Пырдыж рож-влак тетла кодын огытыл, кеч тымарте капкалашке омса-влакым эше сакен шуктен омыл ыле.2 Тунам Санаваллат ден Гешем мый декем тыге каласаш колтеныт: «Тол, Оно тӧрверын иктаж ялыштыже вашлийына». Нуно мылам осалым ышташ шонен пыштеныт.3 Но мый нунын деке уверзе-влакем тыге каласаш колтышым: «Мый пеш кӱлешан пашам ыштем, миен ом керт. Тиде пашам коден, тендан деке каем гын, уло паша шогалеш».4 Ныл гана нуно мыйым тыге ӱжыныт, но мый нунылан саде вашмутымак пуэнам.
5 Тунам Санаваллат мый декем шке тарзыжым визымше гана колтен. Тудын кидыштыже улшо серыш печать дене петырыме лийын огыл.6 Тушто возымо лийын: «Калык-влак коклаште мут лектын, да Гешемат ойла – тый да иудей-влак пудыранчыкым нӧлталаш шонен пыштенда, садланак тый Иерусалим пырдыжым чоҥет. А тый нунын кугыжашт лийнет манын ойлат.7 Иерусалим мучко шке нергенет ”Ынде Иудан кугыжаже уло!” манын увертараш тый эсогыл пророк-влакым шогалтенат. Тиде вет кугыжа деке шуэш! Сандене тол, пырля каҥашен налына».8 Но мый тудын деке тыге каласаш колтышым: «Мо нерген тый ойлет, тыгай нимат лийын огыл. Тидым тый шке шонен луктынат».9 Тыге нуно чыланат мемнам лӱдыкташ тӧченыт. Нуно шоненыт: «Чоҥымыштым чарнат, пашаштым мучашке огыт шукто». Но мый пашам ышташ эшеат чот кумылаҥынам веле.
10 Мый Мегетавелын Делаий эргыжын Шемай эргыж деке мӧҥгышкыжӧ мийышым. Тудыжо шке пӧртыштыжӧ тӱкылалт шинчын ыле. Тудо каласыш: «Айда Юмын пӧртыш каена! Храм кӧргыш пурен, шке почешна омсам тӱкылен шындена, вет тыйым пушташ толыт. Тыйым пушташ йӱдым толыт!»11 Но мый каласышым: «Мыйын гай еҥлан куржаш лиеш мо? Храм кӧргыш пураш да шке илышем утарен кодаш кӧ мый улам? Ом кае!»12 Мый умыленам: Шемай мыйын нергенем пророклен ойлен гынат, тудым Юмо колтен огыл, тудым Товий ден Санаваллат тарленыт.13 Мый лӱдам да Шемайын каласымыж семын ыштем манын, нуно тудым окса дене шке велышкышт савыреныт. Тыге мый сулыкыш пурем, лӱмем шӱктарыме лиеш да мыйын нерген удам ойлаш тӱҥалыт манын шоненыт.
14 Юмем, тыге ыштымыштлан Товий ден Санаваллатым, тыгак пророк ӱдырамаш Ноадиям да моло пророк-влакымат шарналте! Нуно мыйым лӱдыкташ шоненыт!
15 Елул тылзын коло визымше кечынже пырдыжым ачален пытареныт. Тиде паша витле кок кече шуйнен.16 Кунам тушманна-влак тидын нерген колыныт да мемнан йыр илыше калык-влак тидым ужыныт, нунын шке вийыштлан ӱшанышт йомын. Тиде пашаште нуно мемнан Юмынан кидшым ужыныт.
17 Тиде жапыште лӱмлӧ иудей-влакат шуко серышым возеныт да Товийлан колтеныт, а Товийын серышыже-влак нунын дек толеденыт.18 Иуда мландыште шукынжо тудын дене товатмут дене пеҥгыдемдыме ойпидышым ыштеныт, вет Товий Арах эрге Шеханийын веҥыже лийын, а Товийын Иегоханан эргыже Берехийын Мешуллам эргыжын ӱдыржым марлан налын улмаш.19 Нуно мыйын ончылнем «Товий поро еҥ» манын ойленыт, а мыйын мом кутырымем Товийлан увертарен шогеныт. Товийже, лӱдыкташ манын, мылам серыш почеш серышым колтеден.
Глава 6