Выбрать язык
Книги Ветхого Завета
Книги Нового Завета
с русским текстом1 Иосий Иерусалимыште Господьын Кугече пайремжым пайремлен. Кугече пачам икымше тылзын латнылымше кечынже шӱшкылыныт.2 Иосий иерей-влакым шке пашашкышт шогалтен да нуным Господьын пӧртыштӧ служитлаш кумылаҥден.3 Господьлан святитлыме да уло Израильым туныктен шогышо левит-влаклан каласен: «Шындыза святой шондыкым храмыш, кудыжым Соломон, Давид эрге, Израильын кугыжаже, чоҥен! Тудым тыланда тетла вачӱмбалныда нумалышташ ок кӱл. Ынде шке Господь Юмыланда да Тудын Израиль калыкшылан служитлыза.4 Израиль кугыжа Давидын да тудын Соломон эргыжын палемден кодымышт семынак, шке урлыкда дене, шке пӧлкада дене шогалза.5 Тек кажне левит пӧлка святой верыште калык кокла гыч улшо иза-шольыж-влак дене пырля шогалеш.6 Кугече пачам шӱшкылза, шкендам святитлыза да, Моисей гоч пуымо Господьын шомакше дене келшышын, пачам нине иза-шольыланда ямдылыза».
7 Иосий тушто улшо калыклан кугече надыр шотеш тыгыде вольык гыч кумло тӱжем самырык тага ден казатагам, тыгак кум тӱжем вуй шолдыра вольыкым пуэн. Чыла тиде кугыжан кӱтӱж гыч лийын.8 Тудын онжо-влакат шке кумылын калыклан, иерей ден левит-шамычлан пуэныт. Юмын пӧртын вуйлатышышт Хелкий, Захарий да Иехиил иерей-влаклан кугече надыр шотеш кок тӱжем кудшӱдӧ [шорыкым, самырык тага ден казатагам], тыгак кумшӱдӧ вуй шолдыра вольыкым пуэныт.9 Левит-влакын Хонаний вуйлатышышт, тудын Шемай ден Нафанаил шольыжо-шамыч, Хашавий, Иеиел да Иозавад левит-влаклан кугече надыр шотеш вич тӱжем вуй [тыгыде вольыкым], тыгак вичшӱдӧ вуй шолдыра вольыкым пуэныт.
10 Службым тӱҥалаш чыла ямде лийын. Кугыжан кӱштымыж почеш иерей-влак шке верышкышт, а левит-шамыч шке пӧлкашт дене шогалыныт.11 Кугече пача-влакым шӱшкылыныт. Левит-влак деч пача вӱрым налын, иерей-шамыч тудым шыжыктеныт. Левит-влак тиде жапыште коваштым ньыктыныт.12 Вара левит-шамыч вольыкын шылже гыч йӱлалтен пуымо надырлан кӱлеш ужаш-влакым посна ойыреныт да калыклан урлык еда пуэденыт. Тыге нуно Моисейын книгаштыже возымо семын Господьлан йӱлалтен пуымо надырым конденыт. Тидымак шолдыра вольык дене ыштеныт.13 Йӱла почеш нуно кугече пачам тулеш кӱктеныт, а святой надыр-влакым подеш, кӧршӧкеш, мискеш шолтеныт да тунамак уло калыклан пуэденыт.14 Тидын деч вара левит-влак надыр шылым шкаланышт да иерей-шамычлан ямдыленыт, вет Аарон тукым иерей-влак йӱлалтен пуымо надыр ден вольык коям йӱд марте йӱлалтен шогеныт. Сандене левит-влак шкаланыштат, Аарон тукым иерей-шамычланат ямдыленыт.15 Асаф тукым мурызо-влакат шке верыштышт лийыныт – тыге ышташ нунылан Давид, Асаф, Еман да кугыжан ончыкужшыжо Идифун кӱштеныт. Тыгак кажне капка воктене орол-влак шогеныт. Нунылан шке паша верыштым коден каяш кӱлешыже лийын огыл, вет левит иза-шольышт чыла ямдыленыт.
16 Тыге тиде кечын Господьлан служитлыме паша ышталтын – Иосий кугыжан кӱштымыж почеш Кугечым эртареныт да Господьын жертвенникешыже йӱлалтен пуымо надырым конденыт.17 Тушто улшо израильтян-влак тунам Кугечым эртареныт да Шергинде пайремым шым кече пайремленыт.18 Тыгай Кугечым Израильыште Самуил пророкын илыме жап гычак пайремлен огытыл. Кузе Иосий да тудын дене пырля лийше иерей ден левит-влак, тыгак тиде жапыште Иерусалимыште улшо Иуда тукым эрге-шамыч ден израильтян-влак тунам пайремым эртареныт, туге Израиль кугыжа кокла гыч Кугечым нигӧ пайремлен огыл.19 Тиде Кугече пайремым Иосийын латкандашымше ий кугыжаланымыж годым эртареныт.
20 Тыгеракын, Иосий Юмын пӧртым шотыш конден [да, Господьын пӧртыштӧ иерей Хелкийын мумо книгаштыже возымо закон-влакым шукташ манын, Иерусалимыште да Иуда мландыште локтызо ден юзо-влакым, кӱкшакасе кумалме вер ден шояк юмо-шамычым, кумалме меҥге-влакым тулеш йӱлалтен. Моисейын законжо почеш Господьым уло шӱм-чонжо да уло вийже дене кычалше тыгай еҥ тудын деч ончычат, варажымат лийын огыл. Но Господьын кугу шыдыже садак лушкен огыл, вет Манассийын ыштыме чыла осал пашажлан кӧра Иудалан Господьын шыде тулжо ылыжын улмаш. Господь каласен: «Израильым кораҥдыме семын Мый Иудамат, ойырен налме Иерусалим оламат да ”тушто Мыйын лӱмем илаш тӱҥалеш” манме храмымат Шке дечем кораҥдем»]. Чыла тидын деч вара Египет кугыжа Нехао Евфрат эҥер воктенысе Кархемис ола ӱмбаке сар дене толын. Ваштарешыже Иосий кугыжа лектын.21 Нехао тудын деке шке еҥже-влакым тыге каласаш колтен: «Мый денем тыйын могай пашат, Иуда кугыжа? Мый кызыт тыйын ӱмбакет толын омыл, а мый денем кредалше-влак ваштареш каем. Юмо мыланем вашкаш кӱштен, Тудо мый денем. Юмо тыйым ынже пытаре манын, Тудлан ит торешлане».22 Но Иосий тудын деч кораҥын огыл, а кредалаш ямдылалтын. Тудо Юмын кӱштымыж почеш Нехаон каласыме шомакшым колыштын огыл да Мегиддо тӧрверыш кредалаш лектын.23 Пикшызе-влак Иосий кугыжа ӱмбаке лӱеныт, тудо шке тарзыже-шамычлан каласен: «Наҥгайыза мыйым, мый чот сусыргенам».24 Тарзыже-влак тудым сарлык орваж гыч луктыныт, вес орваш пыштеныт да Иерусалимыш наҥгаеныт. Тушто Иосий колен, тудым ача-кочаж-влакын шӱгарлаштышт тоеныт. Иосий шотышто уло Иуда мланде ден Иерусалим шортыныт.25 Иеремий тудын нерген шортмо мурым мурен. Тачысе кече мартеат пӧръеҥ ден ӱдырамаш мурызо-влак шортын мурымаштышт Иосийым шарнат. Израильыште тиде йӱлаш савырнен, нине мурым «Шортмо муро-влак» книгаште возымо.
26 Иосийын моло пашаже, Господьын законжо дене келшышын ыштыме чыла поро пашаже,27 тудын чыла мом ыштымыже «Израиль ден Иуда кугыжа-влакын курымсерыш книгаштышт» тӱҥалтыш гыч мучаш марте возымо улыт.
Глава 35