Выбрать язык
Книги Ветхого Завета
Книги Нового Завета
с русским текстом1 Езекий пӱтынь Израиль ден Иудалан увертарен, тыгак Ефрем ден Манассий тукым-влаклан серышым колтен: тек чыланат Иерусалимыш Господьын пӧртышкыжӧ Израильын Господь Юмыжын Кугече пайремжым эртараш толыт.2 Кугыжа, тудын онжо-влак да Иерусалимыште погынышо-шамыч, каҥашен налмеке, Кугече пайремым кокымшо тылзын эртараш кутырен келшеныт.3 Нуно пайремым палемдыме жапыште эртарен кертын огытыл, вет шкеныштым святитлыше иерей-влак ситен огытыл, да калыкат Иерусалимыш погынен огыл улмаш.4 Тыгай пунчал кугыжаланат, погынышо-влакланат келшен.5 Нуно тидын нерген пӱтынь Израиль мучко, Вирсавий гыч Дан марте, увертараш пунчалыныт – тек чыланат Иерусалимыш Израильын Господь Юмыжын Кугече пайремжым эртараш толыт, вет тиде пайремым, иквереш погынен, йӱла радам почеш шукертсек палемден огытыл.6 Торйол-влак,*а серышым налын, кугыжа ден он-шамыч деч каеныт. Нуно пӱтынь Израиль ден Иуда мланде мучко кугыжан кӱштымыжӧ почеш тыге увертареныт: «Израиль эрге-влак! Авраамын, Исаакын да Израильын Господь Юмыж деке савырныза! Тунам Тудо тендан деке, Ассирий кугыжа-влакын кидышт деч утаралт кодшо-шамыч деке, савырна.7 Шке ача-кочада ден иза-шольыда гай ида лий! Нуно шке кугезе кочаштын Господь Юмыжо ончылно сулыкым ыштеныт, да тидлан кӧра, кузе те ужыда, Тудо нунын ӱмбаке пытымашым колтен.8 Ача-кочада гай ӱскырт ида лий, Господь ончылно ӱҥышемза да Тудын курымешлан святитлыме святой верышкыже толза. Шке Господь Юмыланда служитлыза, тунам Тудо шыде тулжым тендан деч кораҥда.9 Господь дек савырнеда гын, иза-шольо ден йочада-влакым пленыш налше-шамыч нунын деке поро лийыт, да нунышт тиде мландыш пӧртылыт. Вет Господь, тендан Юмыда – поро да чаманыше, Тудын деке савырнеда гын, Тудо шке чурийжым тендан деч ок кораҥде».10 Торйол-влак Ефрем ден Манассий мланде мучко ола гыч олашке коштыныт, Завулон мландышкат миен шуыныт. Калык нуным воштылын да койдарен вашлийын.11 Но Асир, Манассий да Завулон тукым гыч южышт ӱҥышемыныт да Иерусалимыш толыныт.12 Иуда мланде ӱмбалне гын Юмын кидше лийын. Господьын шомакше почеш кугыжа ден он-влакын кӱштымыштым шукташ манын, тушто Юмын пуымо икоян шонымаш озаланен.
13 Кокымшо тылзын Шергинде пайремым эртараш манын, Иерусалимыш пеш шуко калык погынен.14 Нуно Иерусалимыште улшо чыла жертвенникым кораҥденыт. [Шояк юмо-влаклан] тӱтырен йӱлалтыме жертвенник-шамычым шалатеныт да Кедрон йогыныш кудалтеныт.15 Кугече пачам кокымшо тылзын латнылымше кечынже шӱшкылыныт. Иерей ден левит-влак вожылыныт да ынде шкеныштым святитленыт, вара Господьын пӧртшӧ деке йӱлалтен пуышаш надырым конденыт.16 Юмын айдеме Моисейын законжо дене келшышын, нуно йӱла радам почеш шке верышкышт шогалыныт. Иерей-влак, левит-шамычын кидышт гыч вольык вӱрым налын, шыжыктен шогеныт.17 Погынышо калык коклаште шкеныштым святитлыдыме-влак шукын лийыныт. Сандене нунын олмеш Кугече надыр пача-влакым левит-шамыч шӱшкылыныт да Господьлан пӧлекленыт.18 Калык кокла гыч шукынжо, тӱҥ шотышто Ефрем, Манассий, Иссахар да Завулон тукымла гыч улшо-влак, эрныме йӱлам эртен огытыл улмаш. Но нуно, законым пудыртен, надыр пачам кочкыныт.19 Езекий нунын верч тыге кумалын: «Поро кумылан Господь! Кӧ святой йӱла радам почеш шкенжым эрныктен огыл, но уло шӱм-чон дене Господь Юмым, шке ача-кочажын Юмыжым, кычалеш – кажне тыгай еҥын сулыкшым кудалте!»20 Господь Езекийым колын да калыкын сулыкшым кудалтен.
21 Иерусалимыште улшо Израиль эрге-влак Шергинде пайремым шым кече кугу куан дене пайремленыт. Левит ден иерей-влак, семӱзгарым шоктен, кажне кечын Господьым кугу йӱкын моктеныт.22 Езекий кажне левитым кумылаҥден, нуныжо Господьлан служитлыме пашаште кугу шинчымашым ончыктеныт. Калык шым кече пайремым ыштен да кочкын, татулык надыр-влакым конден да ача-кочаштын Господь Юмыжым чапландарен.23 Вара погынышо-влак пайремым эше шым кечылан шуяш кутырен келшеныт. Нине шым кечым нуно куанен пайремленыт,24 вет Езекий, Иуда кугыжа, погынышо калыклан тӱжем вуй ӱшкыжым да шым тӱжем вуй тыгыде вольыкым, он-влакат тӱжем вуй ӱшкыжым да лу тӱжем вуй тыгыде вольыкым пуэныт. Тиде жаплан иерей кокла гыч шукынжо шкеныштым святитлен шуктеныт.25 Уло Иуда калык, иерей ден левит-влак, Израиль гыч толшо калык, тыгак Израиль мланде гыч толшо да Иуда мландыште илыше йотъеҥ-шамычат куанен веселитленыт.26 Иерусалимыште кугу куан озаланен, вет Израиль кугыжа Соломонын, Давид эргын, илыме кечылаж деч вара тыште тыгайже лийын огыл.27 Иерей ден левит-влак кынелыныт да калыкым суапландареныт. Господь нунын йӱкыштым колын – кумалмышт пылпомышко, Тудын илыме святой верышкыже, шуын.
*а 30:6 Торйол – гонец.
Глава 30