Выбрать язык
Книги Ветхого Завета
Книги Нового Завета
с русским текстом1 Иерусалимыште илыше-влак Иорам олмеш кугыжалан Охозийым, тудын эн изи эргыжым, шогалтеныт. Кугурак эргыже-шамычым станышкышт араб-влак дене пырля толшо кугу капыр*а пуштын улмаш. Тыге Иуда кугыжанышым Иорам эрге Охозий вуйлаташ тӱҥалын.2 Кугыжалан шогалмыж годым тудо коло кок ияш лийын да Иерусалимыште ик ий вуйлатен. Аважын лӱмжӧ Гофолия, тудо Амврийын уныкаже лийын.3 Охозий Ахав тукымын корныж дене каен, вет аваже тудым осал пашам ышташ туныктен шоген.4 Ахав тукым семынак Охозий Господь шинча ончылно шуко осал пашам ыштен. Ачаже колымеке, тудлан Ахав тукым еҥ-влак каҥашым пуэн шогеныт да тудым пытымашке шуктеныт.5 Охозий нунын каҥашышт почеш Израиль кугыжа Иорам, Ахав эрге, дене Галаадысе Рамофыш Сирий кугыжа Азаил ваштареш сар дене каен. Сириян-влак Иорамым сусыртеныт.6 Рамофышто Сирий кугыжа Азаил дене кредалмыж годым сусыргымыж деч эмлалташ манын, Иорам Изреельыш пӧртылын. Иуда кугыжа Охозий, Иорам эрге, сусыргышо Иорам деке, Ахав эрге деке, Изреельыш толын.7 Иорам деке толмыжо Юмо деч лийын да Охозийлан колымашым конден. Толмекше, тудо Иорам дене пырля Ииуйым, Намессий эргым, вашлияш лектын. Ахавын тукымжым пытараш манын, тудыжым Господь ойырен налын улмаш.8 Кунам Ииуй Ахавын тукымжо дене судым ыштен, тудо Иуда калык вуйлатыше-шамычым, тыгак Охозийлан служитлыше родыжо-влакым муын да пуштын.9 Ииуй Охозийым кычалаш [кӱштен], да тудыжым руалтен кученыт – Охозий Самарийыште шылын улмаш. Тудым Ииуй дек конденыт да пуштыныт. Охозийым тыге ойлен тоеныт: «Тудо Господьым уло шӱм-чон дене кычалше Иосафатын уныкаже». Охозийын тукымыштыжо кугыжалан шогалын кертше ик еҥат кодын огыл.
10 Гофолия, Охозийын аваже, эргыжын колымыж нерген пален налмеке, Иуда кугыжа тукымысо чыла еҥым пытарен.11 Но Иосавеф, кугыжан ӱдыржӧ, пуштшаш кугыжа эрге-влак кокла гыч Охозийын Иоас эргыжым шолып луктын. Тудо Иоасым да тудым пукшышо ӱдырамашым малымверыш шылтен. Тыге Иосавеф – Иорам кугыжан ӱдыржӧ, иерей Иодайын ватыже, Охозийын шӱжарже – Иоасым Гофолия деч шылтен, да тудыжо йочам пуштын кертын огыл.12 Нуно Иоасым Господьын храмыштыже куд ий шылтен ашненыт. Тиде жапыште элым Гофолия вуйлатен.
*а 22:1 Капыр – банда.
Глава 22