Выбрать язык
Книги Ветхого Завета
Книги Нового Завета
с русским текстом1 Тидын деч вара Иосафат ӱмбак сар дене моав да аммон-влак лектыныт, нунын дене пырля икмыняр маон еҥат лийын.2 Кугыжалан увертареныт: «Тыйын ӱмбакет теҥыз вес вечын Сирий могырым пеш кугу сарзывий толеш. Тудо кызыт Хацацон-Тамарыште». Ты олам вес семынже Ен-Геди манын лӱмденыт.
3 Иосафат лӱдын, тудо Господьын чурийжым кычалын да пӱтынь Иуда мландыште пӱтым увертарен.4 Иуда эрге-влак Господь деч полышым йодаш погыненыт. Иуда мландысе чыла ола гыч нуно Господьым сӧрвален йодаш толыныт.5 Господьын пӧртыштӧ, у кудывече ончылно, Иосафат Иуда ден Иерусалимыште илыше-влакын погынымаштышт шогалын6 да каласен: «Ача-кочанан Господь Юмыжо! Тый огыл мо каваште Юмо улат? Тый чыла калыкын кугыжанышышт дене озаланет. Тыйын кидыштет вий-куат, Тыйын ваштарешет нигӧ шоген ок керт!7 Тый огыл мо, мемнан Юмына, тыште ондак илыше-влакым шке Израиль калыкетын чурийже ончыч поктен колтенат да шке Авраам йолташетын тукымжылан тиде мландым курымешлан пуэнат?8 Нуно тушто илаш тӱҥалыныт да Тыйын лӱметлан святой верым чоҥеныт, тыге ойленыт:9 ”Мемнан дек ойго толеш гын, – тиде осал чер, мут кучыктышо керде але шужымаш лийже – да ме тиде пӧрт ончылно Тыйын чурий ончыкет шогалына – вет ты пӧртыштӧ Тыйын лӱмет ила – да туткар жапыште Тыйым ӱжын кычкырена гын, Тый мемнам колат да утарет”.10 Теве кызыт аммон ден моав-шамыч да Сеир курыкышто илыше-влак мемнан ӱмбак толыт. Кунам израильтян-шамыч Египет гыч каеныт, Тый нунылан тиде калык-влакын мландышт гоч эрташ пуэн отыл, сандене израильтян-влак воктечышт эртен каеныт, нуным пытарен огытыл.11 Кызыт нине еҥ-шамыч мемнам Тыйын пуымо мландет гыч поктен колташ толыт. Теве мо дене нуно мыланна тӱлат!12 Мемнан Юмына, судитле нуным! Вет ӱмбакына толшо тиде кугу сарзывий ваштареш шогаш мемнан вийна уке. Мом ышташ – ме огына пале, но мемнан шинчана Тыйын ӱмбакет онча!»13 Иуда эрге-влак Господь ончылно шке ватышт, изи да кугу йочашт дене пырля шогеныт.
14 Погынымаш годым Асаф тукым гыч улшо левит Яхазиил, Захарий эрге, ӱмбаке Господьын Шӱлышыжӧ волен. Захарий Ванейын эргыже, тудыжо Иеиелын эргыже, а Иеиел Матфанийын эргыже лийыныт.15 Тудо каласен: «Колыштса, Иуда эрге-влак, Иерусалимыште илыше-шамыч да Иосафат кугыжа! Господь тыланда тыге ойла: тиде кугу сарзывий деч ида лӱд, ида ӧрткӧ – тиде тендан огыл, а Юмын сарже.16 Эрла ваштарешышт лекса. Нуно кызыт Циц тайыл дене кӱзат, те нуным лапвер мучаште, Иеруил ир мланде тӱҥалтыште муыда.17 Тиде гана тыланда кредалаш ок кӱл. Те шогыза да Господьын тыланда колтымо утарымашыжым ончыза. Иуда ден Иерусалим! Ида лӱд, ида ӧрткӧ. Эрла нунын ваштареш лекса, Господь тендан дене лиеш».
18 Иосафат вуйжым мланде марте савен, тыгак Иуда эрге-влак да Иерусалимыште илыше-шамыч Господь ончылно кумык возыныт.19 Кааф ден Корей тукымла гыч левит-влак Израильын Господь Юмыжым кугу йӱкын мокташ кынел шогалыныт.
20 Калык эрдене эр кынелын да Фекой ир мланде деке каен. Тарванымышт годым Иосафат лектын шогалын да каласен: «Иуда эрге-влак да Иерусалимыште илыше-шамыч, мыйым колыштса! Шке Господь Юмыланда инаныза, тунам пеҥгыдын шогаш тӱҥалыда! Тудын пророкшо-влаклан инаныза, тунам тендам сеҥымаш вуча!»21 Калык дене каҥашымеке, Иосафат мурышо еҥ-шамычым шогалтен. Сарзе-влак ончыч каен, нуно Господьым святой сӧраллык дене тыге мурен чаплышаш улыт улмаш: «Моктыза Господьым, вет порылыкшо Тудын курымеш!»
22 Кунам нуно кугу йӱкын куанен мокташ тӱҥалыныт, Иуда мландыш толшо аммон ден моав-шамыч да Сеир курыкышто илыше-влак ӱмбаке Господь засадыште шинчыше-шамычым колтен, да нуно кырен шалатыме лийыныт.23 Аммон ден моав-влак Сеирыште илыше-шамыч ӱмбак кержалтыныт да нуным икте кодде пытареныт. А вара, Сеирыште илыше-влакым кырен шалатымеке, икте-весыштым пуштеденыт.24 Кунам Иуда эрге-влак ир мландым ужаш лийме вер деке толын шуыныт да кугу сарзывийым ончышташ тӱҥалыныт, нуно мландымбалне кийыше кап-влакым веле ужыныт, илыше нигӧ лийын огыл.25 Иосафат тушко шке калыкше дене нунын мо улыштым поген налаш волен. Тушто пеш шуко погым, вургемым, шергакан арверым муыныт. Нуно тунар шуко погеныт, эсогыл чыла наҥгаен кертын огытыл. Чылаже кум кече погеныт, вет пого пеш шуко улмаш.26 Нылымше кечын нуно Моктымаш лапверыш погыненыт да тушто Господьым моктеныт. Сандене тиде верым таче кече мартеат Моктымаш лапвер манын лӱмдат.27 Вара Иуда мланде ден Иерусалимыште илыше-влак Иосафатын вуйлатымыж почеш кугу куан дене Иерусалимыш пӧртылыныт, вет тушманым сеҥымылан Господь нунылан куанымашым пуэн.28 Нуно Иерусалимыш кӱсле, арфе да той пуч йӱк дене пуреныт да Господьын пӧртшӧ деке каеныт.29 Израильын тушманже-влак дене Господьын кредалмыже нерген колмеке, тӱнясе кугыжаныш-шамычым Юмо деч лӱдмаш авалтен.30 Иосафатын кугыжанышыштыже сар тетла лийын огыл, вет Юмо тудлан чыла велымат тыныслыкым пуэн.
31 Тыге Иосафат Иуда мландыште кугыжаланен. Кумло вич ияш тудо кугыжалан шогалын да Иерусалимыште коло вич ий вуйлатен. Аважын лӱмжӧ Азува, тудо Салаилын ӱдыржӧ лийын.32 Иосафат Аса ачажын корныжым тошкен, тудын деч кораҥын огыл да Господьлан келшыше пашам ыштен.33 Лач кӱкшака-шамыч ӱмбалне улшо кумалме вер-влак кораҥдыме лийын огытыл, да калык шке ача-кочажын Юмыжым эше уло шӱм-чон дене кычалын огыл.
34 Иосафатын моло пашаже тӱҥалтыш гыч мучаш марте Ииуйын, Ананий эргын, возымаштыже серыме улыт, а тиде возымашым «Израиль кугыжа-влакын курымсерыш книгашкышт» пуртымо.
35 Но тидын деч вара Иуда кугыжа Иосафат осал пашам ыштен илыше Израиль кугыжа Охозий дене ушемым ыштен,36 да нуно Фарсисыш колтышаш корабль-влакым пырля чоҥаш кутырен келшеныт. Корабль-влакым Ецион-Гаверыште чоҥеныт.37 Тунам Елиезер, Мареша гыч Додаван эргыже, Иосафат шотышто тыге пророклен ойлен: «Охозий дене ушемым ыштыметлан Господь мо чоҥыметым шалата». Корабль-влак шаланеныт да Фарсисыш каен кертын огытыл.
Глава 20