Выбрать язык
Книги Ветхого Завета
Книги Нового Завета
с русским текстом1 Господьын храмжым чоҥымо чыла пашам пытарымеке, Соломон тушко Давид ачажын Господьлан пуымо чыла святой пӧлекшым конден. Ший ден шӧртньым, моло ӱзгарым Юмын пӧртын поянлыкым аралыме верышкыже пыштен.
2 Господьын ойпидыш шондыкшым Давид-Ола гыч – вес семынже Сион гыч – кондаш манын, Соломон Израильын кугуракше-влакым, тыгак чыла тукымвуй ден урлык вуйлатыше-шамычым шкеж деке Иерусалимыш ӱжын.3 Шымше тылзын израильтян-шамыч чыланат кугыжа деке пайремыш погыненыт.4 Кунам Израильын кугуракше-влак толыныт, левит-шамыч шондыкым нӧлталыныт5 да нумал каеныт. Шондыкым, Юмо дене вашлийме омашым да тушто улшо чыла святой арверым иерей ден левит-влак наҥгаеныт.6 А Соломон кугыжа да тудын йыр погынышо уло Израиль калык шондык ончыч каеныт да шуко тыгыде ден шолдыра вольыкым надырлан кондеденыт, нуныжын чотыштым шотлен пытарашат лийын огыл.7 Иерей-влак Господьын ойпидыш шондыкшым шке верышкыже, храм кӧргысӧ святой пӧлемыш – Святой деч святой верыш – херувим-шамычын шулдыр йымакышт шынденыт.8 Херувим-влакын шулдырышт шондык улмо вер ӱмбалне шаралтыме лийыныт, нуно шондыкым да тудым нумалме вара-шамычым леведыныт.9 Вара-влак тыгай кужу лийыныт, мучашыштым Святой деч святой вер ончылно ужаш лийын, но умбачын койын огытыл. Нуно тачат туштак улыт.10 Шондыкышто кок кӱоҥа деч моло нимо лийын огыл. Израиль эрге-шамычын Египет гыч лекмекышт да Господьын нунын дене ойпидышым ыштымекше, кӱоҥа-влакым Моисей тушко Хорив курыкышто пыштен.
11 Иерей-влак святой вер гыч лектыныт. Нуно чыланат, кеч-могай пӧлкаште лийыныт гынат, шкеныштым святитленыт улмаш.12 Чыла мурызо левит-влак – Асаф, Еман, Идифун, нунын эргышт да тукым иза-шольышт – кимвал, кӱсле да арфе дене жертвенникын эрвел могырыштыжо шогеныт, ӱмбалнышт чапле йытын вургем лийын. Нунын дене пырля той пучым пуалтыше шӱдӧ коло иерей шоген.13 Пучым пуалтыше ден мурышо-влак ик йӱкын Господьым моктен чапландареныт. Пуч, кимвал да моло семӱзгарын йоҥгымышт годым мурызо-влак Господьым «Тудо поро, порылыкшо Тудын курымеш!» манын моктеныт. Тунам пӧртым, Господьын пӧртшым, пыл темен.14 Пыллан кӧра иерей-влак шке сомылыштым умбакыже шуктен кертын огытыл, вет Юмын пӧртым Господьын чапше темен улмаш.
Глава 5