Выбрать язык
Книги Ветхого Завета
Книги Нового Завета
с русским текстом1 Давид каласен: «Теве тыште Господь Юмын пӧртшӧ да Израильын надырым йӱлалтыме жертвенникше лийыт».2 Давид Израиль мландыште илыше йотъеҥ-влакым погаш кӱштен. Юмын пӧртым чоҥашлан тудо нунын кокла гыч кӱм руышо-шамычым шогалтен.3 Капка омсалан пуда ден топса-влакым*а ышташ манын, Давид шуко кӱртньым ямдылен, тыгак висен пытараш лийдыме тойым поген.4 Эше шотлен пытараш лийдыме кедр пырням шапашлен, вет Сидонышто да Тирыште илыше-влак Давидлан шуко кедрым колтеныт улмаш.5 Давид каласен: «Мыйын Соломон эргым самырык да вийым эше поген огыл. А Господьлан чоҥышаш пӧрт кӱдыратле, мланде мучко чапланыше да пеш сӧрал лийшаш. Мый тудлан мо кӱлешым ямдылен кодем». Давид колымешкыже шуко ямдылен шуктен.6 Тудо шке Соломон эргыжым ӱжын да Израильын Господь Юмыжлан пӧртым чоҥаш кӱштен.
7 Давид Соломонлан каласен: «Эргым! Мыйын шӱмыштем Господь Юмемын лӱмжылан пӧртым чоҥаш шонымаш лийын.8 Но мыланем Господьын шомакше лийын: ”Тый шуко вӱрым йоктаренат да кугу сар-влакым ыштенат. Мыйын лӱмемлан пӧртым тый чоҥышаш отыл, вет Мыйын чурий ончылнем мландыш шуко вӱрым йоктаренат.9 Тыйын эргыч шочеш, тудын кугыжаланымыж годым тынысле илыш лиеш. Мый тудлан йырым-йыр улшо чыла тушманже деч тыныслыкым пуэм. Садлан лӱмжат Соломон*б лиеш. Тудын илыме кечылаште Мый Израильлан тыныс ден ласкалыкым пуэм.10 Тудо Мыйын лӱмемлан пӧртым чоҥа. Тудо Мыйын эргым лиеш, а Мый тудын Ачаже лиям. Мый тудын кугыжаныш престолжым Израильыште курымешлан пеҥгыдемдем”.11 Тек Господь тый денет пырля лиеш, эргым! Тунам тыйын чылажат вораҥын толеш да тый, Господь Юметын каласымыж семынак, Тудлан пӧртым чоҥет.12 Кунам Господь тыйым Израильын вуйлатышыжлан шогалта, тек тыланет уш-акыл ден умылен моштымашым пуа. Господь Юметын законжым шуктен шого.13 Господьын Израильлан Моисей гоч пуымо пунчал ден уставше-влакым шуктен шогаш тӱҥалат гын, тыйын пашат ушнен толеш. Пеҥгыде да лӱддымӧ лий, ит ӧрткӧ, вуйым ит саке.14 Чыла нелылыкым ончыде, мый Господьын пӧртшылан шӱдӧ тӱжем талант шӧртньым, миллион талант шийым, висен пытараш лийдыме той ден кӱртньым, тыгак пырня ден кӱм ямдыленам. Тидын деке тый эше ешаре.15 Тыйын пеш шуко пашазет – кӱм руышо ден пӱчкедышет, плотникет да моло пашалан мастар еҥет – улыт.16 Шӧртньӧ, ший, той да кӱртнет мыняр уло, чылажым шотлен пытарашат ок лий. Пашалан пиж, тек Господь пеленет лиеш».
17 Соломон эргыжлан полшышт манын, Израильын чыла вуйлатышыжлан Давид тыге кӱштен:18 «Господь Юмыда тендан пелен огыл мо? Тудо тыланда чыла велымат тыныслыкым пӧлеклен огыл мо? Тиде мландыште илыше-влакым Тудо мыйын кидыш пуэн. Тиде мландын озаже – Господь да Тудын калыкше.19 Тыгеракын, шӱм-чондам Господь Юмыда дек савырыза, Тудым кычалза. Господь Юмылан святой верым чоҥыза, Господьын ойпидыш шондыкшым да Юмын святой арвержым Тудын лӱмжылан чоҥымо пӧртыш пуртыза».
*а 22:3 Топса – петля.
*б 22:9 Соломон лӱм еврей йылмысе «шалом» мут деч лектын, тудыжо ’тыныс’ манмым ончыкта.
Глава 22