Выбрать язык
Книги Ветхого Завета
Книги Нового Завета
с русским текстом1 Тудо кечылаште Езекий колышаш гай черланен. Тудын дек пророк Исаий, Амос эрге, толын да каласен: «Тыге Господь ойла: пӧртет шотышто пытартыш кӱштымашым кодо – тый колет, от парем».
2 Тунам Езекий чурийжым пырдыж велыш савырен да Господьлан кумалын:3 «О, Господь, шарналте: мый Тыйын ончылнет ӱшанле лийынам, чын да шылталаш лийдымын иленам, Тылат келшыше паша-влакым ыштенам». Да Езекий чон йӧсыж дене шортын колтен.
4 Исаий ола гыч лектын шуктен огыл, тудлан Господь деч шомак лийын:5 «Мӧҥгеш пӧртыл да Езекийлан, Мыйын калыкемын вуйлатышыжлан, каласе: ”Давид кугезе кочатын Господь Юмыжо тыге ойла: кумалметым кольым, шинчавӱдетым ужым. Мый тыйым паремдем. Кумышто тый Господьын пӧртышкыжӧ кает.6 Мый ӱмыретым латвич ийлан шуем. Тыйым да тиде олам Ассирий кугыжан кидше деч утарем. Тиде олам Мый Шкаланем кӧра да Давид тарземлан кӧра арален кодем”».7 Исаий каласен: «Коштымо смоквам кондыза». Смоквам конденыт да пуалын шӱймӧ верыш пыштеныт. Езекий паремаш тӱҥалын.
8 Тунам Езекий Исаийлан каласен: «Господь мыйым паремда да кумышто Господьын пӧртышкыжӧ каем манын, могай палдарыше пале лиеш?»9 Исаий вашештен: «Господь каласыме мутшым шукта манын, теве тылат Тудын деч палдарыше пале. Каласе, тиде ӱмыллан лу тошкалтышым ончыко каяш але лу тошкалтышлан мӧҥгеш пӧртылаш?»10 Езекий каласен: «Ӱмыллан лу тошкалтышым ончыко каяш куштылго. Уке, тек ӱмыл лу тошкалтышлан мӧҥгеш пӧртылеш».11 Пророк Исаий Господьым ӱжын кумалын: Ахазын тошкалтышыж дене волышо ӱмылым Господь лу тошкалтышлан мӧҥгеш пӧртылтен.
12 Тиде жапыште Вавилон кугыжа Меродах-Баладан, Баладан эрге, Езекийын черле улмыж нерген колмеке, тудлан серыш-влакым да пӧлекым колтен.13 Колтымо еҥ-шамычым колыштмеке, Езекий нунылан шке клатше-влакым, поянлыкым аралыме верыштыже мо улмым чыла ончыктен – ший ден шӧртньым, тамлыпушан наста ден шергакан ӱй-влакым, тыгак саргурал аралыме пӧртшымат. Езекийын пӧртыштыжӧ, озанлыкыштыже нунылан ик арверат ончыктыде кодын огыл.
14 Пророк Исаий Езекий кугыжа дек толын да йодын: «Нине еҥ-влак мом ойленыт, нуно тый декет кушеч толыныт?» Езекий вашештен: «Тора мланде гыч, Вавилон гыч, толыныт».15 «Нуно тыйын пӧртыштет мом ужыныт?» – Исаий йодын. «Мо пӧртыштем лийын, чыла ужыныт. Поянлыкым аралыме верлаштем ик арверат нунылан ончыктыде кодын огыл», – вашештен Езекий.16 Тунам Исаий Езекийлан каласен: «Колышт Господьын шомакшым:17 ”Тугай жап толын шуэш, кунам пӧртыштет мо улмым, мом ача-кочат-влак таче кече марте погеныт – чыла Вавилоныш наҥгаят. Тыште нимат ок код, – тыге Господь ойла. –18 Тый дечет шочшо эргыч-влакым, тыйын тукыметым, пленыш налыт. Нуно Вавилон кугыжан полатыштыже служитлыше евнух лийыт”».19 Езекий Исаийлан каласен: «Мом тый кызыт мылам каласышыч, тиде – Господь деч сай шомак». Вара ешарен: «Тугеже, мыйын илыме жапыште тыныс да ласка илыш лиеш!»
20 Езекийын моло пашаже, чыла сеҥымашыже, пӱям да вӱдым колтымо каналым ыштымыже, олашке вӱдым пуртымыжо нерген «Иуда кугыжа-шамычын курымсерыш книгаштышт» возымо.21 Вара Езекий шке ача-кочаж-влак деке ушнен. Тудын олмеш кугыжалан Манассий эргыже шогалын.
Глава 20