Выбрать язык
Книги Ветхого Завета
Книги Нового Завета
с русским текстом1 Израиль кугыжа Иоасын, Иоахаз эргын, кокымшо ий вуйлатымыж годым Иудан кугыжажлан Амасий, Иоас эрге, шогалын.2 Кугыжаланаш тӱҥалмыж годым тудо коло вич ияш лийын да Иерусалимыште коло индеш ий вуйлатен. Аважын лӱмжӧ Иегоаддань, тудо Иерусалим гыч лийын.3 Амасий Господьлан келшыше пашам ыштен, но Давид кугезе кочаж семынак огыл. Тудо чыла шотыштат Иоас ачажын корныжым тошкен.4 Лач кӱкшакаласе кумалме вер-влак тыгак кодыныт. Калык тушто надырым конден, тӱтыртышым йӱлалтен.
5 Кунам Амасий кидыште кугыжаныш кучемвий пеҥгыдемын, тудо кугыжа ачажым пытарыше тарзыже-влакым пуштын,6 но нунын йочаштым пытарен огыл. Вет Моисейын закон книгаштыже тыге возымо лийын, Господь тыге кӱштен каласен: «Йоча-влакын титакыштлан ачаштым пушташ огеш лий. Йоча-влакат ачашт верч пуштмо лийшаш огытыл. Кажне еҥ шке сулыкшылан гына пуштмо лийшаш».7 Амасий лу тӱжем идумей сарзым Шинчалан лапверыште кырен шалатен. Тудо Села олам сеҥен налын да тудлан Иокфеил лӱмым пуэн. Таче кече мартеат тиде олам тыгак лӱмдат.
8 Тидын деч вара Амасий Израиль кугыжа Иоас дек, Ииуйын Иоахаз эргыжын эргыж дек, шке еҥже-влакым каласаш колтен: «Лек кредалаш, икте-весынам шинчаваш ужына!»9 Израиль кугыжа Иоас Иуда кугыжа Амасийлан тыге вашешташ кӱштен: «Ливан курыкысо коршаҥге Ливан кедр деке тыге ойлаш колтен: ”Шке ӱдыретым мыйын эргымлан марлан пу”. Но Ливанысе ир янлык-влак тушеч эртен каеныт да тиде коршаҥгым тошкеныт.10 Тый идумей-влакым кырен шалатенат да кугешнаш тӱҥалынат. Куане сеҥымашетлан да мӧҥгыштет шинче! Молан тый шке вуетлан кычалат? Тый пытет, тый денет пырля – Иуда».
11 Но Амасий тудым колыштын огыл, да Израиль кугыжа Иоас тудын ваштареш толын. Тудо Амасий дене, Иуда кугыжа дене, Иуда мландысе Вефсамисыште кредалаш тӱҥалын.12 Израильтян-влак Иуда калыкым кырен шалатеныт, да нунышт шке омашышкышт куржын пытеныт.13 Иуда кугыжа Амасийым, Охозийын Иоас эргыжын эргыжым, Израиль кугыжа Иоас Вефсамисыште пленыш налын. Вара Иоас Иерусалимыш каен да ола пырдыжым Ефрем капка деч Лукысо капка марте нылшӱдӧ кынергут кутышым шалатен.14 Тудо Господьын пӧртыштыжӧ да кугыжан пӧртын поянлыкым погымо верлаштыже мумо чыла шӧртньӧ ден шийым, ате-ӱзгарым поген налын. Эше заложник-влакым налын да мӧҥгеш Самарийыш пӧртылын.15 Иоасын моло пашаже, чыла мом ыштымыже, сеҥымашыже-влак, Иуда кугыжа Амасий дене кредалмыж нерген «Израиль кугыжа-шамычын курымсерыш книгаштышт» возымо.16 Вара Иоас ача-кочаж-влак деке ушнен. Иоасым Самарийыште моло Израиль кугыжа пелен тоеныт. Тудын олмеш кугыжалан Иеровоам эргыже шогалын.
17 Иуда кугыжа Амасий, Иоас эрге, Израиль кугыжа Иоасын, Иоахаз эргын, колымыж деч вара латвич ий илен.18 Амасийын моло пашаже «Иуда кугыжа-влакын курымсерыш книгаштышт» возымо.
19 Амасий ваштареш Иерусалимыште заговорым ыштеныт, да тудо Лахисыш куржын. Почешыже еҥ-влакым колтеныт, да нунышт тудым тушто пуштыныт.20 Тушечын Амасийын капшым имне дене конденыт. Тудым Иерусалимысе Давид-Олаште ача-кочаж-влак пелен тоеныт.
21 Тунам пӱтынь Иуда калык Амасий олмеш кугыжалан тудын латкуд ияш Азарий эргыжым шогалтен.22 Амасийын ача-кочаж-влак деке кайымеке, Азарий угыч Елафым чоҥен шогалтен да тудым Иудалан пӧртылтен.
23 Иуда кугыжа Амасийын, Иоас эргын, латвизымше ий вуйлатымыж годым Самарийыште Израильын кугыжажлан Иеровоам, Иоас эрге, шогалын да нылле ик ий кугыжаланен.24 Господь шинча ончылно Иеровоам шуко осал пашам ыштен. Тудо Израильым сулыкыш пуртышо Нават эрге Иеровоамын сулыкшо деч кораҥын огыл.25 Иеровоам Емафыш пурымо вер деч тӧрверысе теҥыз марте шуйналтше мландым Израильлан пӧртылтен. Тыге Израильын Господь Юмыжын шке тарзыже, Гаф-Хефер гыч пророк Иона, Амафий эрге, гоч каласыме шомакше шукталтын.26 Вет Господь Израильын кочо ойгыжым, тудын орлыкшым ужын. Тудлан полшышо нигӧ кодын огыл – тыглаят, лӱмлӧ еҥат.27 Господь Израильын лӱмжым мландымбач ӱштыл шуаш шонен огыл, сандене Тудо израильтян-влакым Иеровоамын, Иоас эргын, кидше дене утарен.
28 Иеровоамын моло пашаже, чыла мом ыштымыже, сеҥымашыже-влак, тудын кредалмыже да Иудан руалтен налме Дамаск ден Емаф ола-влакым Израильлан пӧртылтымыж нерген «Израиль кугыжа-шамычын курымсерыш книгаштышт» возымо.29 Вара Иеровоам шке ача-кочаж-влак деке, Израиль кугыжа-шамыч деке, ушнен. Тудын олмеш кугыжалан Захарий эргыже шогалын.
Глава 14