Выбрать язык
Книги Ветхого Завета
Книги Нового Завета
с русским текстом1 Гофолия, Охозийын аваже, эргыжын колымыж нерген пален налмеке, кугыжа тукымысо чыла еҥым пытарен.2 Но Охозийын Иосавеф шӱжарже, Иорам кугыжан ӱдыржӧ, Охозийын Иоас эргыжым налын да пушташ палемдыме кугыжа эрге-влак кокла гыч шолып наҥгаен. Тудо Иоасым да тудым пукшышо ӱдырамашым малымверыш шылтен. Тыге Иоас Гофолия деч шылтыме лийын, да тудым пуштын огытыл.3 Куд ий тудым Иосавеф дене Господьын храмыштыже шылтен ашненыт. Тиде жапыште элым Гофолия вуйлатен.
4 Шымше ийын Иодай капорол ден орол-влакын шӱдывуйыштым шкеж деке Господьын пӧртышкӧ погаш кӱштен. Тудо нунын дене ойпидышым ыштен да Господьын пӧртыштӧ нунын деч товатмутым налын. Вара Иодай нунылан кугыжа эргым ончыктен5 да кӱштен каласен: «Теве мом те ыштышаш улыда. Шуматкечын служитлаш толшо-влак кокла гыч ик ужашыже кугыжан полатым оролаш тӱҥалеш,6 кокымшо – Сур капкам, кумшо – капорол-влак шеҥгелне улшо капкам. Те чыланат полатым черет дене оролышаш улыда.7 А вес кок тӱшка, кӧмыт тиде шуматкечын канышаш улыт, тек Господьын пӧртшӧ воктене Иоас кугыжам оролат.8 Тудын йыр шогалза, кажнын кидыштыже саргурал лийже. Кӧ тендан деке лишемеш, кажныжым пуштса. Кугыжа кеч-кушко кайыже, воктеныжак лийза».
9 Шӱдывуй-влак чылажымат иерей Иодайын кӱштымыж семын ыштеныт. Кажныже шке еҥже-влакым – ты шуматкечын служитлаш толшо да тиде кечын каныше-шамычым – налын да иерей Иодай деке толын.10 Иерей шӱдывуй-влаклан Господьын пӧртыштыжӧ улшо Давид кугыжан умдыж ден авыртышыже-влакым пуэден.11 Орол-шамыч – кажныжын кидыштыже саргурал лийын – храмын кечывалвел гыч йӱдвел могыржо марте, жертвенник воктене да пӧрт ончылно кугыжа йыр шогалыныт.12 Иодай кугыжан эргым луктын, вуйышкыжо кугыжан вуйшӱдышым упшалтен, кидышкыже закон книгам кучыктен. Иоасым кугыжалан шӱрен палемденыт. Чыланат совыштым кыреныт да кугу йӱкын кычкыреныт: «Эсен лийже кугыжа!»
13 Калык ден орол-влакын йӱк-йӱаныштым колмеке, Гофолия нунын деке Господьын пӧртышкӧ миен.14 Тудо ужын: йӱла почеш кӱкшака верыште кугыжа шога, а тудын воктене – сарзывуй ден тӧтыретпучым пуалтыше-влак. Уло калык йывыртен йӱкланен да тӧтыретпуч дене пуалтен. Тунам Гофолия ӱмбал вургемжым кушкедын да кычкыралын: «Заговор, заговор!»15 Иерей Иодай сарзывийым вуйлатыше шӱдывуй-влаклан кӱштен каласен: «Тудым руалтен кучыза да тышечын лукса, кӧ почешыже кая – керде дене пуштса». Гофолиям Господьын пӧртыштӧ ынышт пушт манын, Иодай тыге ыштен.16 Гофолиям руалтен кученыт, имне коштмо капка гоч кугыжан пӧрт деке наҥгаеныт да тушан пуштыныт.
17 Тиде калык Господьын калыкше лийже манын, Иодай Господь да кугыжа ден калык коклаште ойпидышым ыштен. Тудо тыгак кугыжа ден калык коклаште ойпидышым ыштен.18 Вара элысе уло калык Ваалын храмышкыже каен. Нуно тудын жертвенникше-влакым сӱмыреныт, статуйжо-шамычым тӱрыснек шалатеныт. А Матфаным, Ваалын онаеҥжым, жертвенник-влак ончылнак пуштыныт. Тидын деч вара, Господьын пӧртшӧ воктене орол-шамычым кодымеке,19 Иодай шӱдывуй, капорол, орол-влак да элысе уло калык дене пырля Господьын пӧртшӧ гыч кугыжам ужатен каен да орол-шамычын коштмо капкашт гоч кугыжан пӧртыш конден. Иоас кугыжан престолыш шинчын,20 да элысе уло калыкым куан авалтен. Кугыжан пӧртыштӧ Гофолиям керде дене пуштмеке, ола лыпланен.21 Кугыжалан шогалмыж годым Иоас шым ияш лийын.
Глава 11