Выбрать язык
Книги Ветхого Завета
Книги Нового Завета
с русским текстом1 Пророк тунемше-влак Елисейлан каласеныт: «Тый денет пырля илыме вер мыланна шыгыр.2 Ме Иордан деке каена, тушто кажныже ик пырня дене налына да шкаланна илыме верым чоҥена». «Кайыза», – Елисей вашештен.3 Нунын кокла гыч иктыже каласен: «Поро лий, тыят шке тарзет-влак дене пырля кай». Елисей вашештен: «Йӧра, каем».4 Тудо нунын дене пырля каен. Нуно Иордан деке толыныт да пушеҥге-влакым руаш тӱҥалыныт.5 Кунам нунын кокла гыч иктыже пушеҥгым йӧрыктен, товарже вӱдыш пурен каен. «Ах, мыйын озам! – кычкыралын тудо. – Тиде товарым мый еҥ деч налынам!»6 Юмын еҥ йодын: «Куштырак тудо пурен каен?» Тудыжо товар пурен кайыме верым ончыктен. Тунам Елисей пушеҥге укшым руалын да тушко шуэн – товар вӱд ӱмбаке кӱзен.7 «Нал тудым», – каласен Елисей. Саде еҥ кидшым шуялтен да товарым налын.
8 Сирий кугыжа Израиль дене кредалын. Кунам тудо, тарзыж-влак дене каҥашымеке, «стан дене тыгай-тугай верыш шогалам» манын ойлен,9 Юмын еҥ Израиль кугыжа дек каласаш колтен: «Шеклане, тиде вер гоч ит кай, тушко сириян-влак волат».10 Израиль кугыжа Юмын еҥын шижтарен ойлымо верым тергаш колтен. Елисей тудым икмыняр гана шижтарен, да кугыжа тыгай верла деч шекланен.
11 Сирий кугыжа пеш чот тургыжланаш тӱҥалын. Тудо шке тарзыж-влакым ӱжын да йодын: «Каласыза, кӧ мемнан кокла гыч Израиль кугыжалан уверым пуэн шога?»12 Тарзыж-влак кокла гыч иктыже вашештен: «Нигӧ, мыйын кугыжа озам. Тиде Израильын Елисей пророкшо малыме верыштет ойлымо шомакымат Израиль кугыжалан каласкала».13 Тунам кугыжа кӱштен каласен: «Кайыза, тудын кушто улмыжым пален налза. Мый тудым кучаш еҥ-влакым колтем». Тудлан Елисейын Дофамыште улмыж нерген увертареныт.14 Тудо тушко имне ден орва-влакым, тыгак шуко сарзым колтен. Нуно йӱдым толыныт да олам авырен налыныт.15 Эр эрдене Юмын еҥын тарзыже кынелын, пӧрт гыч лектын да ужын: ола йыр сарзе-влак, имне ден орва-шамыч шогат. Тарзе Елисейлан каласен: «Ах, мыйын озам! Мом мыланна ыштыман?»16 «Ит лӱд, – вашештен Елисей. – Мемнан дене улшо-влак нунын дене улшо-шамыч деч шукырак улыт».17 Елисей тыге кумалын: «Господь! Поч тудын шинчажым, тек тудо ужеш». Господь тарзын шинчажым почын, да тудо ужын: Елисей йыр уло курык тулан имне да орва дене темын.
18 Кунам сириян-влак Елисей ӱмбаке тарваненыт, тудо Господьлан кумалын: «Нуным сокырым ыште». Йодмыж семынак, Господь сириян-влакым сокырым ыштен.19 Елисей нунылан каласен: «Тиде тудо корно да тудо ола огыл. Мыйын почешем кайыза. Кӧм кычалыда, тендам мый тудо еҥ деке наҥгаем». Елисей нуным Самарийыш вӱден каен.20 Кунам нуно Самарийыш толыныт, Елисей каласен: «Господь! Поч нунын шинчаштым, тек нуно ужыт». Господь сириян-влакын шинчаштым почын, да нуно Самарий ола покшелне улмыштым ужыныт.21 Нуным ужмеке, Израиль кугыжа Елисей деч йодын: «Мыйын ачам, ала нуным кырен шалаташ?»22 «Нуным ит пушт, – вашештен Елисей. – Керде да пикш дене пленыш налме еҥ-влакым тый пуштат ыле мо? Пу нунылан кинде ден вӱдым. Тек кочкыт, йӱыт да шке кугыжашт деке каят».23 Кугыжа нунылан кугу ӱстелым поген. Нуно кочкыныт, йӱыныт. Вара кугыжа сириян-влакым колтен, да нуно шке озашт деке пӧртылыныт. Тидын деч вара Сирий сарзе тӱшка Израиль мландыш коштмыжым чарнен.
24 Икмыняр жап гыч Венадад, Сирий кугыжа, уло сарзывийжым поген, Самарий ӱмбак толын да тудым авырен налын.25 Самарийыште кугу шужымаш тӱҥалын. Олам авырен налмылан кӧра осёл вуйым кандашле сикль шийлан, а ик урзо*а кӧгӧрчен шурым вич сикль шийлан ужаленыт.
26 Икана Израиль кугыжа ола пырдыж ӱмбалне эртен каен. Ик ӱдырамаш тудлан кычкыралын: «Кугыжа озам, мылам полшо!»27 Кугыжа вашештен: «Тылат Господь огеш полшо гын, мыйже кузе полшен кертам? Идымыште але виноградым темдыме верыште мыйын иктаж-мо уло мо?»28 Вара тудын деч йодын: «Мо лийын?» Тудо вашештен: «Теве тиде ӱдырамаш мыланем ойлен: ”Эргычым кондо, ме тудым таче кочкына, а эрла – мыйыным”.29 Ме мыйын эргым шолтышна да кочна. Мый вес кечын тудлан каласышым: ”Ынде тый шке эргычым кондо, тудым кочкына”. Но тудо шке эргыжым шылтен!»30 Ӱдырамашын тыге ойлымыж деч вара кугыжа ӱмбал вургемжым кушкедын. Кунам тудо ола пырдыж дене умбакыла каен, калык ужын: тудын ӱмбал вургемже йымалне чоштыра вургем лийын.31 Кугыжа каласен: «Елисейын, Сафат эргын, таче вуйжо верыштыжак кодеш гын, тек Господь мыйым пеҥгыдын мут кучаш шогалта!»
32 Елисей гын шке мӧҥгыштыжӧ шинчен, тудын дене пырля калык кугурак-влак лийыныт. Кугыжа тудын дек шке еҥжым колтен. Колтымо еҥын толмыж деч ончыч Елисей кугурак-влаклан каласен: «Ужыда, пуштедышын тиде эргыже мыйын вуемым руалаш шке еҥжым колтен! Кунам колтымо еҥ толеш, омсам петырыза да пеҥгыдын кучыза, тудым ида пурто. А теве почешыже толшо озажын ошкылмо йӱкшат шокта!»33 Тудо нунын дене эше кутырен пытарен огыл, колтымо еҥ толын лектын да каласен: «Тиде ойго Господь дечын. Молан эше Тудын деч полышым вучаш?»
*а 6:25 Ик урзо – еврей текстыште «ик кабын чырыкше» манын возымо, тиде 0,3 литр наре лиеш.
Глава 6