Выбрать язык
Книги Ветхого Завета
Книги Нового Завета
с русским текстом1 Тушто ик йӧрдымӧ еҥ, Вениамин тукым гыч Савей, Бихри эрге, лийын. Тудо пуч дене пуалтен да кычкыралын: «Давид дене мемнан пашана уке, Иессей эрге дене мемнан пайна уке! Израильтян-влак, мӧҥгыда, шке омашышкыда кайыза!»2 Давидым коден, израильтян-шамыч чыланат Бихри эрге Савей почеш каеныт. А Иуда тукым еҥ-влак Давид денак кодыныт, нуно тудын дене пырля Иордан деч Иерусалим марте каеныт.
3 Давид Иерусалимыш шке полатышкыже пӧртылын. Полатым оролаш кодымо лу кулватыжым тудо посна пӧртыш вераҥден, нунын дек оролым шогалтен. Давид нунылан мо кӱлешым пуэн шоген, но шкеже нунын деке коштын огыл. Кулвате-влак тушто колымешкышт тулык вате семын иленыт.
4 Давид Амессайлан каласен: «Кум кече жапыште мый декем Иуда тукымым пого, шкежат тышке тол».5 Амессай Иуда тукымым ӱжаш каен, но палемдыме жаплан поген шуктен огыл.6 Тунам Давид Авессалан каласен: «Ынде Савей, Бихри эрге, мыланна осалым Авессалом деч шукырак ышта. Мыйын еҥем-влакым нал да тудым поктен кай, уке гын тудо шкаланже чоткыдемдыме олам муэш да мемнан деч шылеш».7 Авесса дене пырля Иерусалим гыч Иоавын еҥже-влак, хелефей ден фелефей-шамыч, чыла тале тарзе-влак Савейым, Бихри эргым, поктен каеныт.8 Гаваонысо кугу кӱ деке миен шумеке, нуно корныштышт Амессайым вашлийыныт. Иоав ӱмбалне сарзе вургем лийын, а кыдал ӱштысӧ лодакыштыже керде кечен. Кунам Иоав ончыко лектын, кердыже лодак гыч лектын возын.9 Иоав Амессай деч йодын: «Кузерак илыштат, шольым?» Амессайым шупшалаш манын, Иоав тудым пурла кидше дене пондашыж гыч кучен.10 Иоавын вес кидыштыже улшо кердым Амессай шекланен огыл. Иоав кердыж дене мӱшкыржым туге шуралтен, тудыжын эсогыл кӧргӧ ӱзгарже мландышке лектын возын. Кокымшо гана шуралташ огешат кӱл улмаш – Амессай тунамак колен. Иоав ден тудын Авесса шольыжо Савейым, Бихри эргым, умбакыже поктен куржыныт.11 Иоавын еҥже-влак кокла гыч иктыже Амессай воктеке шогалын да кычкыралын: «Кӧ Иоавлан ӱшанле да кӧ Давидын могырышто – Иоав почеш кайыза!»12 [Колышо] Амессай корно покшелне вӱрвузык киен. Тудын воктене сарзе-шамычын шогымыштым ужын, саде еҥ Амессайым корно гыч ӧрдыжкӧ шӱдырен наҥгаен да ӱмбакше вургемым шуэн. Вет тудо Амессай воктене кажне эртен кайыше еҥын шогалмыжым ужын.13 Тудым корно гыч кораҥдымеке, уло калык Иоав почеш Савейым, Бихри эргым, умбакыже поктен каен.
14 А Савей чыла израиль тукымын да Берим тукымын мландышт гоч эртен да Авел-Беф-Мааха ола марте миен шуын. [Олалаште илыше-влак] погыненыт да тудын почеш каеныт.15 Иоав дене улшо еҥ-шамыч толыныт да Авел-Беф-Мааха олаште Савейым йыр авырен налыныт. Нуно мланде дене кӱкшакам ыштеныт да ола пырдыж дек лишемыныт, тудым сӱмыраш тӱҥалыныт.
16 Тунам ик мунло ӱдырамаш ола пырдыж ӱмбач кычкыралын: «Колыштса! Колыштса! Иоавлан каласыза, тек тудо тышке толеш. Мый тудын дене кутырынем».17 Иоав тудын деке лишемын. Ӱдырамаш йодын: «Тый Иоав улат?» Иоав вашештен: «Мый». Ӱдырамаш каласен: «Колышт шке тарзетын мутшым». Иоав вашештен: «Колыштам».18 Ӱдырамаш манын: «Ондак тыге ойленыт: ”Кӧ каҥашым йоднеже, тек Авельыште йодеш”, да тыге йодышым рашемденыт. [Кодыныт мо ӱшанле лияш шонышо израильтян-влак? Кодыныт мо – тек Авельыште йодыт.]19 Мемнан олана Израильыште ик эн тынысле да ӱшанле. А тый тиде олам, Израильысе [ола-влакын] аваштым, пытарынет. Молан тылат Господьын погыжым шалаташ?»20 Иоав тыге вашештен: «Мый нимомат ынем пытаре, ынем шалате! Тыгай нигунам ок лий!21 Тыште вес паша: Ефрем курык гыч ик еҥ – Савей, Бихри эрге – шке кидшым Давид кугыжа ӱмбак нӧлталын. Мылам лач тудым пуыза, тунам мый ола деч кораҥам». Ӱдырамаш Иоавлан каласен: «Тудын вуйжым тылат пырдыж гыч шуат».22 Ӱдырамаш шке ушан шомакше дене калык коклаш каен [да Бихри эрге Савейын вуйжым руалышт манын, уло олалан ойлен]. Савейын, Бихри эргын, вуйжым руалыныт да Иоавлан шуэныт. Тунам Иоав пучым пуалтен, да чыла [еҥже-влак] шке мӧҥгышкышт шаланен пытеныт. А Иоав Иерусалимыш кугыжа дек пӧртылын.
23 Иоав уло Израильын сарзывуйжо лийын, а Ваней, Иодай эрге, хелефей ден фелефей-влакым вуйлатен шоген.24 Ӧкым пашам ыштыше-влакым Адорам вуйлатен шоген, Иосафат, Ахилуд эрге, курымсерышым возышо лийын.25 Суса возкалыше, Садок ден Авиафар иерей лийыныт.26 Давидын тыгак Иар тукым гыч Ира лӱман иерейже лийын.
Глава 20