Выбрать язык
Книги Ветхого Завета
Книги Нового Завета
с русским текстом1 Давидлан увертареныт: «Филистим-шамыч Кеила ола ӱмбаке керылтыныт да идым-влакым агат».2 Давид Господь деч йодын: «Мылам кайыман мо? Филистим-влакым сеҥем мо?» Господь Давидлан вашештен: «Кай. Тый филистим-шамычым сеҥет да Кеилам утарет».3 Но Давид пелен лийше еҥ-влак каласеныт: «Мыланна эсогыл тыште, Иуда мландыште, лӱдыкшӧ. Кузе ме эше Кеилаш филистим сарзывий ваштареш каена? [Ме вет филистим пленыш логалына.]»4 Тунам Давид Господь деч уэш йодын. Господь тудлан вашештен: «Кынел да Кеилаш кай: Мый филистим-влакым тыйын кидышкет пуэм».5 Давид шке еҥже-влак дене Кеилаш каен да филистим-шамыч дене кредалын, нунын вольыкыштым поктен наҥгаен. Тудо филистим-влакым кырен шалатен да Кеилаште илыше-шамычым утарен.6 Кунам Авиафар, Ахимелехын эргыже, Давид деке куржын [да тудын дене пырля] Кеилаш толын, пеленже ефодымат налын улмаш.
7 Давидын Кеилаш толмыж нерген Сауллан увертареныт. Тудо каласен: «Юмо Давидым мыйын кидышкем пуэн, вет тудо капкан да тӱкылтышан олашке пурымыж дене шкенжым шке петырен шынден».8 Кеилаш каяш да Давид ден тудын еҥже-влакым авырен налаш манын, Саул шке сарзыж-влакым поген.
9 Саулын тудлан осалым ышташ шонымыжым пален налмеке, Давид иерей Авиафарлан манын: «[Господьын] ефодшым кондо».10 Давид каласен: «Господь, Израильын Юмыжо! Мый колынам: Саул Кеилаш толнеже да мыланем кӧра олам шалатынеже.11 Кеилаште илыше-влак мыйым тудын кидышкыже пуат мо? Тыйын тарзетын колмыж семынак Саул тышке толеш мо? Господь, Израильын Юмыжо! Шке тарзетлан тидым поч». Господь вашештен: «Толеш».12 Давид йодын: «Кеилаште илыше-влак мыйым да еҥем-влакым тудын кидышкыже пуат мо?» Господь вашештен: «Пуат».13 Тунам Давид ден тудын еҥже-влак, кудшӱдӧ наре еҥ, кынелыныт да Кеила гыч каеныт. Нуно ик вер гыч весыш кусныл коштыныт. Сауллан Давидын Кеила гыч куржмыж нерген увертареныт. Тунам Саул сар дене каяш шонымыжым вашталтен.
14 Давид ир мландысе сип верлаште, Зиф ир мландысе курыклаште лийын. Саул тудым кажне кечын кычалын, но Юмо Давидым тудын кидыш пуэн огыл.15 Давид пален налын: Саул тудын чонжым кычалаш лектын. Давид тунам Зиф ир мландысе чодыраште лийын.16 Ионафан, Саулын эргыже, Давид деке чодырашке миен да «Юмо тыйым арала» манын кумылаҥден ойлен.17 Тудо каласен: «Ит лӱд, Саул ачам тыйым ок му. Тый Израильын кугыжаже лият, а мый тыйын почешет кокымшо лиям. Мыйын Саул ачамат тидым пала».18 Нуно Господь ончылно ойпидышым ыштеныт. Давид чодыраште кодын, а Ионафан мӧҥгыжӧ пӧртылын.
19 Саул деке Гиваш зифей-влак толыныт да каласеныт: «Теве, Давид мемнан дене сип верлаште, чодыраште, Иесимон деч кечывалвелне улшо Гахил чоҥгаште, шылын ила.20 Кунам кумылет лиеш, кугыжа, мий. А ме тудым тыйын кидыш пуэна».21 Саул нунылан вашештен: «Мыйым чаманымыланда тек Господь тендам суапландара.22 Кайыза да эше ик гана терген лекса. Тудын улмо вержым да кӧ тудым ужын – пален налза, вет тудо пеш чоя манын ойлат.23 Чыла улак верым, кушто тудо шылын ила – шымлен налза да мый декем чын увер дене пӧртылза. Тунам мый тендан дене каем. Тудо Иуда мландыштак гын, тиде кундемын кеч-могай лукыштыжо лийже – мый тудым садак кычал муам».24 Нуно тарваненыт да Саул деч ончыч Зифыш каеныт. Давид ден тудын еҥже-влак тунам Маон ир мландысе тӧрверыште, Иесимон деч кечывалвелне, лийыныт.
25 Саул шке еҥже-влак дене тудым кычалаш каен. Но Давидлан тидын нерген увертареныт. Тудо кӱ курык деке волен да Маон ир мландеш кодын. Тидым пален налмеке, Саул Давид почеш Маон ир мландыш каен.26 Саул курыкын ик велныже каен, а Давид шке еҥже-влак дене вес велне лийын. Давид Саул дечын шылын каяш вашкен. А Саул шке еҥже-влак дене Давидым авырен налын да тудым руалтен кучаш ямдылалтын.27 Тиде жапыште Саул деке уверзе толын. Тудо каласен: «Вашкерак мӧҥгеш пӧртыл: мландышкына филистим-влак керылт пуреныт».28 Саул Давидым поктымыжым чарнен да филистим-шамыч ваштареш каен. Садлан тиде верым Села-Гаммахлекоф*а манын лӱмденыт.
*а 23:28 Села-Гаммахлекоф – Ойырышо кӱ курык.
Глава 23