Выбрать язык
Книги Ветхого Завета
Книги Нового Завета
с русским текстом1 Давид Рамасе Наваф гыч куржын, Ионафан деке толын да каласен: «Мом мый ыштенам? Мо дене титакыш пуренам? Ачат ончылно могай сулыкым ыштенам, молан тудо мыйым пуштнеже?»2 Ионафан тудлан вашештен: «Уке, тый от коло. Ачам нимогай пашам, тудо изи але кугу лийже, мыланем ойлыде ок ыште. Ачамлан тидым мый дечем молан шылташ? Уке, тыгай ок лий».3 Давид товатлен ойлен: «Тыйын мый декем поро кумылан улметым ачат сайын пала, садлан тудо шке семынже тыге шона: ”Ионафан ынже ойгыро, тек тудо тидын нерген ок пале”. Но Господь дене да тыйын илышет дене товатлем: колымаш марте мыланем ик йолтошкалтыш кодын».4 Ионафан Давидлан каласен: «Мом ышташ, каласе – мый тылат чыла ыштем».
5 Давид Ионафанлан каласен: «Теве эрла у тылзе, да мый кугыжа дене пырля ӱстел коклаште шинчышаш улам. Но тый мыйым колто, мый вес эрласе кас марте нуреш шылам.6 Ачат мыйын нерген йодеш гын, каласе: ”Давид мый дечем мӧҥгышкыжӧ, Вифлеемыш, миен толаш йодо. Тушто кызыт уло тукымжо идалык еда пуымо надырым конда”.7 Тидлан ”йӧра” манын каласа гын, мылам нимо деч лӱдаш, а шыдешкен кудалта гын, пален шого: тудо осал пашам ышташ шонен пыштен.8 Тыйже мылам, шке тарзетлан, порым ыште, вет тый Господь ончылно мый денем ойпидышым ыштенат. А мыйын иктаж-могай титакем уло гын, мыйым шке пушт. Молан тылат мыйым шке ачат деке наҥгаяш?»9 Ионафан каласен: «Тиде тый денет ок лий! Ачамын чынжымак тый денет осал пашам ышташ шонен пыштымыжым пален налам гын, тылат тидын нерген увертарыде ом код».10 Давид Ионафан деч йодын: «Ачат тыланет шыдын вашешта гын, мылам уверым кӧ конда?»
11 Ионафан Давидлан темлен: «Айда нурыш лектына». Нуно коктынат нурыш лектыныт.12 Ионафан Давидлан каласен: «Израильын Господь Юмыж дене товатлем – мый эрла але кумышто тиде жаплан ачам деч йодышт налам. Тудо тый декет поро кумылан гын, мый тый декет еҥым ом колто да уверым ом пу.13 Но ачам тылат осалым ышташ шона, да мый тидын нерген тылат ом увертаре, лӱдыкшӧ деч посна каяш ом пу гын, тек Господь мыйым пеҥгыдын мут кучаш шогалта. Кузе Господь ачам дене лийын, тек Тудо тый денетат лиеш!14 Но тыят, эше илем гын, мый декем Господь семынак поро лий.15 А колем гын, мыйын урлыкем деч нигунам шке порылыкетым ит нал – эсогыл тунамат, кунам Господь мландымбачын Давидын чыла тушманжым пытара».
16 Ионафан Давидын урлыкшо дене ойпидышым ыштен да каласен: «Тек Господь Давидын тушманже-влакым мут кучаш шогалта!»17 Ионафан Давидлан тудын деке пеш шӱман улмыж дене угыч товатлен, вет тудо Давидым шкенжым йӧратымыж семынак йӧратен.
18 Вара Ионафан тудлан каласен: «Эрла у тылзе. Тыйын верет яра лиеш, сандене тыйын нергенет йодышташ тӱҥалыт.19 А кумышто ондак шылме верышкет кай да тушто Азель манме кӱ воктене шинче.20 Мый тудо могырыш кум пикшым колтем, пуйто мишеньыш лӱем.21 Вара рвезым колтем, тыге каласем: ”Кай, пикш-влакым кычал му”. Мый тудлан ”пикш-влак шеҥгелнет улыт, нуным кондо” манам гын, тунам мый декем тол – лӱдыкшӧ уке. Господь дене товатлем: тунам тый денет нимо ок лий.22 Но рвезылан ”пикш-влак ончылнет улыт” манам гын, тунам кае – Господь тыйым колта.23 А мом ме шке коклаштына кутырен келшенна, тидлан Господь курымешлан танык лиеш».
24 Давид нуреш шылын. У тылзе шуын, да кугыжа кочкаш шинчын.25 Тудо молгунамсе семынак шке верышкыже, пырдыж воктеке, шинчын. Ионафан шогалын, а Авенир Саул воктеке верланен. Давидын верже яра лийын.26 Саул тиде кечын нимом каласен огыл. Тудо шоналтен: «Очыни, Давид дене ала-мо лийын, да тудо ару огыл».27 Но у тылзын кокымшо кечынжат Давидын верже яра кодын. Тунам Саул Ионафан эргыж деч йодын: «Молан Иессей эрге теҥгечат, тачат кочкаш толын огыл?»28 Ионафан Сауллан вашештен: «Давид мый дечем Вифлеемыш миен толаш йодо.29 Тудо каласыш: ”Мыйым колто, мемнан олаште тукымна надырым кондаш тӱҥалеш, изам мылам тушто лияш кӱштен. Тыйын шинчаштет поро кумылым сулен налынам гын, мыйым изам-влакым ужаш колто”. Садлан тудо кугыжа деке кочкаш толын огыл».
30 Тунам Саул Ионафанлан пеш чот шыдешкен да тудлан каласен: «Яжар ӱдырамашын шотдымо эргыже! Шкендым да аватын лӱмжым шӱктарен, Иессей эрге дене келшыметым ом пале мо?31 Иессей эргын мландымбалне илымыж годым тыйымат, кугыжа кучемвиетымат лӱдыкшӧ вуча. Кызытак еҥым колто да Давидым мый декем кондо – тудо колышаш».32 Ионафан ачажлан вашештен: «Молан тудым пушташ? Мом тудо ыштен?»33 Саул, Ионафаным пушташ манын, ӱмбакше умдым кудалтен. Тунам Ионафан ачажын Давидым пушташ шонен пыштымыжым умылен.34 Ионафан ӱстелтӧр гыч чот шыдешкыше кынелын да у тылзын кокымшо кечынже кочкынат огыл: тудо Давид верч ойгырен, адакшым ачаже тудын декат кугу торжалыкым ончыктен.
35 Вес эрдене, Давид дене кутырен келшыме жапыште, Ионафан нурыш лектын. Пеленже самырык рвезым налын.36 Ионафан тудлан каласен: «Курж, колтымо пикшем-влакым кычал». Рвезе куржын. А Ионафан пикшым тыге колтен, тудыжо рвезе деч умбакыла чоҥештен.37 Рвезе пикшым колтымо верыш куржын. Ионафан почешыже кычкыралын: «Пикш тыйын ончылнет!»38 Ионафан рвезылан адакат кычкыралын: «Курж вашкерак, ит шогал!» Рвезе пикшым налын да шке озаж деке пӧртылын.39 Тудо нимомат тогдаен огыл. Нине шомак-влак мом ончыктеныт, Ионафан ден Давид веле паленыт.
40 Ионафан йоҥеж ден пикшыжым пеленже улшо рвезылан пуэн да каласен: «Кай, тидым олашке наҥгае».41 Рвезе каен. А Давид кӱ шеҥгеч лектын, мландыш кумык возын да вуйжым кум гана савен. Нуно икте-весыштым шупшалыныт да коктынат шортыныт. Давид гын чотрак шортын.42 Ионафан Давидлан каласен: «Тыныс дене кай. Вет ме Господьын лӱмжӧ дене икте-весылан тыге товатленна: ”Тек Господь мыйын да тыйын коклаште, мыйын тукымем да тыйын тукымет коклаште курымешлан танык лиеш”».43 Давид каен, а Ионафан олашке пӧртылын.
Глава 20