Выбрать язык
Книги Ветхого Завета
Книги Нового Завета
с русским текстом1 Вениамин тукымышто Кис лӱман еҥ лийын. Тудо Авиелын эргыже, тудыжо Церонын эргыже, тудыжо Бехорафын эргыже, тудыжо Вениамин тукымысо Афийын эргыже улмаш. Кис кугун пагалыме еҥлан шотлалтын.2 Тудын Саул лӱман самырык да мотор эргыже лийын. Израильтян-влак кокла гыч тудын деч моторрак нигӧ лийын огыл. Тудо чылашт деч ик вуйлан кӱкшырак лийын.
3 Икана Кисын ава осёлжо-влак йомыныт, да тудо Саул эргыжлан каласен: «Иктаж тарзым пеленет нал да кай, ава осёл-влакым кычал».4 Нуно Ефрем курыкла гоч, Шалиша мланде гоч эртеныт, но муын огытыл. Шаалим мланде гоч эртеныт – осёл-влак туштат лийын огытыл. Вара Вениамин мланде гоч эртеныт, но садак муын огытыл.5 Цуф мландыш миен шумеке, Саул пеленже улшо тарзылан каласен: «Айда мӧҥгеш каена, уке гын ачам, осёл-влак нерген монден, мемнан верч тургыжланаш тӱҥалеш».6 Но тарзыже тудлан манын: «Тиде олаште Юмын еҥ уло, кугун пагалыме еҥ. Мом гына ок каласе – чыла тугак лиеш. Айда тушко миен толына. Ала тудо мыланна кайышаш корным каласа?»7 Саул шке тарзыжлан вашештен: «Ме каена лийже, а мом тудо еҥлан намиена? Котомкаштына кинде пытен. Юмын еҥлан пуаш пӧлекнат уке. Мо мемнан уло?»8 Тарзе Сауллан каласен: «Теве мыйын кидыштем чырык сикль ший.*а Тиде шийым мый Юмын еҥлан пуэм, да тудо мыланна кайышаш корным ойла».
9 Ондак Израильыште иктаж-кӧ Юмо деч каҥашым йодаш каен гын, тыге ойлен: «Каена, ончыкужшо деке миен толына». Вет кӧм кызыт пророк маныт, ожно ончыкужшо манын лӱмденыт.
10 Саул шке тарзыжлан каласен: «Каена, тый сай ойым пуышыч». Тыге нуно Юмын еҥ илыме олашке каеныт.11 Олашке кӱзымышт годым нуно вӱдым кошталаш лекше ӱдыр-влакым вашлийыныт да нунын деч йодыныт: «Тыште ончыкужшо уло мо?»12 Нунышт вашештеныт: «Уло. Вик кайыза, но вашкыза: кызыт тудо олаш толын, вет таче кӱкшакасе святой верыште калык надырым конда.13 Олаш пурымеке, те тудым вашлийыда – кӱкшакашке пайрем сийым кочкаш эше каен огыл. Тудын толмешкыже, калык кочкаш ок тӱҥал. Вет надырым суапландарымекыже веле ӱжмӧ еҥ-влак сийым кочкаш тӱҥалыт. Кайыза, те тудым эше вашлийыда».14 Нуно ола деке миен шуыныт. Кунам тушко пуреныт, ваштарешышт кӱкшакаш каяш тарваныше Самуил лектын.
15 А Саулын толмыж деч ик кече ончыч Господь Самуиллан шижтарен:16 «Эрла тиде жапыште Мый тый декет Вениамин мланде гыч еҥым колтем. Тый тудым Мыйын Израиль калыкемын вуйлатышыжлан шӱрен палемде. Тудо Мыйын калыкем филистим-влакын кидышт деч утара. Мый шке ончалтышем калыкем ӱмбак савыренам, вет тудын йӧсын кычкырымыже Мый декем шуын».17 Самуилын Саулым ужмекше, Господь тудлан каласен: «Теве тиде еҥ нерген Мый тыланет ойленам. Тудо Мыйын калыкем вуйлаташ тӱҥалеш».
18 Капкаште Саул Самуил деке лишемын да тудын деч йодын: «Каласе, кушто ончыкужшын пӧртшӧ?»19 Самуил Сауллан вашештен: «Ончыкужшо мый улам. Кӱкшакасе святой верышке мыйын ончычем ошкыл. Таче те мый денем кочкыда, а эрдене тыйым колтем. Мо тыйым тургыжландара, чылалан вашмутым пуэм.20 А ава осёлет-влак шотышто, кудын йоммыштлан кум кечат эртен, ит тургыжлане: нуным муыныт. Израильын чыла поянлыкше кӧн улеш? Тыйын да ачатын урлыкшын огыл мо?»21 Саул каласен: «Мый Вениаминын тукымжо гыч, Израильын эн изи тукымжо гыч, омыл мо? Мыйын урлыкемат Вениамин тукымысо урлык-влак коклаште эн изи. Молан мыланем тыгайым ойлет?»
22 Саул ден тудын тарзыжым Самуил пеленже кӱкшакаш конден, нуным пӧлемыш пуртен да ӱжмӧ кумло наре еҥ коклаште нунылан эн сай верым пуэн.23 Самуил поварлан каласен: «Мыйын тылат пуымо надыр шыл ужашым кондо, тудым мый посна пышташ каласенам ыле».24 Эрде шылым, тудын пелен мо кӱлешым повар конден да Саул ончыко пыштен. Самуил каласен: «Теве тидым тылат погынымаш жаплан кодымо ыле, тудым нал да коч. Калыкым ӱжмем нерген каласымеке, тудым тылат аралыме». Тиде кечын Саул Самуил дене пырля кочкын.25 Нуно кӱкшакасе святой вер гыч олашке воленыт, Самуил Саул дене леведыш ӱмбалне*б кутырен шинчен. [Сауллан вакшышым леведыш ӱмбалне шареныт, да тудо мален.]
26 Эрдене, ӱжара нӧлталтмеке, Самуил леведыш ӱмбалне малыше Сауллан кычкыралын: «Кынел, мый тыйым ужатен каем!» Саул кынелын, да нуно коктын пӧрт гыч лектыныт.27 Ола тӱрыш лишеммышт годым Самуил Сауллан каласен: «Тарзетлан ончыко каяш каласе, а шкеже шогал – мый тылат Юмо деч шомакым каласем». Тарзе ончыко каен.
*а 9:8 Чырык сикль – кум грамм наре.
*б 9:25 Пӧрт леведыш тусо верлаште кӱвар гай тӧр лийын, еҥ-влак тушко чӱчкыдын кӱзеныт.
Глава 9