Выбрать язык
Книги Ветхого Завета
Книги Нового Завета
с русским текстом1 Ноеминь, Руфьын авалийшыже, шешкыжлан каласен: «Ӱдырем, тыланет сай лийже манын, ала тылат еш пыжашым кычалаш?2 Теве Вооз, кудын тарзе ӱдырамашыже-влак дене пырля лийынат – мемнан родына. Таче йӱдым тудо идымыштыже шожым пуалташ тӱҥалеш.3 Мушкылт, капышкет тамлыпушан ӱйым шӱралте, [мотор] вургемет чий да идымыш кай. Но кас кочкышым ыштымешкыже, тудлан ит кончо.4 Кунам малаш возеш, вочмо вержым пален нал. Вара тушко кай, йол мучаштыже леведышым нӧлтал да тушан воч.*а Мом ышташ кӱлмым тудо тылат каласа».5 Руфь вашештен: «Чылажымат тыйын каласымет семынак ыштем».
6 Руфь идымыш каен да чылажымат авалийшыжын кӱштымыж семынак ыштен.7 Вооз кочкын-йӱын темын да шурно кышыл*б воктеке нӧлталтше кумылан малаш возын. Руфь шып гына толын, йол мучаштыже леведышым нӧлталын да тушко возын.8 Пелйӱд гутлаште Вооз помыжалт каен, кынел шинчын да ужын: йол мучаштыже ӱдырамаш кия.9 Вооз тудын деч йодын: «Тый кӧ улат?» Тудыжо вашештен: «Мый Руфь, тыйын тарзет, улам. Нал мыйым шулдыр йымакет, вет тый тукымым аралыше родына улат».10 Вооз каласен: «Ӱдырем, тек тыйым Господь [Юмо] суапландара! Кызыт тыге ыштымет ондак ыштымет дечат сай: тый самырык еҥ-влакым – йорлымат, поянымат – кычал каен отыл.11 Тыгеже, ӱдырем, ит лӱд. Мом йодметым мый чыла шуктем. Тиде олаште илыше-влак чыланат тыйын шотан улметым палат.12 Чын, мый тукымым аралыше родо лиям, но мый дечем лишылрак эше вес тыгай родо уло.13 Тиде йӱдым тыштак мале. Эрла тудо тыйым шкаланже налеш гын, тек налеш. А тидым ынеж ыште гын, Господь дене товатлем – тыйым мый налам. Эр марте тыштак мале».
14 Йол мучаштыже Руфь эр йӱд марте киен. Эше волгыжмо деч ончыч, кунам икте-весым пален керташ лийын огыл, Руфь кынелын. Вооз шоналтен: «Ӱдырамашын идымыш толмыж нерген тек нигӧ ок пале».15 Тудо Руфьлан каласен: «Ӱмбалнет улшо шальшовычет шаралтен кучо». Руфь шовычшым шаралтен кучен. Вооз куд виса шожым висен да тушко опталын, вара вачӱмбакыже нӧлтал пуэн. Тидын деч вара Вооз олашке каен.
16 А Руфь авалийшыж деке пӧртылын. Тудыжо йодын: «Кузерак вара, ӱдырем?» Воозын мом ыштымыжым Руфь чыла каласкален,17 вара ешарен: «Тиде куд виса шожым тудо мылам пуыш, авалийшет дек яра кид дене ит кай манын каласыш».18 Тунам Ноеминь каласен: «Ӱдырем, чыла тиде мо дене пытымым пален налмешкет вучалте. Шонен пыштымыжым тачак шуктыде, тиде еҥ ок лыплане».
*а 3:4 Тыгай йӱла аралаш йодмым ончыкта.
*б 3:7 Кышыл – ворох, куча.
Глава 3