Выбрать язык
Книги Ветхого Завета
Книги Нового Завета
с русским текстом1 Господьлан, тыйын Юметлан, надыр шотеш иктаж-могай экшыкан шолдыра але тыгыде вольыкым ит кондо, вет Господь Юметлан тиде йырнык лиеш.
2 Господь Юметын тылат пуымо иктаж олаштыже пӧръеҥ але ӱдырамаш Тудын ончылныжо осал пашам ышта да ойпидышыж деч кораҥеш гын, –3 кӱштымым шотыш налде, кая да вес юмо-влаклан служитлаш, нунылан кумалаш тӱҥалеш, але кечылан, але тылзылан, але шӱдыр-влаклан –4 тунам, тидын нерген пален налмеке, тиде пашам сайын шымлен лек. Тиде чыныш лектеш да ты йырнык паша Израильыште чынжымак ышталтын гын,5 тыгай осалым ыштыше пӧръеҥым але ӱдырамашым ола капка деке лук да кӱм кышкен пушт.6 Титаклыме еҥым кок але кум айдемын таныклен ойлымышт почеш гына пушташ лиеш. А кунам ик еҥ таныклен ойла – пушташ ок лий.7 Тиде еҥым пушташ манын, тек таныклыше-влак тудын ӱмбаке кӱм эн ончыч кудалтат, вара гына – моло-влак. Пытарыза шкендан кокла гыч осалым!
8 Олаштет лончылымо паша-влак коклаште тыйын ончылнет утыждене неле йодыш шогалеш гын, – мутлан, пуштмаш але иктаж-могай ӱчашымаш, але эҥгекым ыштымаш, – да тидын шотышто ик ой огеш лий гын, тунам [Господь Юметын лӱмжым ӱжын кумалаш манын,] Тудын ойырен налме верышкыже кай.9 Кай левит иерей-влак деке да тиде жаплан шогалтыме судья деке, йод нунын деч – мом ыштышаш нерген пунчалым нуно луктыт.10 Господь [Юметын Тудын лӱмжым ӱжын кумалаш] ойырен налме верыште лукмо пунчалым тый шуктышаш улат. Чылажымат каласымышт семын ыште.11 Чылажымат нунын туныктымо законышт почеш ыште, лукмо пунчалыштым шукто. Каласымышт деч шолашкат, пурлашкат ит кораҥ.12 А кӧ Господь, тыйын Юмет, ончылно служитлыше иерейын але [тиде жапыште ыштыше] судьян мутшылан тореш лияш тоштеш да тудым ок колышт – тыгай еҥым пуштман. Пытарыза Израиль гыч осалым!13 Тидын нерген колын, тек уло калык лӱдеш, да тек ончыкыжым нигӧ мут колыштдымо ок лий.
14 Кунам те Господь Юмыдан тыланда пуымо мландышкыже пуреда, тудым сеҥен налын, тушто илаш тӱҥалыда, те тыге каласеда: ”Йырым-йыр улшо моло калык семын шкаланна кугыжам шогалтена”.15 Тунам те кугыжалан Господь Юмыдан ойырен налме еҥжым шогалтыза. Тек тудо тендан калык гыч, иза-шольыда кокла гыч лиеш. Тендам вуйлатыше кугыжа йот калык еҥ кокла гыч лийшаш огыл.16 Тек тудо утыждене шуко имньым ок кучо, имне чотым кугемдаш манын, еҥ-влакым Египетыш ок колто. Вет Господь тыланда каласен: ”Тиде корно дене тетла мӧҥгеш ида кай”.17 Тек кугыжан шуко ватыже ок лий, вет тиде Господь деч кораҥмашке шуктен кертеш. Тыгак кугыжа шкаланже ший ден шӧртньым утыждене ынже шукемде.18 Тек тудо, престолыш шичмекше, левит иерей-влак дене аралалтше тиде законым шкаланже возен налеш.19 Тек возен налме тиде книга пеленже лиеш, да тек ӱмыржӧ мучко тудым лудын шога. Тыге кугыжа шке Господь Юмыж деч лӱдаш да законысо чыла шомак ден пунчал-влакым шуктен шогаш тунемеш,20 шкенжым калык деч кугуэш ужаш ок тӱҥал, закон дечын шолашкат, пурлашкат ок кораҥ. Тунам тудо шкеже да эрге-уныкаже-влак Израильыште кужу жап кугыжаланаш тӱҥалыт.
Глава 17