Выбрать язык
Книги Ветхого Завета
Книги Нового Завета
с русским текстом1 Манассий тукымысо Хефер эрге Салпаадын ӱдыржӧ-влак толыныт. Хеферже Галаадын эргыже, Галаад Махирын эргыже, Махир Манассийын эргыже, а Манассий Иосифын эргыже лийын. Теве ӱдыр-влакын лӱмышт: Махла, Ноа, Хогла, Милка да Фирца.2 Нуно Моисей, иерей Елеазар, калык вуйлатыше-влак да пӱтынь калык ончыко Юмо дене вашлийме омашыш пурымо вер деке толыныт да тыге каласеныт:3 «Мемнан ачана ир мландыште колен. Тудо Господь ваштареш шогалше Корейын еҥже-влак коклаште лийын огыл. Ачана шке сулыкшо верч колен, а эргыж-влак тудын лийын огытыл.4 Эргыже укелан кӧра ачанан лӱмжӧ тудын тукымжо кокла гыч йомшаш мо? Ачанан иза-шольышт коклаште мыланнат мландым пуыза».
5 Моисей тиде йодышым Господь ончыко конден.6 Господь тудлан каласен:7 «Салпаад ӱдыр-влак чын ойлат: ачажын иза-шольышт коклаште нуныланат мландым пу – тек ачаштлан логалшашлык мланде ӱдырыштлан кусна.8 Израиль калыклан увертаре: пӧръеҥ кола да тудын эргыже уке гын, мланде пайжым ӱдыржылан пуыза.9 А ты еҥын ӱдыржат уке гын, тудын мландыжым иза-шольыжлан пуыза.10 Ты еҥын иза-шольыжат уке гын, тудын мландыжым ачажын иза-шольыжлан пуыза.11 А ачажын иза-шольыжат уке гын, тунам тиде мланде эн лишыл родо-тукымжылан кодеш. Тек тиде Израиль калыклан шуктен шогышашлык закон лиеш. Господь Моисейлан тыге кӱштен каласен».
12 Господь Моисейлан каласен: «Аварим курыкыш, [Иордан эҥерын тиде велныже улшо Нево курыкыш,] кӱзӧ да израиль калыклан Мыйын пуымо [Ханаан] мландым ончал.13 Тиде мландым ужмекет, Аарон изатын [Ор курыкышто] кайымыж семынак тыят шке кугезе кочат-влак деке кает.14 Кунам Син ир мландыште калык пудыранен, те Мыйын кӱштымем шуктен огыдал – тушто, вӱд воктене, нунын ончылно Мыйын святой улмем ончыктен огыдал». [Тиде Син ир мландысе Кадес деч тора огыл улшо Мерива вӱд лийын.]
15 Моисей Господьлан вашештен:16 «Тек Господь, чыла илышылан шӱлышым пуышо Юмо, тиде калыклан вуйлатышым шогалта.17 Тиде еҥ калык ончылно лиеш да нуным вӱден наҥгая. Тек Господьын калыкше кӱтӱчӧ деч посна улшо шорык кӱтӱ гай ок лий».
18 Господь Моисейлан каласен: «Нав эрге Иисусым, Юмын Шӱлышан айдемым, ӱж да тудын ӱмбаке кидетым пыште.19 Тудлан иерей Елеазар да уло калык ончылан шогалаш кӱштӧ, чылашт ончылно тудлан мом ышташ кӱлмым каласе.20 Уло израиль калык тудым колыштшо манын, шке кучемвиетым тудын дене пайле.21 Иисус иерей Елеазар деке толедаш тӱҥалеш, а Елеазар урим полшымо дене Господь деч вашмутым йодеш. Иисус да уло израиль калык тудын мутшо почеш кайышаш да тудын мутшо почеш толшаш улыт».
22 Моисей Господь [Юмын] кӱштымыжым шуктен: Иисусым ӱжын, иерей Елеазар да уло израиль калык ончылан шогалтен.23 Вара тудо Иисус ӱмбаке шке кидшым пыштен да тудым у вуйлатышылан шогалтен. Тыге ышташ тудлан Господь кӱштен.
Глава 27