Выбрать язык
Книги Ветхого Завета
Книги Нового Завета
с русским текстом1 Валаам Валаклан каласен: «Тышан мыланем шым жертвенникым чоҥо да надырлан шым самырык ӱшкыж ден шым тагам ямдыле».2 Валак Валаамын йодмыжым шуктен. Нуно кажне жертвенникеш надырлан ик ӱшкыж ден ик тагам конденыт.3 Валаам Валаклан каласен: «Йӱлалтен пуымо надыр воктенетак шого, а мый кораҥам – ала Господь мый денем вашлияшлан лектеш. Мом Тудо мылам увертара – мый тылат каласем». Валак [шке йӱлалтен пуымо надырже воктене кодын, а Валаам] кӱкшака верыш [Юмо деч каҥашым йодаш] каен.
4 Тушто тудым Юмо вашлийын. «Мый шым жертвенникым чоҥенам, – каласен Валаам, – кажныштыже надырлан ик ӱшкыж ден ик тагам конденам».5 Господь Валаамын умшашкыже ойлышаш шомакым пыштен да каласен: «Валак деке пӧртыл да тыге ойло».6 Валаам Валак деке пӧртылын, тудыжо Моавын онжо-влак дене пырля шке йӱлалтен пуымо надырже воктене шоген. [Валаам ӱмбаке Юмын Шӱлыш волен,]7 да тудо пророк шомакшым увертарен:
«Мыйым Валак Месопотамий гыч ӱжын,
Моав кугыжа эрвел курыкла гыч конден:
”Тол – мыланем Иаковым карге,
тол – осалым ӱж Израиль ӱмбаке!”
8 Кузе мый каргем? Юмо тудым ок карге!
Кузе мый осалым ӱжам?
Господь [тудын ӱмбак] осалым ок колто!
9 Тиде калыкым кӱ курык ӱмбачын ужам,
кӱкшака гыч мый тудым ончем.
Тиде калык посна ила, моло калык чотыш шкенжым ок пурто.
10 Иаковын ошма пырче наре улмыжым,
Израильын кеч чырык ужашыжым кӧ шотлен луктеш?
Тек мый чын ыштыше еҥын колымашыж дене колем,
тек мыйын мучашем нунын гае лиеш!»
11 Тунам Валак Валаамлан каласен: «Мом тый мый денем ыштет? Мый тыйым тушман-влакем каргаш ӱжынам, а тый нуным суапландарет!»12 Валаам вашештен: «Могай шомакым Господь умшашкем пышта, мый лач тудым ойлышаш омыл мо?»
13 Тунам Валак тудлан каласен: «Айда мый денем вес вере каена – тушеч тый тиде калыкым ужат, чылаштымак огыл, а ужашыжым веле. Тушечын нуным мыланем карге».14 Тудо Валаамым Фасга курык вуй воктене улшо Оролымо верыш наҥгаен. Тушан шым жертвенникым чоҥен да кажныштыже надырлан ик самырык ӱшкыж ден ик тагам конден.15 Валаам Валаклан каласен: «Йӱлалтен пуымо надыр воктенет тыштак шого, а мый тушко Юмо дене вашлияш каем».
16 Господь Валаам дене вашлийын да каласышаш шомакым тудын умшашкыже пыштен. «Валак деке пӧртыл да тыге ойло», – Тудо каласен.17 Валаам Валак деке пӧртылын. Тудыжо Моавын онжо-влак дене пырля шке йӱлалтен пуымо надырже воктене шоген. Валак тудын деч йодын: «Господь мом каласыш?»
18 Валаам пророк шомакшым увертарен:
«Шогал, Валак! Колышт мыйым, Сепфор эрге!
19 Юмо айдеме огыл – Тудо ок шойышт!
Юмо айдеме эрге огыл – шке шонымыжым ок вашталте!
Мом каласымыжым Тудо ок ыште мо?
Мом сӧрымыжым Тудо ок шукто мо?
20 Господь мылам суапландараш кӱштен,
Господь суапландара гын, мый тидым ом керт вашталтен.
21 Иаков дене нимогай азап уке,
нимогай туткар ок кой Израильыште.
Господь Юмо – нунын дене!
Нуно Тудым Кугыжа семын йывыртен вашлийыт!
22 Юмо тиде калыкым Египет гыч луктын,
Тудын вийже – ир ӱшкыжын тӱкыж гай.
23 Нимогай локтымашым муаш ок лий Иаковлан,
нимогай юзо вий шогалтен ок керт Израильым.*а
Тыге каласат Иаков да Израиль нерген:
’Теве мом Юмо ыштен!’
24 Ава лев семын тарвана тиде калык,
лев семын тудо кынелеш –
поктен кучымыжым кочмешке,
пуштмо-влакын вӱрыштым йӱмешке,
2 канаш тудо ок воч».
25 Валак тунам Валаамлан каласен: «Тугеже, нуным каргашат ит карге да суапландарашат ит суапландаре!»26 Валаам тудлан вашештен: «Мом мыланем Господь кӱшта, мый тудым гына ышташ тӱҥалам манын ойлен омыл мо?»
27 Валак Валаамлан каласен: «Айда мый тыйым вес вере наҥгаем. Тушеч тый нуным каргет гын, ала тидын дене Господь келша?»28 Валак Валаамым ир мланде могырыш ончышо Фегор курык вуйыш намиен.29 «Тышан мылам шым жертвенникым чоҥо, – каласен Валаам, – да надырлан шым самырык ӱшкыж ден шым тагам ямдыле».30 Валак Валаамын каласымыж семынак ыштен: кажне жертвенникыште надырлан ик ӱшкыж ден ик тагам конден.
*а 23:23 Тыште мом возымым тыгеат кусараш лиеш: «Нимогай локтымашым муаш ок лий Иаков дене, нимогай юзо вий уке Израильыште».
Глава 23