Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Израиль эрге-влаклан ойло: кунам те Мыйын тыланда илаш пуымо мландыш пуреда3 да тушто шолдыра але тыгыде вольыкым Господьлан келшыше тамлыпушан надыр шотеш кондеда – тиде йӱлалтен пуымо але шӱшкылмӧ надыр, сӧрымӧ почеш але шке кумылын кондымо, але пайрем надыр лийже –4 Господьлан надырым кондышо еҥ тыгак кинде надыр шотеш ефан ик луымшо ужашыже эн сай ложашым, чырык гин олив ӱй дене йӧрымым, кондышаш.5 Йӱлалтен пуымо але шӱшкылмӧ надырлан кондымо кажне пача дене пырля [Господьлан келшыше тамлыпушан надыр шотеш] чырык гин йошкар арака надыр лийшаш.6 Надырлан тагам кондет гын, кинде надыр шотеш ефан кок луымшо ужашыже эн сай ложашым, гинын кумшо ужашыже олив ӱй дене йӧрымым, кондо.7 Тыгак чырык гин йошкар арака надырым кондо. Тиде Господьлан келшыше тамлыпушан надыр лиеш.
8 Господьлан сӧрымым шукташ але татулык надырым пуаш манын, йӱлалтен пуымо але шӱшкылмӧ надыр шотеш самырык ӱшкыжым кондет гын,9-10 ӱшкыж дене пырля эше кинде надырлан ефан кум луымшо ужашыже эн сай ложашым, пел гин олив ӱй дене йӧрымым, тыгак пел гин йошкар арака надырым кондо. Тиде Господьлан келшыше тамлыпушан надыр лиеш.11 Кажне ӱшкыжым, тагам, пачам але казапачам кондымет годым тыге ыште.12 Мыняр вуй вольыкым надырлан кондеда, кажныж дене тыге ыштыман.
13 Кажне израиль еҥ Господьлан келшыше тамлыпушан надырым кондымыж годым тыге ыштышаш.14 Йот калык кокла гыч иктаж еҥ тендан дене жаплан але эрелан илаш кодеш да Господьлан келшыше тамлыпушан надырым кондынеже гын, тудат тендан семынак ыштышаш.15 Закон чылалан икгай: тыландат, [Господьын калыкше,] да [тендан дене] илыше йотъеҥланат. Тиде курым-курымешлан тукым гыч тукымыш шуктен шогышашлык закон. Те да йотъеҥ-влак Господь ончылно иктӧр лийыда.16 Тыландат, тендан дене илыше йотъеҥланат – ик закон да ик пунчал».
17 Господь Моисейлан каласен:18 «Израиль калыклан увертаре: тендам Мый сӧрымӧ мландышкем наҥгаем, кунам те тушко пуреда19 да тудо мландысе киндым кочкаш тӱҥалыда, нӧлтал пуымо пӧлекым Господьлан кондыза.20 У шурно лектыш дене ыштыме руаш гыч лепошкам кӱэштын, тудым нӧлтал пуымо пӧлеклан кондыза. Идым гыч кондымо кинде надыр семын тудым нӧлтал пуыза.21 У шурно лектыш дене ыштыме руаш деч Господьлан тыгай пӧлекым тукым гыч тукымыш пуэн шогыза.
22 Господьын Моисейлан каласыме чыла нине кӱштымашым те шке йоҥылышланда кӧра огыда шукто гын, –23 Господь [Юмын] Моисей гоч пуымо законжо гыч иктаж-мом пудыртеда гын, теве мом тыланда ыштыман, теве мом те Господьын кӱштымашым пуымо кечыж гыч тӱҥалын, тукым гыч тукымыш шуктен шогышаш улыда.24 Тиде йоҥылышыжо калык шинчалан койде ышталтын гын, тек уло калык Господьлан келшыше тамлыпушан надыр шотеш ик самырык [экшыкдыме] ӱшкыжым йӱлалтен пуа. Тудын дене пырля, йӱла дене келшышын, кинде надыр ден йошкар арака надырым, тыгак сулык верч надырлан казатагам кондышаш.25 Тыге иерей уло израиль калык дене касарыме йӱлам шукта, да нунын титакышт кудалтыме лиеш. Вет нуно тидым йоҥылыш ыштеныт да Господьлан надыр шотеш шке пӧлекыштым конденыт. Господь ончылно ыштыме сулыкыштлан, шке йоҥылышыштлан нуно надырым конденыт.26 Тыге уло израиль калыкын да нунын коклаште илыше йот калык еҥын сулыкышт кудалтыме лиеш, вет тиде сулыкым нуно палыде ыштеныт.
27 Но иктаж еҥ шкетын, йоҥылышым ыштен, сулыкыш пура гын, тек тудо сулык верч надырлан идалыкаш казам конда.28 Господь ончылно сулыкыш йоҥылыш пурышо тиде еҥ дене иерей тек касарыме йӱлам эртара. Тидым шуктымеке, ты еҥын титакше кудалтыме лиеш.29 Израиль еҥланат, тендан дене илыше йотъеҥланат, кӧ сулыкыш йоҥылыш пурен – закон икте.
30 Но иктаж-кӧ – израиль еҥ але йотъеҥ – паленак сулыкым ышта гын, тидын дене тудо Господьым мыскыла. Тыгай еҥ калык кокла гыч кораҥдыме лийшаш.31 Тудо Господьын шомакшым шотлен огыл, Тудын кӱштымыжым пудыртен. Шке сулыкшылан тудо мутым кучышаш – тудо пытарыме лийшаш».
32 Кунам израиль эрге-влак ир мландыште лийыныт, шуматкечын пум погышо ик еҥым кученыт.33 Кучышо-влак тудым Моисей ден Аарон да уло [израиль] калык деке конденыт.34 Тиде еҥ дене мом ыштышашым пален огытыл, сандене тудым петырен шынденыт.
35 Господь Моисейлан каласен: «Тиде еҥ колышаш. Тек калык тудым стан деч ӧрдыжтӧ кӱм кышкен пуштеш».36 Калык тудым стан гыч луктын да, Господьын Моисейлан кӱштымыж семынак, ӱмбакыже кӱм кышкен пуштын.
37 Господь Моисейлан каласен:38 «Израиль калыклан ойло: вургем урвалтышкыда йолвам ыштыза, кажне йолваште шемалге-канде меж шӱртӧ лийшаш. Тидым тукым гыч тукымыш ыштен шогыза.39 Нине йолвам ончен, те Господьын кӱштымашыж-влакым шарналтеда да нуным шукташ тӱҥалыда, а яжарланаш таратыше шӱм-чонда ден шинчадан кумыл шупшмыжо почеш ода ыште.40 Тунам те Мыйын чыла кӱштымашем шарнаш да шуктен шогаш тӱҥалыда, шке Юмыда ончылно святой лийыда.41 Мый Господь, тендан Юмыда улам. Тендан Юмыда улмем ончыкташ манын, Мый тендам Египет гыч луктынам. Мый Господь, тендан Юмыда улам».
Глава 15