Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Тидым израиль калыклан ойло: израиль тукым еҥ але израиль калык коклаште илыше йотъеҥ шке икшывыжым Молохлан пуа гын, тыгай еҥым пуштман. Тек калык тудым кӱм кышкен пуштеш.3 Мый тудын дек тупынь савырнем да калыкше кокла гыч пытарем. Вет тудо, шке икшывыжым Молохлан пуэн, Мыйын святой верем шакшылен да Мыйын святой лӱмем шӱктарен.4 Тиде мландыште илыше калык тудын шке икшывыжым Молохлан пуымыжым ужеш да тудым ок пушт гын,5 Мый тыгай еҥ да тудын родо-тукымжо дек тупынь савырнем. Тудын семын Молох дене яжарланыше кажне еҥым Мый калык кокла гыч пытарем.
6 Кӧ Мый дечем кораҥеш да, колышын чонжым ӱжын лукшо ден юзо деке каен, яжарлана – Мый тыгай айдеме деке тупынь савырнем, тудым калык кокла гыч пытарем.
7 Шкендам святитлыза да святой лийза, вет Мый Господь, тендан Юмыда, [святой] улам.8 Мыйын чыла пунчалем шуктен шогыза – Мый тендам святитлыше Господь улам.
9 Кӧ шке ачажым але аважым шӱктарен ойла, тек пуштмо лиеш. Шке ачажым але аважым шӱктарен ойлен гын, колымыжлан тудо шке титакан.
10 Кӧ марлан лекше ӱдырамаш дене, лишылъеҥжын ватыж дене, яжарлана гын, когыньыштымат пушташ кӱлеш.11 Кӧ ачажын изватыж дене вате-марий семын мала гын, когыньыштымат пуштман: колымыштлан нуно шкеак титакан улыт. Тиде эрге шке ачажым шӱктарен.
12 Кӧ шке шешкыж дене мала гын, когыньыштымат пуштман: нуно йырнык пашам ыштеныт. Колымыштлан нуно шкеак титакан улыт.
13 Иктаж пӧръеҥ вес пӧръеҥ дене ӱдырамаш дене малыме семын мала гын, нуно йырнык пашам ыштеныт. Нуным когыньыштымат пуштман, колымыштлан нуно шкеак титакан улыт.
14 Кӧ ӱдыржымат, аважымат марлан налеш гын, тиде – йырнык. Тендан коклаште тыгай осал паша тетла ынже лий манын, пӧръеҥжымат, кок ӱдырамашыжымат тулеш йӱлалтыман.
15 Иктаж пӧръеҥ вольык дене кӱтла гын, тудым пуштман. Вольыкымат пытарыза.16 Иктаж ӱдырамаш вольык деке кӱтлаш лишемеш гын, когыньыштымат пуштса. Тек нуно пуштмо лийыт, колымыштлан шкеак титакан улыт.
17 Кӧ шке акажым але шӱжаржым, шке ачажын але аважын ӱдыржым, марлан налеш да тудын дене мала гын, тиде – намыс. Тек нуно шке калыкыштын шинча ончылныштак пытарыме лийыт. Тудо акаже але шӱжарже дене мален, сулыкшылан мутым кучышаш.
18 Кӧ тылзашыже годым вӱр йогышан ӱдырамаш дене мала гын, нуно коктынат вӱр йогымо верым почыт. Нуным когыньыштымат калык кокла гыч пытараш кӱлеш.
19 Аватын акаже але шӱжарже дене, ачатын акаже але шӱжарже дене ит мале – тудын дене тый ик вӱр улат. Те коктынат мутым кучаш тӱҥалыда.20 Кӧ шке чузайжын*а ватыж дене мала гын, тудо чузайжым шӱктара. Нуно шке сулыкыштлан мутым кучат да коктынат йочадыме колат.21 Кӧ шке изажын але шольыжын илыше улмыж ӱмбач тудын ватыжым марлан налеш гын, йырнык пашам ышта. Тидын дене тудо шке изажым але шольыжым шӱктара. Нуно коктынат йочадыме лийыт.
22 Мыйын чыла закон ден пунчалем шуктен шогыза. Тунам Мыйын илаш наҥгайыме мландем тендам шке ӱмбачше укшич ок шу.23 Мыйын тендан деч поктен колтымо калык-влакын йӱлашт почеш ида иле. Нуно чыла тидым ыштен иленыт, сандене Мылам йырнык лийыныт.24 Мый тыланда каласенам: те нунын мландыштлан оза лийыда, Мый тыланда шӧр да мӱй йогыман мландым пуэм. Мый тендам моло калык деч ойырышо Господь Юмыда улам.25 Ару вольык-янлыкым ару огыл деч, ару кайыкым ару огыл деч ойыркалыза. Могай вольык-янлыкым, кайыкым, мландымбалысе тыгыде чонаным Мый ару огыл манын ойыренам – нунын дене шкендам ида амырте.26 Мыйын ончылнем святой лийза, вет Мый Господь, [тендан Юмыда,] святой улам. Мыйын калыкем лийза манын, Мый тендам вес калык-влак деч ойыренам.
27 Пӧръеҥ але ӱдырамаш кокла гыч иктаж-кӧ колышо-влакым ӱжын лукташ але юзыланаш тӱҥалеш гын, тыгай еҥым кӱм кышкен пуштман. Колымыжлан тудо шкеак титакан».
*а 20:20 Чузай – ачан изаже.
Глава 20